Read La Bible en Malgache Deoteronomia 18 Bible Online

Deoteronomia 18 - La Bible en Malgache bible

Deoteronomia 18

¹Tsy mba hanana anjara na lova eo amin’ny Israely ny levita* mpisorona, dia ny fokon’i Levy rehetra; fa ny fanatitra levonina amin’ny afo ho an’NY TOMPO sy ny anjaran’NY TOMPO no ho fihinany.

²Tsy hanan-dova eo amin’ny rahalahiny izy; NY TOMPO no lovany, araka izay nolazainy taminy.

³Ary izao no ho anjaran’ny mpisorona avy amin’ny olona, dia avy amin’izay mamono zavatra hatao fanatitra, na omby, na ondry, na osy: Homena ho an’ny mpisorona ny sorony sy ny valanoranony roa ary ny vavoniny.

⁴Homenareo azy koa ny voaloham-bokatry ny varinao, ny ranom-boalobokao, ny diloilonao ary ny voalohan’ny volon’ondrinao.

⁵Fa izy sy ny taranany no nofidin’NY TOMPO Andriamanitrao tamin’ny fokonao rehetra hitsangana hanao fanompoam-pivavahana amin’ny andro rehetra amin’ny anaran’NY TOMPO.

⁶Raha misy levita miala amin’ny tanànanao iray, izay nivahiniany, tany amin’ny Israely rehetra ka mandeha araka ny fanirian’ny fony ho any amin’ny tany izay hofidin’NY TOMPO,

⁷ary manao fanompoam-pivavahana amin’ny anaran’NY TOMPO Andriamaniny, tahaka ny levita rahalahiny rehetra izay mitsangana eo anatrehan’NY TOMPO,

⁸dia anjara mitovy amin’ny anjaran’ireo ihany no ho fihinany, na dia misy aza izay azony tamin’ny nivarotany izay fananana avy tamin’ny rainy.

⁹Rehefa tonga any amin’ny tany izay omen’NY TOMPO Andriamanitrao anao ianao dia aza mianatra manao araka ny fahavetavetana ataon’ireo firenena ireo.

¹⁰Aoka tsy hisy eo aminao izay mampandeha ny zanany lahy na ny zanany vavy hamakivaky afo, na mpisikidy, na mpanandro, na mpanao sikidy, na mpitahiry ody,

¹¹na manao azy ho masim-bava, na mpanadina amin’ny olona izay mpiantso ny fanahin’ny maty, na mpisikidy, na mpila hevitra amin’ny maty.

¹²Fa fahavetavetana eo imason’NY TOMPO izay rehetra manao ireo zavatra ireo, ary izany fahavetavetana izany no androahan’NY TOMPO Andriamanitrao azy eo anoloanao.

¹³Aoka ianao ho tanteraka eo amin’NY TOMPO Andriamanitrao.

¹⁴Fa ireo firenena izay efa horoahinao ireo dia mihaino ny mpanandro sy ny mpisikidy; fa ianao kosa dia tsy navelan’NY TOMPO Andriamanitrao hanao izany.

¹⁵Mpaminany avy eo aminao, dia avy amin’ny rahalahinao, tahaka ahy, no hatsangan’NY TOMPO Andriamanitrao ho anao: Izy no hohenoinareo.

¹⁶Araka izay rehetra nangatahinao tamin’NY TOMPO Andriamanitrao tao Horeba tamin’ny andro nivoriana hoe: Aoka tsy hihaino ny feon’NY TOMPO Andriamanitro intsony aho, ary aoka tsy hahita izany afo lehibe izany intsony aho, fandrao maty.

¹⁷Dia hoy NY TOMPO tamiko: Tsara ny teny izay nolazainy.

¹⁸Mpaminany no hatsangako ho azy avy amin’ny rahalahiny tahaka anao ka hataoko eo am-bavany ny teniko, ary holazainy aminy izay rehetra handidiako azy.

¹⁹Ary izay rehetra tsy mihaino ny teniko, izay holazain’io mpaminany io amin’ny anarako, dia Izaho no hitsara azy.

²⁰Fa ny mpaminany izay sahy hilaza teny amin’ny anarako, nefa tsy araka izay nasaiko nolazainy, na izay miteny amin’ny anaran’ny andriamanitra hafa, dia hovonoina.

²¹Ary raha hoy ianao anakampo: Hataontsika ahoana no fahafantatra ny teny izay tsy nolazain’NY TOMPO?

²²Raha miteny amin’ny anaran’NY TOMPO ny mpaminany ka tsy mitranga na tsy tanteraka ilay zavatra nolazainy dia teny izay tsy nolazain’NY TOMPO izany, fa tamin’ny fahasahisahiana no nilazan’ny mpaminany izany, koa aza matahotra azy.