Read La Bible en Malgache Deoteronomia 19 Bible Online

Deoteronomia 19 - La Bible en Malgache bible

Deoteronomia 19

¹Rehefa aringan’NY TOMPO Andriamanitrao ny firenena samihafa izay tompon’ny tany omen’NY TOMPO Andriamanitrao anao, ary mandresy azy ianao ka monina ao an-tanànany sy ao an-tranony,

²dia manokàna tanàna telo eo afovoan’ny taninao, izay omen’NY TOMPO Andriamanitrao anao holovana.

³Manamboara lalana ka zarao ho telo toko ny taninao izay omen’NY TOMPO Andriamanitrao holovanao, fa ao no handosiran’izay rehetra mahafaty olona.

⁴Ny nahafaty olona izay hovelomina, raha mandositra ao, dia izay nahafaty tsy nahy ny namany ka tsy nankahala azy teo aloha;

⁵raha misy olona miaraka amin’ny namany ho any an’ala hanapaka hazo ka manainga ny famaky hikapa hazo ny tanany, ary mitsoaka amin’ny zarany ny lelam-pamaky ka mahavoa ny namany ary mahafaty azy, dia aoka handositra ao amin’ny iray amin’ireo tanàna ireo izy ka hovelomina;

⁶fandrao hanenjika ilay nahafaty olona ny mpamaly ra, raha mbola mirehitra ny fony ka hahatratra azy, noho ny halavitry ny alehany, dia hahafaty azy izy; nefa tsy tokony ho faty izy satria tsy nankahala ny namany talohan’ny nahafatesany azy.

⁷Koa izany no andidiako anao hoe: Manokàna tanàna telo.

⁸Ary raha hitarin’NY TOMPO Andriamanitrao ny faritry ny taninao, araka izay nianianany tamin’ny razanao ka homeny anao ny tany rehetra izay nampanantenainy homena ny razanao,

⁹raha mitandrina hanaraka izao lalàna rehetra andidiako anao anio izao ianao sady ho tia NY TOMPO Andriamanitrao, no handeha mandrakariva amin’ny lalany, dia hampianao tanàna telo koa ireny telo ireny;

¹⁰mba tsy hisy ran’ny tsy manan-tsiny halatsaka eo amin’ny taninao izay omen’NY TOMPO Andriamanitrao anao ho lovanao ka tsy ho meloka amin’ny ra ianao.

¹¹Fa raha misy olona mankahala ny namany ka manao vela-pandrika aminy, ary mitsangana hamely mahafaty azy, nefa mandositra ho ao amin’ny iray amin’ireo tanàna ireo,

¹²dia haniraka haka azy ao ny loholona amin’ny tanànany ka hanolotra azy eo an-tanan’ny mpamaly ra, mba hovonoina ho faty izy.

¹³Tsy hiantra azy ny masonao; fa hesorinao tsy ho eo amin’ny Israely ny heloka amin’ny ran’ny tsy manan-tsiny mba hahita soa ianao.

¹⁴Aza manakisaka ny faritry ny tanin’ny namanao, izay efa vitan’ny razana teo amin’ny zarataninao, izay azonao eo amin’ny tany izay omen’NY TOMPO Andriamanitrao holovanao ianao.

¹⁵Raha vavolombelona iray monja dia aoka tsy hitsangana hiampanga olona amin’izay heloka na ota nataony na inona na inona; fa amin’ny tenin’ny vavolombelona roa na telo no hanorenana mafy ny teny.

¹⁶Raha misy vavolombelona mampidi-doza mitsangana hiampanga olona ho nanao izay ratsy

¹⁷dia hitsangana eo anatrehan’NY TOMPO izy roa lahy izay miady, dia eo anatrehan’ny mpisorona sy ny mpitsara amin’io andro io;

¹⁸ary raha hadinin’ny mpitsara mafy izy ireo ka hitany fa vavolombelona mandainga ilay miampanga ny namany

¹⁹dia araka izay nokasainy hatao amin’ny namany no hataonareo aminy; fa hofongoranao tsy ho eo aminao ny fanao ratsy.

²⁰Ary ny olona sisa dia handre izany ka hatahotra ary tsy hanao tahaka ireny ratsy ireny eo aminao intsony.

²¹Fa tsy hiantra azy ny masonao; ary aina no hataonao solon’ny aina, maso solon’ny maso, nify solon’ny nify, tanana solon’ny tanana, tongotra solon’ny tongotra.