Read La Bible en Malgache Deoteronomia 20 Bible Online

Deoteronomia 20 - La Bible en Malgache bible

Deoteronomia 20

¹Raha mandeha hanafika ny fahavalonao ianao ka mahita soavaly sy kalesy fitondra miady ary olona maro noho ianao dia aza matahotra azy; fa NY TOMPO Andriamanitrao kosa, izay nitondra anao niakatra avy tany amin’ny tany Ejipta, no momba anao.

²Rehefa hanafika ianareo dia hanatona ny mpisorona ka hiteny amin’ny olona hoe:

³Mihainoa, ry Israely ô, fa hanafika ny fahavalonareo ianareo anio; koa aza ketraka ny fonareo ary aza matahotra, na mikorapaka foana, na mangorohoro eo anoloany;

⁴fa NY TOMPO Andriamanitrareo no miara-mandeha aminareo hiady ho anareo amin’ny fahavalonareo mba hamonjy anareo.

⁵Dia hiteny amin’ny olona ireo mpifehy azy hoe: Iza no olona izay nanorina trano vaovao nefa tsy mbola notokanany? Aoka handeha hiverina any an-tranony izy, fandrao maty any amin’ny ady ka olon-kafa no hitokana ny tranony.

⁶Iza no olona izay nanamboatra tanim-boaloboka nefa tsy mbola nihinana ny vokatra? Aoka handeha hiverina any an-tranony izy, fandrao maty any amin’ny ady ka olon-kafa no hihinana ny vokatra.

⁷Ary iza no olona izay nifofo vady nefa tsy mbola nampakatra azy? Aoka handeha hiverina any an-tranony izy, fandrao maty any amin’ny ady ka olon-kafa no hampakatra ny vadiny.

⁸Ary mbola hiteny amin’ny olona ihany ny mpifehy azy hoe: Iza no olona izay matahotra sy osa fo? Aoka handeha hiverina any an-tranony izy, fandrao ho ketraka tahaka ny fony koa ny fon’ny rahalahiny.

⁹Rehefa vitan’ny mpifehy vahoaka ny teny ataony amin’ny olona dia hasiany mpifehy ny miaramila hitarika azy.

¹⁰Rehefa manakaiky ny tanàna hiadiana ianao dia milazà fihavanana aminy.

¹¹Raha fihavanana no avaliny anao ka mampandroso anao izy dia hampanaovinao fanompoana ny olona rehetra ao ka hanompo anao.

¹²Fa raha tsy mety manao fihavanana aminao kosa izy, fa te hiady aminao, dia ataovy fahirano.

¹³Ary rehefa atolotry NY TOMPO Andriamanitrao eo an-tananao izy dia hovonoinao amin’ny lelan-tsabatra ny lehilahy rehetra ao.

¹⁴Fa ny babo rehetra ao, dia ny zaza amam-behivavy sy ny biby fiompy mbamin’izay rehetra ao an-tanàna kosa, dia hoentinao ho anao; ary hohaninao ny babo azo tamin’ny fahavalonao, izay omen’NY TOMPO Andriamanitrao anao.

¹⁵Toy izany no hataonao amin’ny tanàna rehetra izay lavitra anao indrindra ka tsy tanànan’ireto firenena ireto.

¹⁶Fa ny tanànan’ireto firenena ireto kosa, izay omen’NY TOMPO Andriamanitrao ho lovanao, dia aza asiana miangana izay olona rehetra ao.

¹⁷Ataovy ho zavatra voaozona avokoa ireo, dia ny Hetita, ny Amorita, ny Kananita, ny Perizita, ny Hivita ary ny Jebosita, araka izay nandidian’NY TOMPO Andriamanitrao anao,

¹⁸izany dia mba tsy hampianarany anareo ny fahavetavetany rehetra izay nataony tamin’ireo andriamaniny ka tsy hanotanareo amin’NY TOMPO Andriamanitrareo.

¹⁹Raha maharitra ela ny fanaovanao fahirano ny tanàna izay tafihinao mba halaina dia aza kapaina ho simban’ny famaky ny hazo maniry eo aminy; fa hisy hohaninao amin’ireo, koa aza kapaina, fa olona va ny hazo any an-tsaha no hataonao fahirano?

²⁰Kanefa ny hazo izay fantatrao fa tsy fihinam-boa dia kapao ihany ka ataovy manda hamelezana ny tanàna izay miady aminao mandra-paharesiny.