Read La Bible en Malgache Deoteronomia 23 Bible Online

Deoteronomia 23 - La Bible en Malgache bible

Deoteronomia 23

¹Tsy mahazo maka ny vadin’ny rainy ny olona, na mandry amin’izay nandrian’ny rainy.

²Tsy mahazo miditra amin’ny fiangonan’NY TOMPO izay torotoro vihina, na izay voatapaka ny filahiany.

³Tsy mahazo miditra amin’ny fiangonan’NY TOMPO ny zazasary. Na dia hatramin’ny taranany fahafolo mandimby aza dia tsy hahazo miditra amin’ny fiangonan’NY TOMPO.

⁴Tsy mahazo miditra amin’ny fiangonan’NY TOMPO ny Amonita sy ny Moabita. Na dia hatramin’ny taranany fahafolo mandimby aza dia tsy hahazo miditra amin’ny fiangonan’NY TOMPO hatramin’ny mandrakizay ireny,

⁵satria tsy nitsena anareo tamin’ny mofo sy rano teny an-dalana izy, raha nivoaka avy tany Ejipta ianareo, ary satria nanangoly an’i Balama, zanak’i Beora, avy any Petora any Mesopotamia, hanozona anao izy.

⁶Kanefa NY TOMPO Andriamanitrao tsy nety nihaino an’i Balama fa nampody ny fanozonana anao ho fitahiana Izy noho ny fitiavany anao.

⁷Aza mitady izay hiadanany na izay hahasoa azy amin’ny andronao rehetra mandrakizay.

⁸Aza atao ho fahavetavetana ny Edomita fa rahalahinao izy, na ny Ejiptiana, fa efa mba vahiny tany amin’ny taniny ianao.

⁹Ny zafiafin’ireo dia hahazo miditra amin’ny fiangonan’NY TOMPO.

¹⁰Raha miainga hiady amin’ny fahavalonao ny tafikao dia mifadia ny ratsy rehetra.

¹¹Raha misy olona eo aminao, izay tsy madio noho izay nanjo azy tamin’ny alina, dia hivoaka ho eny ivelan’ny toby izy fa tsy hiditra ao anatiny.

¹²Aoka handro amin’ny rano izy rehefa hariva; ary rehefa tokony ho maty masoandro dia mahazo miverina ao amin’ny toby indray izy.

¹³Aoka hisy tany voafaritrao ho fivoahanao any ivelan’ny toby;

¹⁴ary mitondrà tsatòka miaraka amin’ny fitaovanao, koa raha hipetraka eny ivelany ianao dia mihadia lavaka amin’ny tsatòka ka totofy ny fivalananao.

¹⁵Fa NY TOMPO Andriamanitrao dia mandeha eo afovoan’ny tobinao hamonjy anao sy hanolotra ny fahavalonao eo anoloanao; ho masina ny tobinao, ary mba tsy hahita zavatra maloto eo aminao Izy ka tsy hiala aminao.

¹⁶Aza atolotrao amin’ny tompony intsony ny andevo izay mandositra mamonjy tena ho eo aminao.

¹⁷Eo aminao no hitoerany, dia eo amin’ny tanàna izay tiany sy izay sitraky ny fony; fa aza mampahory azy.

¹⁸Aoka tsy hisy zanakavavy na zanakalahin’ny Israely hanolo-tena hijangajanga ho fanompoan-tsampy.

¹⁹Aza mitondra ny karama maloton’ny vehivavy janga na ny karaman’alika, ho ao amin’ny tranon’NY TOMPO Andriamanitra, hanefana voady; fa fahavetavetana eo imason’NY TOMPO Andriamanitrao ireo zavatra roa ireo.

²⁰Aza mampanjanaka zavatra amin’ny rahalahinao, na vola, na hanina, na zavatra hafa mety hampanjanahina.

²¹Ny olona hafa firenena ihany no hampanjanahinao zavatra; fa ny rahalahinao kosa dia tsy hampanjanahinao; mba hotahìn’NY TOMPO Andriamanitrao ianao amin’izay rehetra ataon’ny tananao eo amin’ny tany izay efa hidiranao holovana.

²²Raha mivoady amin’NY TOMPO Andriamanitrao ianao dia aza ela fanefa, fa hadinin’NY TOMPO Andriamanitrao aminao tokoa izany ka ho fahotanao.

²³Fa raha tsy mivoady ianao dia tsy fahotanao izany.

²⁴Izay aloaky ny vavanao dia tandremo ka tanteraho, araka ny nivoadianao an-tsitrapo tamin’NY TOMPO Andriamanitrao ihany, dia izay nolazain’ny vavanao.

²⁵Raha mankany amin’ny tanim-boaloboky ny namanao ianao dia mahazo manaram-po mihinam-boaloboka hahavoky anao, nefa aza mitondra mody.

²⁶Raha mankany amin’ny tanimbarin’ny namanao ianao dia mahazo mioty salohim-bary ny tananao, nefa aza jinjainao amin’ny antsimbary ny varin’ny namanao.