Read La Bible en Malgache Deoteronomia 27 Bible Online

Deoteronomia 27 - La Bible en Malgache bible

Deoteronomia 27

¹Nandidy ny vahoaka i Mosesy sy ny loholon’ny Israely hoe: Tandremo ny lalàna rehetra izay omeko anao anio.

²Amin’ny andro izay hitànareo an’i Jordana ho any amin’ny tany izay omen’NY TOMPO Andriamanitrao anao dia manangàna vato lehibe ho anao ka lalory sokay;

³dia soraty eo aminy ny teny rehetra amin’ity lalàna ity, rehefa tafita ianao ka hiditra ao amin’ny tany izay omen’NY TOMPO Andriamanitrao anao, dia tany tondra-dronono sy tantely, araka izay nolazain’NY TOMPO, Andriamanitry ny razanao, taminao.

⁴Rehefa tafita an’i Jordana ianareo dia atsangano ao an-tendrombohitra Ebala ireo vato izay nandidiako anareo androany ireo ka lalory sokay.

⁵Ary manorena alitara ao ho an’NY TOMPO Andriamanitrao; vato no hataonao alitara, nefa aza pehina amin’ny vy izany.

⁶Vato tsy voapaika no hataonao alitaran’NY TOMPO Andriamanitrao ka manolora fanatitra dorana manontolo eo amboniny ho an’NY TOMPO Andriamanitrao

⁷ary manolora koa fanati-pihavanana ka mihinàna sy mifalia eo anatrehan’NY TOMPO Andriamanitrao.

⁸Ary soraty amin’ireo vato ireo ny teny rehetra amin’ity lalàna ity ka ataovy velona tsara ny soratra.

⁹Dia niteny tamin’ny Israely rehetra i Mosesy sy ireo levita* mpisorona hoe: Mangìna ka mihainoa, ry Israely ô. Androany no efa tonga firenen’NY TOMPO Andriamanitrao ianao.

¹⁰Koa henoy ny feon’NY TOMPO Andriamanitrao, ary araho ny didiny sy ny lalànany, izay omeko anao anio.

¹¹Dia nandidy ny vahoaka tamin’izany andro izany i Mosesy hoe:

¹²Ireto no hijanona eo an-tendrombohitra Gerizima hitsodrano ny vahoaka, rehefa tafita an’i Jordana ianareo: Ny Simeona, ny Levy, ny Joda, ny Isakara, ny Josefa ary ny Benjamina.

¹³Ary ireto kosa no hijanona eo an-tendrombohitra Ebala hanozona: Ny Robena, ny Gada, ny Asera, ny Zebolona, ny Dana ary ny Naftaly.

¹⁴Dia hiteny amin’ny Israely amin’ny feo mahery ireo levita hoe:

¹⁵Ho voaozona ny olona izay manao sarin-javatra voasokitra na sarin-javatra voarendrika, izay fahavetavetana eo imason’NY TOMPO, asan’ny tanan’ny mpahay taozavatra, ka mametraka azy ao amin’ny takona. Dia hamaly ny vahoaka rehetra hoe: Amena.

¹⁶Ho voaozona izay manao tsinontsinona ny rainy na ny reniny. Ary ny vahoaka rehetra dia hiteny hoe: Amena.

¹⁷Ho voaozona izay manakisaka ny faritry ny tanin’ny namany. Ary ny vahoaka rehetra dia hiteny hoe: Amena.

¹⁸Ho voaozona izay mampivily lalana ny jamba. Ary ny vahoaka rehetra dia hiteny hoe: Amena.

¹⁹Ho voaozona izay manao fitsarana miangatra amin’ny vahiny sy ny kamboty ary ny mpitondratena. Ary ny vahoaka rehetra dia hiteny hoe: Amena.

²⁰Ho voaozona izay mandry amin’ny vadin’ny rainy satria mandry amin’izay nandrian’ny rainy izy. Ary ny vahoaka rehetra dia hiteny hoe: Amena.

²¹Ho voaozona izay mandry amin’ny biby. Ary ny vahoaka rehetra dia hiteny hoe: Amena.

²²Ho voaozona izay mandry amin’ny anabaviny, dia ny zanakavavin’ny rainy, na ny zanakavavin’ny reniny. Ary ny vahoaka rehetra dia hiteny hoe: Amena.

²³Ho voaozona izay mandry amin’ny rafozambaviny. Ary ny vahoaka rehetra dia hiteny hoe: Amena.

²⁴Ho voaozona izay mamely ny namany any amin’ny takona. Ary ny vahoaka rehetra dia hiteny hoe: Amena.

²⁵Ho voaozona izay mandray kolikoly hahafaty olona tsy manan-tsiny. Ary ny vahoaka rehetra dia hiteny hoe: Amena.

²⁶Ho voaozona izay tsy mankatò ny tenin’ity lalàna ity. Ary ny vahoaka rehetra dia hiteny hoe: Amena.