Read La Bible en Malgache Deoteronomia 3 Bible Online

Deoteronomia 3 - La Bible en Malgache bible

Deoteronomia 3

¹Dia niverina isika avy eo ka niakatra tamin’ny lalana mankany Basana; ary tonga hiady amintsika tao Edrehy i Oga, mpanjakan’i Basana, mbamin’ny vahoakany rehetra.

²Ary hoy NY TOMPO tamiko: Aza matahotra azy ianao fa efa natolotro eo an-tananao izy mbamin’ny vahoakany rehetra sy ny taniny, ary araka izay nataonao tamin’i Sihona, mpanjakan’ny Amorita, izay nonina tao Hesbona, no hataonao aminy.

³Natolotry NY TOMPO Andriamanitsika teo an-tanantsika koa i Oga, mpanjakan’i Basana, sy ny vahoakany rehetra; dia nandresy azy isika mandra-paha tsy nisy niangana azy na dia iray akory aza.

⁴Dia azontsika ny tanànany rehetra tamin’izany andro izany ary tsy nisy tanàna izay tsy nalaintsika taminy, dia tanàna enimpolo, ny tany Argoba rehetra, izay fanjakan’i Oga tany Basana.

⁵Samy nisy manda avo sy vavahady ary hidiny hahamafy azy avy ireo tanàna rehetra ireo, afa-tsy ny vohitra madinika maromaro.

⁶Dia nataontsika ho zavatra voaozona ireny, tahaka izay efa nataontsika tamin’i Sihona, mpanjakan’i Hesbona; naringana ny mponina rehetra isan-tanàna mbamin’ny zaza amam-behivavy.

⁷Ny biby fiompy rehetra sy ny fananana tamin’ireo tanàna ireo dia nataontsika babo ho antsika.

⁸Tamin’izany andro izany dia nalaintsika tamin’ny mpanjaka roa izay an’ny Amorita ny tany any andafin’i Jordana, hatreo amin’ny lohasahan-driaka Arnona ka hatrany amin’ny tendrombohitra Hermona,

⁹izay nantsoin’ny Sidoniana hoe Siriona; nefa ny Amorita kosa dia nilaza azy hoe Senira,

¹⁰dia ny tanàna rehetra amin’ny tany lemaka sy i Gileada rehetra ary i Basana rehetra hatrany Saleka sy Edrehy, dia ny tanàna amin’ny fanjakan’i Oga tany Basana.

¹¹Fa i Oga, mpanjakan’i Basana, irery no sisa velona tamin’ny Refaìta. Indro, farafara vy ny farafarany; tsy ao Raba an’ny taranak’i Amona va izany? Sivy hakiho* ny halavany ary efatra hakiho ny sakany, refy hakihon’ny lehilahy io noraisina io.

¹²Io tany io dia azontsika tamin’izany andro izany; hatrany Aroera izay eo amoron’ny lohasahan-driaka Arnona sy ny antsasaky ny tany havoana any Gileada ary ny tanàna eo, dia nomeko ny Robenita sy ny Gadita.

¹³Ary ny sisa tamin’i Gileada sy ny tanin’i Basana rehetra, izay fanjakan’i Oga, dia nomeko ny antsasaky ny fokon’i Manase, dia ny tany Argoba rehetra, dia i Basana rehetra izay atao hoe Tanin’ny Refaìta.

¹⁴I Jaira, zanak’i Manase, no nahazo ny tany Argoba rehetra, hatramin’ny faritanin’ny Gesorita sy ny Makatita; ary ny anaran’izany Basana izany dia nataony hoe Havota-Jaìra, araka ny anarany ihany, mandraka androany.

¹⁵Ary nomeko an’i Makira i Gileada.

¹⁶Ny Robenita sy ny Gadita dia nomeko ny hatrany Gileada ka hatrany amin’ny lohasahan-driaka Arnona, dia ny antsasaky ny lohasaha sy ny sisintany, hatrany amin’ny moron’ny lohasahan-driaka Jaboka izay sisintanin’ny taranak’i Amona,

¹⁷ary ny tany ngazana koa sy i Jordana ary ny faritany hatrany Kinereta ka hatrany amin’ny ranomasin’ny tany ngazana, dia ny Ranomasintsira, eo an-tsisin’i Pisga, ao atsinanany.

¹⁸Nandidy anareo aho tamin’izany andro izany hoe: NY TOMPO Andriamanitrareo efa nanome anareo ity tany ity ho lovanareo. Andeha mita eo alohan’ny Zanak’Israely rahalahinareo ianareo lehilahy mahery rehetra izay samy efa voaomana hiady.

¹⁹Fa ny vadinareo sy ny zanakareo madinika ary ny ombinareo, izay fantatro fa anananareo betsaka, dia hitoetra ao an-tanànanareo izay nomeko anareo,

²⁰mandra-panomen’NY TOMPO fitsaharana ny rahalahinareo tahaka ny anareo ka holovany koa ny tany izay nomen’NY TOMPO Andriamanitrareo azy any andafin’i Jordana; vita izay vao hiverina ianareo, samy ho any amin’ny taniny avy, izay nomeko anareo.

²¹Dia nandidy an’i Josoa aho tamin’izany andro izany hoe: Ny masonao dia efa nahita izay rehetra nataon’NY TOMPO Andriamanitrareo tamin’ireo mpanjaka roa lahy ireo; dia toy izany no hataon’NY TOMPO amin’ny fanjakana rehetra izay halehanao.

²²Aza matahotra azy ianareo; fa NY TOMPO Andriamanitrareo no hiady ho anareo.

²³Dia nitaraina tamin’NY TOMPO aho tamin’izany andro izany hoe:

²⁴Andriamanitra TOMPO ô, Ianao vao naneho tamin’ny mpanomponao ny fahalehibiazanao sy ny tananao mahery; fa aiza no misy andriamanitra, na any an-danitra na atỳ an-tany, izay mahavita tahaka ny asanao sy ny herinao?

²⁵Mba avelao aho hita ka hahita ny tany soa izay any andafin’i Jordana, dia ilay be tendrombohitra tsara sy i Libanona.

²⁶Fa tezitra tamiko noho ny aminareo NY TOMPO ka tsy nihaino ahy. Hoy Izy tamiko: Aoka izay fa aza miteny Amiko intsony ny amin’izany zavatra izany ianao.

²⁷Miakara eo an-tampon’i Pisga ianao, ary atopazy miankandrefana sy mianavaratra ary mianatsimo sy miantsinanana ny masonao, ary aoka hijery ny masonao; fa tsy hita izany Jordana izany ianao;

²⁸fa mandidia an’i Josoa, dia mampahereza sy mampahatanjaha azy; fa izy no handeha hita eo alohan’ity firenena ity, ary izy no hampandova azy ny tany izay ho hitanao.

²⁹Dia nitoetra tany an-dohasaha tandrifin’i Bety-Peora isika.