Read La Bible en Malgache Deoteronomia 30 Bible Online

Deoteronomia 30 - La Bible en Malgache bible

Deoteronomia 30

¹Rehefa tonga aminao izany zavatra rehetra izany, dia ny fitahiana sy ny fanozonana izay nataoko teo anoloanao, ary mahatsiaro izany ao am-ponao any amin’ny firenena rehetra izay androahan’NY TOMPO Andriamanitrao anao ianao

²ka miverina amin’NY TOMPO Andriamanitrao sy mihaino ny feony amin’ny fonao manontolo sy ny fanahinao manontolo, araka izay rehetra andidiako anao sy ny zanakao anio,

³dia hampodin’NY TOMPO Andriamanitrao avy amin’ny fahababoanao ianao; ary hamindra fo aminao izy ka hanangona anao indray avy any amin’ny firenena rehetra izay nampielezan’NY TOMPO Andriamanitrao anao.

⁴Raha misy aminao voaroaka any amin’ny faravodilanitra dia avy any no hanangonan’NY TOMPO Andriamanitrao anao, ary avy any indray no hitondrany anao.

⁵Dia hampidirin’NY TOMPO Andriamanitrao ao amin’ny tany izay nolovain’ny razanao ianao ka ho lovanao izany; ary hanisy soa anao Izy sy hahamaro anao mihoatra noho ny razanao.

⁶Dia hoforan’NY TOMPO Andriamanitrao ny fonao sy ny fon’ny taranakao hitiavanao NY TOMPO Andriamanitrao amin’ny fonao manontolo sy ny fanahinao manontolo, mba ho velona ianao.

⁷Hataon’NY TOMPO Andriamanitrao amin’ny fahavalonao sy izay mankahala anao izay nanenjika anao ireny fanozonana rehetra ireny.

⁸Dia hihaino ny feon’NY TOMPO indray ianao ka hanaraka ny didiny rehetra izay omeko anao anio.

⁹Ary hataon’NY TOMPO Andriamanitrao manana amby ampy ianao amin’izay hahasoa anao, dia amin’ny asan’ny tananao sy ny ateraky ny kibonao ary ny ateraky ny biby fiompinao sy ny vokatry ny taninao. Fa ho faly aminao indray NY TOMPO ka hanasoa anao, araka izay nampifaliany ny razanao,

¹⁰raha mihaino ny feon’NY TOMPO Andriamanitrao ianao, amin’ny fitandremanao ny didiny sy ny lalànany, izay voasoratra amin’ity bokin’ny lalàna ity, ka miverina amin’NY TOMPO Andriamanitrao amin’ny fonao manontolo sy ny fanahinao manontolo.

¹¹Fa izao lalàna izao, izay omeko anao anio, dia tsy saro-pantarina ho anao sady tsy lavitra.

¹²Tsy any an-danitra izany ka hitenenanao hoe: Iza no hiakatra any an-danitra haka azy ho antsika, mba hohenointsika ka harahintsika?

¹³Ary tsy any andafin’ny ranomasina ihany koa ka hitenenanao hoe: Iza no hankany andafin’ny ranomasina haka azy ho antsika mba hohenointsika ka harahintsika?

¹⁴Fa eo akaikinao indrindra ny teny, dia eo am-bavanao sy ao am-ponao, mba harahinao.

¹⁵Indro efa nataoko teo anoloanao androany ny fiainana sy ny soa ary ny fahafatesana sy ny loza.

¹⁶Tamin’ny nandidiako anao androany dia ny ho tia NY TOMPO Andriamanitrao ka handeha amin’ny lalany ary hitandrina ny didiny sy ny lalànany mbamin’ny fitsipiny. Mba ho velona ianao sady hihamaro, ary mba hotahìn’NY TOMPO Andriamanitrao ianao any amin’ny tany izay efa hidiranao holovana.

¹⁷Fa raha mivily kosa ny fonao ka tsy mihaino ianao, fa voataona hiankohoka eo anatrehan’izay andriamanitra hafa sy hanompo azy,

¹⁸dia lazaiko aminareo anio fa ho ringana tokoa ianareo, ary tsy ho maro andro eo amin’ny tany izay efa hidiranao holovana, rehefa tafita an’i Jordana ianareo.

¹⁹Miantso ny lanitra sy ny tany aho anio ho vavolombelona aminareo fa efa nataoko teo anoloanao ny fiainana sy ny fahafatesana ary ny fitahiana sy ny fanozonana; koa mifidiana ny fiainana, mba ho velona ianao sy ny taranakao,

²⁰dia ny ho tia NY TOMPO Andriamanitrao ianao ka hihaino ny feony sy hifikitra Aminy; fa izany no fiainanao sy fahamaroan’ny andronao, mba honenanao eo amin’ny tany izay nianianan’NY TOMPO tamin’i Abrahama sy Isaka ary i Jakoba razanao, homena azy.