Read La Bible en Malgache Deoteronomia 32 Bible Online

Deoteronomia 32 - La Bible en Malgache bible

Deoteronomia 32

¹Mihainoa, ry lanitra, fa hiteny aho! Henoy, ry tany, ny tenin’ny vavako!

²Hirotsaka tahaka ny ranonorana ny fampianarako, ary hilatsaka tahaka ny ando ny teniko, ho tahaka ny erika amin’ny ahi-maitso sy ho tahaka ny ranonorana amin’ny anana.

³Fa ny anaran’NY TOMPO no hotorìko; maneke ny fahalehibiazan’Andriamanitsika.

⁴Izy no Vatolampy, tanteraka ny asany; fa ny lalany rehetra dia amin’ny rariny avokoa. Andriamanitra mahatoky Izy ka tsy misy ratsy ao Aminy; marina sy mahitsy Izy.

⁵Efa lo eo imasony ireny, tsy zanany intsony noho ny kilemany; fa taranaka miolakolaka sady efa nivadika.

⁶Moa izany va no havalinareo NY TOMPO, ry firenena adala, tsy misy fahendrena? Tsy Izy va no Rainao izay namorona anao? Tsy Izy va no nanao anao sy nampiorina anao?

⁷Tsarovy ny andro fahiny; saino ny taona, hatrizay hatrizay. Anontanio amin’ny rainao fa hanambara aminao izy; ary amin’ny zokiolona eo aminao koa, fa hilaza aminao izy.

⁸Fony nomen’ny Avo Indrindra zaratany ireo firenena ka samy natokantokany ny zanak’olombelona dia notendreny ny sisintanin’ireo firenena araka ny isan’ny Zanak’Israely;

⁹fa anjaran’NY TOMPO ny olony, i Jakoba no natokany ho lovany.

¹⁰Nahita azy tany an-tany efitra Izy, dia tany amin’ny tany foana feno feo mierona; nanodidina azy sy niahy azy Izy, ary koa notandremany tahaka ny anakandriamasony,

¹¹toy ny voromahery manaitra ny ao amin’ny akaniny ka manomba eo ambonin’ny zanany; dia toy izany no namelarany ny elany sy nandraisany azy ary nitondrany azy teo ambonin’ny elany,

¹²NY TOMPO irery no nitondra azy, ary tsy nisy andriamanitra hafa teo aminy.

¹³Nampandeha azy teny ambonin’ny havoana amin’ny tany Izy ka nohaniny ny vokatry ny saha; Izy dia nampitsentsitra azy tantely avy teo amin’ny vatolampy sy diloilo avy teo amin’ny vatolampy vatoafo

¹⁴ary koa rononomandrin’omby sy rononon’ondry aman’osy, mbamin’ny tavin’ny zanak’ondry, ondrilahin’i Basana sy osilahy ary vary izay vokatra indrindra; nisotro divay mahery avy tamin’ny ranom-boaloboka mena ianao.

¹⁵Nihanatavy i Jesorona[3] ka namely daka; efa matavy ianao sady vory nofo no vaventy be! Dia nahafoy an’Andriamanitra izay namorona azy izy ary nanamavo ny Vatolampy famonjena azy,

¹⁶nampahasaro-piaro Azy tamin’ny hafa izy ary tamin’ny zava-betaveta no nampahasosorany Azy;

¹⁷namono zavatra ho fanatitra ho an’ny demonia izay tsy Andriamanitra izy dia andriamanitra tsy fantany, fa andriamanitra vao niseho tatỳ aoriana izay tsy natahoran’ny razanareo.

¹⁸Ny Vatolampy izay niteraka anao dia tsy tsaroanao ary hadinonao Andriamanitra izay nahary anao.

¹⁹Nahita izany NY TOMPO ka nandà, noho ny hasosorany tamin’ny zanany lahy sy ny zanany vavy.

²⁰Dia hoy Izy: Hafeniko azy ny tavako; ho hitako izay hiafarany; fa firenena tena mpivadibadika izy, dia zaza tsy mahatoky.

²¹Ireo dia nampahasaro-piaro Ahy tamin’izay tsy Andriamanitra sy nampahasosotra Ahy tamin’ny zava-poanany; ary Izaho kosa dia hampahasaro-piaro azy amin’izay tsy olona sy hampahasosotra azy amin’izay firenena adala.

²²Fa mirehitra ny afon’ny fahatezerako ka mandoro hatrany amin’ny fitoeran’ny maty* any ambany indrindra, sady mandevona ny tany mbamin’ny vokatra ao aminy, ary mampirehitra ny fanambanin’ny tendrombohitra aza.

²³Havangongoko aminy ny loza marobe ary holanìko aminy ny zana-tsipìkako:

²⁴Hofezahin’ny mosary izy sady holanin’ny areti-mandripaka sy ny fandringanana mangidy ary hampandehaniko aminy ny nifim-biby mbamin’ny poizin’ny biby mpikisaka amin’ny vovoka.

²⁵Eny ivelany dia ny sabatra no hahafaty ny zanany ary ao amin’ny efitrano dia ny horohoro, na ny zatovolahy na ny zatovovavy, na ny zaza minono na ny fotsy volo.

²⁶Fa efa nolazaiko hoe: Hopotehiko izy ka hihahaka; hatsahatro tsy ho eo amin’ny zanak’olombelona ny fahatsiarovana azy,

²⁷raha tsy ny fireharehan’ny fahavalo no natahorako, andrao diso hevitra ireny mpandrafy azy ireny ka hiteny hoe: Ny tananay no avo; fa tsy NY TOMPO tsy akory no nanao izany rehetra izany.

²⁸Fa firenena tsy manan-tsaina izy sady tsy manam-pahalalana.

²⁹Raha mba hendry izy dia hahafantatra izao ka hahafantatra izay ho farany.

³⁰Hataon’ny olona irery ahoana no fanenjika ny arivo, ary hataon’ny roa lahy ahoana no fampandositra ny iray alina, raha tsy ny Vatolampiny no efa nivarotra azy, ary NY TOMPO no efa nanolotra azy?

³¹Fa tsy mba mitovy amin’ny Vatolampintsika ny vatolampin’ireny ka fahavalontsika no ho mpitsara.

³²Ny tahom-boalobony dia tahom-boalobok’i Sodoma ary avy ao amin’ny sahan’i Gomora; ny voalobony dia voaloboka mahafaty sady mangidy koa ny sampahony.

³³Ny divainy dia zava-mahafaty avy amin’ny dragona ary poizina mahery avy amin’ny menarana.

³⁴Moa tsy voatahiry ato Amiko va izany ka voaisy tombo-kase ato an-trano firaketako?

³⁵Ahy ny famaliana sy ny fampanodiavana, raha avy izay hahasolafaka ny tongony; fa antomotra ny andro hahitany loza ary ho avy haingana ny zava-boatendry hanjo azy.

³⁶Fa NY TOMPO hanome rariny ny olony ary hanenina ny amin’ny mpanompony, raha hitany fa lany ny heriny ka tapitra avokoa na ny babo, na ny afaka.

³⁷Ary hiteny Izy hoe: Aiza ireo andriamaniny, dia ny vatolampy izay nialofany,

³⁸izay nihinana ny jaboran’ny fanatiny ary nisotro ny divain’ny fanatitra aidiny? Aoka ireny no hitsangana ka hamonjy anareo ary ho fierena ho anareo.

³⁹Fantaro ankehitriny fa Izaho dia Izaho no Izy ka tsy misy andriamanitra eto akaikiko. Izaho no mahafaty sy mahavelona, ary Izaho no maharatra sy mahasitrana, ka tsy misy mahafaka amin’ny tanako.

⁴⁰Fa manangana ny tanako amin’ny lanitra Aho ka miteny hoe: Raha velona mandrakizay koa Aho,

⁴¹raha manasa ny sabatro manelatselatra Aho, ka voarain’ny tanako ny fitsarana, dia hampanodiaviko ny mpandrafy Ahy ny ataony ary hovaliako ny mankahala Ahy.

⁴²Hataoko mamon-dra ny zana-tsipìkako, ary ny sabatro dia hihina-nofo, dia ny ran’ny voavono sy ny babo mbamin’ny loha mirakorako volon’ny fahavalo.

⁴³Ry Jentilisa, hobio ny olony! Fa ny ran’ny mpanompony no hovaliny. Hamaly ny mpandrafy Azy Izy, ary hanao fanavotana kosa ho an’ny taniny sy ny olony.

⁴⁴Dia nandeha i Mosesy, dia izy sy i Hosea, zanak’i Nona, ka nilaza ny teny rehetra amin’izany hira izany teo anatrehan’ny olona.

⁴⁵Ary nony efa tapitra voalazan’i Mosesy tamin’ny Israely rehetra izany teny rehetra izany

⁴⁶dia hoy izy taminy: Alatsaho ao am-ponareo ny teny rehetra izay ambarako aminareo anio, izay handidianareo ny zanakareo mba hotandremany sy hankatoaviny, dia ny teny rehetra amin’ity lalàna ity.

⁴⁷Fa tsy zava-poana ho anareo izany, fa ity no fiainanareo; ary izao teny izao no hahamaro andro anareo eo amin’ny tany izay efa hidiranareo holovana, rehefa tafita an’i Jordana ianareo.

⁴⁸Ary NY TOMPO niteny tamin’i Mosesy tamin’izay fotoana izay indrindra hoe:

⁴⁹Miakara amin’ity tendrombohitra Abarima ity, dia ny tendrombohitra Nebo, izay eo amin’ny tany Moaba tandrifin’i Jeriko; ary tazano ny tany Kanana, izay omeko ny Zanak’Israely ho lovany.

⁵⁰Dia ho faty ao amin’ny tendrombohitra izay iakaranao ianao ka ho voaangona any amin’ny razanao, tahaka ny nahafatesan’i Arona rahalahinao tao an-tendrombohitra Hora sy ny nanangonana azy tany amin’ny razany,

⁵¹satria nivadika Tamiko teo amin’ny Zanak’Israely ianareo tao amin’ny ranon’i Meriba any Kadesy, tany an-tany efitra Zina, ka tsy nanamasina Ahy teo amin’ny Zanak’Israely.

⁵²Fa hahatazana ny tany eo anoloanao ihany ianao, kanefa tsy hiditra any amin’ny tany izay omeko ny Zanak’Israely.