Read La Bible en Malgache Deoteronomia 33 Bible Online

Deoteronomia 33 - La Bible en Malgache bible

Deoteronomia 33

¹Toy izao ny tsodrano nataon’i Mosesy, lehilahin’Andriamanitra, tamin’ny Zanak’Israely, rehefa nadiva ho faty izy.

²Hoy izy: Avy tao Sinay NY TOMPO ary niseho tamin’ireo avy tany Seìra; niposaka namirapiratra avy tany an-tendrombohitra Parana Izy; ary avy tao amin’ny masiny tsy omby alinalina; nisy afon’ny lalàna ho an’ireo teo ankavanany.

³Eny, tia ireo firenena Izy; eo an-tananao avokoa ny masiny rehetra; miankohoka eo an-tongotrao ireo ka samy mandray amin’ny teninao.

⁴Lalàna no nomen’i Mosesy antsika ho lovan’ny fiangonan’i Jakoba.

⁵Ary tonga mpanjakan’i Jesoròna[4] Izy, rehefa tafangona ny lehiben’ny vahoaka sy ny fokon’Israely rehetra.

⁶Aoka ho velona fa tsy ho faty i Robena, nefa aoka ho vitsy olona izy.

⁷Ny amin’i Joda dia izao, hoy izy: TOMPO ô, mihainoa ny feon’i Joda ka ento ho amin’ny olony izy. Ny tanany no hiadiany ho an’ny tenany ka manampia azy Ianao hamelezany ny mpandrafy azy.

⁸Ny amin’i Levy dia hoy izy: Ny Tomimanao sy ny Orimanao* dia amin’ny olonao mahatoky anao, izay nozahanao toetra tao Masa sy nifamalianao tao amin’ny ranon’i Meriba,

⁹izay nilaza ny rainy sy ny reniny hoe: Tsy mahita azy aho, sady tsy nahafantatra izay rahalahiny izy, ary izay zanany aza dia tsy fantany koa; fa nitandrina ny teninao izy ka nitana ny fanekenao.

¹⁰Hampianariny ny fitsipikao i Jakoba, ary ny lalànanao Israely; hametraka ditin-kazo manitra eo am-bavoronao izy ary fanatitra dorana manontolo eo ambonin’ny alitaranao.

¹¹TOMPO ô, tahio ny heriny, ary aoka ho sitrakao ny asan’ny tanany; asio mafy izay mitsangana hiady aminy ka aoka tsy hiarina intsony izay mankahala azy.

¹²Ny amin’i Benjamina dia hoy izy: Ny malalan’NY TOMPO dia honina amim-piadanana eo aminy, dia halofany mandrakariva ary hobabeny eo an-damosiny.

¹³Ny amin’i Josefa dia hoy izy: Hotahìn’NY TOMPO anie ny taniny amin’ny fanomezan-tsoan’ny lanitra, dia amin’ny ando sy amin’ny rano lalina mamitsaka any ambany,

¹⁴amin’ny zava-tsoa vokatry ny masoandro sy ny voan-java-tsoa vokatry ny volana,

¹⁵amin’ny zava-malaza avy amin’ny tendrombohitra fahagola sy ny zava-tsoa avy amin’ny havoana hatrizay

¹⁶mbamin’ny zava-tsoan’ny tany sy izay rehetra eo aminy ary ny fankasitrahan’Izay nitoetra tao amin’ilay roimemy[5]; aoka ho tonga ao an-dohan’i Josefa izany, dia eo an-tampon-dohan’ilay nalaza tamin’ny rahalahiny.

¹⁷Ny voalohan-teraky ny ombiny dia malaza, tandrok’ombimanga ny tandrony; izany no hanotoany ny firenena rehetra, dia ny faran’ny tany; ireo no alinalin’i Efraima sy arivoarivon’i Manase.

¹⁸Ny amin’i Zebolona dia hoy izy: Mifalia, ry Zebolona, amin’izay alehanao, ary ianao, ry Isakara ao an-dainao.

¹⁹Firenena no antsoiny hankao an-tendrombohitra, ary ao no hamonoany zavatra ho fanatitra amim-pahamarinana; fa hitsentsitra ny harenan’ny ranomasina izy ary ny zava-tsoa miafina ao amin’ny fasika.

²⁰Ny amin’i Gada dia hoy izy: Isaorana anie izay manome malalaka ho an’i Gada; mamitsaka tahaka ny liom-bavy izy ka mamiravira ny sandry mbamin’ny tampon-doha.

²¹Nizaha izay voaloham-bokatra ho an’ny tenany izy, fa teo ny anjaran’ny mpanao lalàna no efa voatokana. Niaraka tamin’ny lohan’ny firenena izy, ary araka ny fahamarinan’NY TOMPO no nataony, sy araka ny fitsipiny izay iombonany amin’ny Israely.

²²Ny amin’i Dana dia hoy izy: I Dana dia zanaka liona; miantsampy avy ao Basana izy.

²³Ny amin’i Naftaly dia hoy izy: Ry Naftaly, voky fankasitrahana sy feno ny fitahian’NY TOMPO, mandovà ny andrefana sy ny atsimo ianao.

²⁴Ny amin’i Asera dia hoy izy: Aoka hotahìna mihoatra noho ny zaza maro i Asera, ary hankasitrahana mihoatra noho ny rahalahiny izy ka hanatsoboka ny tongony amin’ny diloilo.

²⁵Ho vy sy varahina ny hidinao; ary hifamatra amin’ny andronao ny fiadananao.

²⁶Ry Jesoròna[6], tsy misy tahaka an’Andriamanitra izay mitaingina ny lanitra hamonjy anao, sady mandia ny rahona amin’ny voninahiny.

²⁷Ny Andriamanitra hatrizay hatrizay no fonenana, ary ny sandry mandrakizay no eto ambany. Mandroaka ny fahavalo eo anoloanao Izy ka miteny hoe: Aringano.

²⁸Mandry fehizay Israely, mitokana irery ny loharanon’i Jakoba ao amin’ny tany be vary sy ranom-boaloboka; eny, mampilatsaka ando ny lanitra eo amboniny.

²⁹Sambatra ianao, ry Israely; iza no tahaka anao, ry olona voavonjin’NY TOMPO, ampingan’ny famonjena anao sy sabatry ny voninahitrao? Hikoy anao ny fahavalonao, ary hitsahinao ny havoanany.