Read La Bible en Malgache Deoteronomia 34 Bible Online

Deoteronomia 34 - La Bible en Malgache bible

Deoteronomia 34

¹Dia niakatra niala teo amin’ireo tany ngazana any Moaba i Mosesy ka nankany an-tendrombohitra Nebo, ao an-tampon’i Pisga, izay tandrifin’i Jeriko. Ary nasehon’NY TOMPO azy ny tany manontolo: Gileada hatrany Dana,

²i Naftaly manontolo, ny tanin’i Efraima sy i Manase, ny tanin’i Joda manontolo hatramin’ny ranomasina andrefana

³ary i Negeva sy ny ao amin’ny lohasahan’i Jeriko, tanàna be palma, hatrany Zoara.

⁴Dia hoy NY TOMPO taminy: Io no tany izay nianianako tamin’i Abrahama sy Isaka ary i Jakoba hoe: Homeko ny taranakao izy; nataoko mahita azy ny masonao, nefa tsy ho tafita ho tonga eny ianao.

⁵Ary i Mosesy, mpanompon’NY TOMPO, dia maty teo amin’ny tany Moaba araka ny tenin’NY TOMPO.

⁶Naleviny tao an-dohasaha tao amin’ny tany Moaba, tandrifin’i Bety-Peora, izy. Tsy misy olona mahafantatra ny fasany mandraka androany.

⁷Efa roapolo amby zato taona i Mosesy vao maty; tsy pahina ny masony na nihena ny heriny.

⁸Dia nisaona an’i Mosesy nandritra ny telopolo andro teo amin’ny tany ngazana any Moaba ny Zanak’Israely; dia tapitra ny andro fitomaniana nisaonana an’i Mosesy.

⁹Ary i Josoa, zanak’i Nona, dia feno ny fanahim-pahendrena, satria efa nametrahan’i Mosesy tanana izy; dia nihaino azy ny Zanak’Israely ka nanatanteraka izay nandidian’NY TOMPO an’i Mosesy.

¹⁰Tsy nisy mpaminany tahaka an’i Mosesy intsony niseho teo amin’ny Israely, izay fantatry NY TOMPO nifanatrika,

¹¹tamin’ny famantarana rehetra sy ny fahagagana, izay nanirahan’NY TOMPO azy mba hataony tany Ejipta tamin’i Farao sy ny mpanompony rehetra ary ny taniny rehetra;

¹²ary tamin’ny tanana mahery sy ny asa lehibe sady mahatahotra, izay nasehon’i Mosesy teo imason’ny Israely rehetra.