Read La Bible en Malgache Deoteronomia 6 Bible Online

Deoteronomia 6 - La Bible en Malgache bible

Deoteronomia 6

¹Ary izao ny lalàna, dia ny didy sy ny fitsipika, izay nandidian’NY TOMPO Andriamanitrareo hampianarina anareo mba harahinareo any amin’ny tany izay alehanareo holovana,

²mba hatahoranao NY TOMPO Andriamanitrao, hitandremanao ny lalànany rehetra sy ny didiny izay omeko anao, dia ianao sy ny zanakao ary ny zafinao, amin’ny andro rehetra hiainanao, mba ho maro andro ianao.

³Koa mihainoa, ry Israely, ary mitandrema amin’ny fanarahana izany, mba hahita soa ianao ka hitombo indrindra, araka izay nolazain’NY TOMPO, Andriamanitry ny razanao taminao, rahatrizay any amin’ny tany tondra-dronono sy tantely.

⁴Mihainoa ry Israely: NY TOMPO Andriamanitsika dia TOMPO iray ihany.

⁵Koa tiava NY TOMPO Andriamanitrao amin’ny fonao manontolo sy ny fanahinao manontolo ary ny herinao manontolo.

⁶Aoka ho ao am-ponao izao didy omeko anao anio izao,

⁷ary ampianaro tsara ny zanakao izany ka resaho aminy mandrakariva na mipetraka ao an-tranonao ianao, na mandeha eny an-dalana, na mandry, na mifoha;

⁸ary fehezo ho famantarana eo amin’ny tananao ireny, ary aoka ho fehy fampahatsiarovana eo ambonin’ny handrinao,

⁹ary soraty eo amin’ny tolam-baravaran’ny tranonao sy eo amin’ny vavahadinao.

¹⁰Rehefa entin’NY TOMPO Andriamanitrao ho any amin’ny tany izay nianianany tamin’i Abrahama sy Isaka ary i Jakoba razanao homena anao ianao, dia tany misy tanàna lehibe sady tsara izay tsy nataonao,

¹¹trano feno zava-tsoa rehetra izay tsy ianao no nahafeno azy; lavaka famorian-drano nohadiana eo amin’ny vato izay tsy nolavahanao; tany voavoly voaloboka sy hazo oliva izay tsy nambolenao; ary rehefa mihinana ianao ka voky

¹²dia mitandrema fandrao hadinonao NY TOMPO izay nitondra anao nivoaka avy tany amin’ny tany Ejipta, tany amin’ny trano nanandevozana.

¹³Matahora NY TOMPO Andriamanitrao ianao ka manompoa Azy ary aoka ny anarany no hianiananao.

¹⁴Aza manaraka izay andriamanitra hafa amin’ireny andriamanitry ny firenena manodidina anareo ireny

¹⁵fa Andriamanitra saro-piaro aminao NY TOMPO Andriamanitrao, fandrao hirehitra aminao ny fahatezeran’NY TOMPO Andriamanitrao ka hofongorany tsy ho eo ambonin’ny tany ianao.

¹⁶Aza maka fanahy NY TOMPO Andriamanitrareo ianareo, tahaka ilay nakanareo fanahy Azy tao Masa.

¹⁷Tandremo tsara ny didin’NY TOMPO Andriamanitrareo sy ny teny vavolombelony ary ny lalànany, izay efa nomeny anao.

¹⁸Ataovy izay mahitsy sady tsara eo imason’NY TOMPO mba hahita soa ianao ka hiditra handova ny tany soa izay nianianan’NY TOMPO tamin’ny razanao homena azy,

¹⁹sady mba horoahiny tsy ho eo anoloanao ny fahavalonao rehetra, araka izay nolazain’NY TOMPO.

²⁰Raha manontany anao ny zanakao amin’ny andro ho avy hoe: Manao ahoana moa ny teny vavolombelona sy ny didy ary ny fitsipika, izay nandidian’NY TOMPO Andriamanitsika hotandremanareo?

²¹Dia holazainao aminy hoe: Andevon’i Farao tany Ejipta isika ary tanana mahery no nitondran’NY TOMPO antsika niala avy tany Ejipta.

²²Ary NY TOMPO nanao famantarana sy fahagagana lehibe sady mandoza tamin’ny Ejiptiana sy i Farao ary ny ankohonany rehetra teo imasontsika.

²³Dia nitondra antsika niala avy tany Izy mba hahafahany mampiditra antsika sy manome antsika ny tany izay nianianany tamin’ny razantsika homena azy.

²⁴Ary NY TOMPO nandidy antsika mba hanaraka ireo didy rehetra ireo sy hatahotra NY TOMPO Andriamanitsika mba hahita soa mandrakariva isika ary ho velona tahaka ny amin’izao anio izao.

²⁵Ho fahamarinantsika ny mitandrina hanaraka izany didy rehetra izany eo anatrehan’NY TOMPO Andriamanitsika, araka izay nandidiany antsika.