Read La Bible en Malgache Deoteronomia 8 Bible Online

Deoteronomia 8 - La Bible en Malgache bible

Deoteronomia 8

¹Ny lalàna rehetra izay omeko anao anio dia tandremo ka araho, mba ho velona sy hihamaro ianareo ary hiditra sady handova ny tany izay nianianan’NY TOMPO tamin’ny razanareo homena azy.

²Tsarovy ny lalana rehetra izay nitondran’NY TOMPO Andriamanitrao anao tany an-tany efitra izay efapolo taona izay, fa Izy no hampanetry tena anao sy hizaha toetra anao ary hahafantatra izay ao am-ponao, na hitandrina ny didiny ianao, na tsia.

³Dia nampanetry tena anao Izy ka namela anao ho noana, ary nanome anao ny mana hohaninao, izay tsy fantatrao na ny razanao, mba hampahafantarany anao fa tsy mofo ihany no iveloman’ny olona fa izay rehetra aloaky ny vavan’NY TOMPO.

⁴Tsy rovitra ny fitafianao teny aminao ary tsy nivonto ny tongotrao izay efapolo taona izay.

⁵Koa aoka ho fantatrao amin’ny fonao, fa tahaka ny fananaran’ny olona ny zanany no fananaran’NY TOMPO Andriamanitrao anao.

⁶Tandremo ny didin’NY TOMPO Andriamanitrao mba handehananao amin’ny lalany sy hatahoranao Azy.

⁷Fa NY TOMPO Andriamanitrao efa hampiditra anao any amin’ny tany soa, dia tany misy renirano sy loharano ary rano lalina, eny an-dohasaha sy any an-tendrombohitra;

⁸tany misy karazam-barimbazaha, voaloboka sy aviavy sy ampongabendanitra, tany misy hazo oliva sy tantely;

⁹tany izay hihinananao hanina amin’ny fanaranam-po, sady tsy hisy zava-mahory anao ao; tany misy vy ny vato ao aminy, ary ao amin’ny tendrombohiny no hihadianao varahina.

¹⁰Rehefa hihinana ianao ka ho voky dia hisaotra NY TOMPO Andriamanitrao noho ny tany soa izay nomeny anao.

¹¹Koa mitandrema, fandrao hadinoinao NY TOMPO Andriamanitrao ka tsy tandremanao ny didiny sy ny fitsipiny ary ny lalànany, izay omeko anao anio;

¹²fandrao rehefa hihinana ianao ka ho voky, fandrao rehefa hanorina trano tsara ianao sady hitoetra ao,

¹³fandrao rehefa hihamaro ny ombinao sy ny ondry aman’osinao sady hitombo koa ny volafotsinao sy ny volamenanao, no hitombo ny fanananao rehetra,

¹⁴dia hiavonavona ny fonao ka hohadinoinao NY TOMPO Andriamanitrao izay nitondra anao nivoaka avy tany amin’ny tany Ejipta, tamin’ny trano nanandevozana,

¹⁵izay nitondra anao tany an-tany efitra lehibe sy mahatahotra, izay misy menarana mandoro sy maingoka, dia ny tany mangetana tsy misy rano; Izy koa no nampivoaka rano ho anao avy tamin’ny vatolampy vatoafo;

¹⁶Izy no nanome anao mana hohanina tany an-tany efitra, dia zavatra tsy fantatry ny razanao, mba hampanetry tena anao sy hizahana toetra anao nefa hanisy soa anao amin’ny ho avy.

¹⁷Aoka ianao tsy hiteny anakampo hoe: Ny tanjako sy ny herin’ny tanako no nahavoriako izao harena izao;

¹⁸fa tsarovy NY TOMPO Andriamanitrao, satria Izy no manome anao hery hahavory harena mba haoriny ny fanekeny izay nianianany tamin’ny razanao, tahaka izao anio izao.

¹⁹Fa raha toa ka manadino NY TOMPO Andriamanitrao ianao ka manaraka izay andriamanitra hafa sady manompo azy no miankohoka eo anatrehany dia milaza aminareo marimarina aho fa haringana tokoa ianareo.

²⁰Tahaka ny andringanana ny firenen-tsamihafa, izay aringan’NY TOMPO eo anoloanareo, no handringanana anareo satria tsy nihaino ny feon’NY TOMPO Andriamanitrareo ianareo.