Read La Bible en Malgache Jaona 1 Bible Online

Jaona 1 - La Bible en Malgache bible

Jaona 1

¹Tamin’ny voalohany ny Teny ary ny Teny dia tao amin’Andriamanitra; ary ny Teny dia Andriamanitra.

²Izy dia tao amin’Andriamanitra tamin’ny voalohany.

³Izy no nahariana ny zavatra rehetra; ary raha tsy Izy dia tsy nisy nahariana izao zavatra ary izao na dia iray aza.

⁴Tao Aminy ny fiainana; ary ny fiainana no fanazavana ny olona.

⁵Ny mazava dia mamirapiratra ao amin’ny maizina, fa ny maizina dia tsy nandray azy.

⁶Nisy lehilahy nirahin’Andriamanitra, Jaona no anarany.

⁷Tonga mba ho vavolombelona hanambara ny mazava izy, mba hinoan’ny olona rehetra noho ny teniny.

⁸Tsy izy anefa no Ilay mazava, fa tonga mba ho vavolombelona hanambara ny mazava ihany izy.

⁹Ny Teny no tena mazava izay mahazava ny olona rehetra; tonga eto amin’izao tontolo izao Izy.

¹⁰Teo amin’izao tontolo izao Izy, ary Izy no nanaovana izao tontolo izao, nefa izao tontolo izao dia tsy nahalala Azy.

¹¹Tonga tany amin’ny Azy Izy, fa ny Azy dia tsy nandray Azy;

¹²fa izay rehetra nandray Azy dia nomeny hery ho tonga zanak’Andriamanitra, dia izay mino ny anarany,

¹³dia ireo izay tsy nateraky ny ra na ny sitrapon’ny nofo na ny sitrapon’ny olona fa naterak’Andriamanitra.

¹⁴Ary ny Teny dia tonga nofo ka nonina teto amintsika; ary hitanay ny voninahiny, dia voninahitra mendrika ho an’ny Lahitokana avy tamin’ny Ray sady feno fahasoavana sy fahamarinana.

¹⁵Vavolombelona nanambara Azy i Jaona ka niantso hoe: Izy Ilay nolazaiko hoe: Izay avy ao aorianako dia efa tonga eo alohako satria talohako Izy.

¹⁶Fa tamin’ny fahafenoany no nandraisantsika rehetra, dia fahasoavana miampy fahasoavana;

¹⁷fa ny lalàna dia nomena tamin’ny alalan’i Mosesy, fa ny fahasoavana sy ny fahamarinana kosa dia tonga tamin’ny alalan’i Jesosy Kristy*.

¹⁸Tsy nisy nahita an’Andriamanitra na oviana na oviana; fa ny Zanaka Lahitokana, izay ao an-tratran’ny Ray, Izy no nanambara Azy.

¹⁹Izao no fanambaràna nataon’i Jaona, raha naniraka mpisorona sy levita* avy tany Jerosalema hankany aminy ny Jiosy* mba hanontany azy hoe: Iza moa ianao?

²⁰Ary nilaza marina izy fa tsy nandà, ary hoy ny filazany: Tsy izaho no Kristy*.

²¹Ary nanontany azy izy ireo hoe: Ahoana ary? I Elia va ianao? Dia hoy izy: Tsy izy aho. Ilay Mpaminany va ianao? Fa hoy izy hoe: Tsia.

²²Dia hoy ireo taminy: Iza ary ianao mba hitondranay valiny ho any amin’izay naniraka anay? Lazainao ho iza moa ny tenanao?

²³Dia hoy izy: «Izaho dia feon’ny miantso mafy any an-tany efitra hoe: Ataovy mahitsy ny lalan’NY TOMPO» (Isa 40.3), araka izay nolazain’Isaia mpaminany[1].

²⁴Ary iraka avy tamin’ny Fariseo* ireo.

²⁵Dia nanontany an’i Jaona indray ireo hoe: Nahoana ary ianao no manao batisa raha tsy ianao no Kristy na i Elia na ilay Mpaminany?

²⁶Namaly azy ireo i Jaona hoe: Izaho dia manao batisa amin’ny rano; fa eto aminareo misy Iray izay tsy fantatrareo,

²⁷dia ilay avy ao aorianako, ary tsy mendrika hamaha ny fehin-kapany akory aho.

²⁸Izany zavatra izany dia tany Betania any andafin’i Jordana, izay nanaovan’i Jaona batisa.

²⁹Nony ampitso dia nahita an’i Jesosy avy manatona azy i Jaona ka hoy izy: Indro ny Zanak’ondrin’Andriamanitra izay manaisotra ny fahotan’izao tontolo izao!

³⁰Izy ilay nolazaiko hoe: Misy Lehilahy tonga avy ao aorianako izay efa tonga eo alohako satria talohako Izy.

³¹Ary tsy nahalala Azy aho; fa mba hanehoana Azy amin’ny Israely dia izany no niaviako manao batisa amin’ny rano.

³²Ary i Jaona no vavolombelona nanambara hoe: Izaho dia nahita ny Fanahy nidina avy tany an-danitra tahaka ny voromailala ka nitoetra teo amboniny.

³³Ary tsy nahalala Azy aho; fa izay naniraka ahy hanao batisa amin’ny rano no nilaza tamiko hoe: Izay ho hitanao idinan’ny Fanahy sy itoerany dia Izy no Mpanao batisa amin’ny Fanahy Masina.

³⁴Ary nahita aho ka mijoro ho vavolombelona fa Izy no Zanak’Andriamanitra.

³⁵Nony ampitson’iny i Jaona dia mbola teo ihany niaraka tamin’ny mpianany roa lahy;

³⁶ary nahita an’i Jesosy nitsangantsangana izy ka niteny hoe: Indro ny Zanak’ondrin’Andriamanitra!

³⁷Ary ireo mpianatra roa lahy ireo, rehefa nandre azy niteny, dia nanaraka an’i Jesosy.

³⁸Nony nitodika Jesosy ka nahita azy ireo manaraka, dia niteny taminy hoe: Inona no tadiavinareo? Ary hoy izy roa lahy Taminy: Raby, izany hoe, Mpampianatra ô, aiza Ianao no mitoetra?

³⁹Dia hoy Izy taminy: Avia, fa ho hitanareo. Dia nandeha izy ireo ka nahita izay nitoerany ary nitoetra teo Aminy tamin’izany andro izany; ary efa tokony ho ora fahafolo tamin’izay.

⁴⁰I Andrea, rahalahin’i Simona Petera, no iray tamin’izy roa lahy, izay nandre ny tenin’i Jaona ka nanaraka an’i Jesosy.

⁴¹Ary izy no nahita an’i Simona rahalahiny aloha, dia hoy izy taminy: Efa nahita ny Mesia, izany hoe ny Kristy*, izahay.

⁴²Dia nitondra azy ho any amin’i Jesosy izy. Nony nibanjina azy Jesosy dia niteny hoe: Ianao no Simona, zanak’i Jaona; ianao dia hantsoina koa hoe Kefasy, izany hoe Petera[2].

⁴³Nony ampitso dia te hiala ho any Galilia Jesosy, ary nahita an’i Filipo Izy ka niteny taminy hoe: Manaraha Ahy.

⁴⁴Ary i Filipo dia avy any Betsaida, tanànan’i Andrea sy i Petera.

⁴⁵I Filipo kosa raha nahita an’i Natanaela dia niteny taminy hoe: Efa hitanay ilay nosoratan’i Mosesy tao amin’ny Lalàna sady nosoratan’ny mpaminany, dia Jesosy, zanak’i Josefa, avy any Nazareta.

⁴⁶Ary hoy i Natanaela taminy: Moa mba misy zava-tsoa toy izany va avy any Nazareta? Dia hoy i Filipo taminy: Andeha hizaha.

⁴⁷Nony nahita an’i Natanaela nanatona Azy Jesosy dia nilaza ny momba azy hoe: Indro ny tena Israelita tsy misy fitaka.

⁴⁸Hoy i Natanaela taminy: Ahoana no ahafantaranao ahy? Dia namaly azy Jesosy hoe: Talohan’ny niantsoan’i Filipo anao dia efa hitako teo ambanin’ny aviavy ianao.

⁴⁹Dia hoy i Natanaela: Raby ô, Ianao no Zanak’Andriamanitra, Ianao no Mpanjakan’ny Israely.

⁵⁰Hoy ny navalin’i Jesosy azy hoe: Moa ny nilazako taminao va fa hitako teo ambanin’ny aviavy ianao no inoanao? Hahita zavatra lehibe noho izany ianao.

⁵¹Ary hoy koa Izy taminy: Lazaiko aminareo marina dia marina tokoa: Ho hitanareo ny lanitra misokatra sy ny anjelin’Andriamanitra miakatra sy midina eo ambonin’ny Zanak’Olona.