Read La Bible en Malgache Jaona 10 Bible Online

Jaona 10 - La Bible en Malgache bible

Jaona 10

¹Lazaiko aminareo marina dia marina tokoa fa izay tsy miditra amin’ny vavahady ho amin’ny valan’ondry fa mananika ny fefy dia mpangalatra sy jiolahy.

²Fa izay miditra amin’ny vavahady no mpiandry ny ondry.

³Ary izy no vohàn’ny mpiandry vavahady; ary ny ondry dia mihaino ny feony; koa izay ondriny tokoa dia antsoiny amin’ny anarany avy ary entiny mivoaka avy tao.

⁴Rehefa mamoaka ny ondriny rehetra izy dia mialoha azy ireo; ary manaraka azy ny ondriny satria mahalala ny feony ireo.

⁵Ny vahiny dia tsy mba harahiny, fa handosirany, satria tsy fantany ny feon’ny vahiny.

⁶Izany fanoharana izany no nataon’i Jesosy taminy, nefa tsy azon’ireo nihaino, izay tiany nolazainy taminy.

⁷Dia hoy indray Jesosy taminy: Lazaiko aminareo marina dia marina tokoa: Izaho no vavahadin’ondry.

⁸Mpangalatra sy jiolahy izay rehetra tonga talohako; fa tsy nihaino azy ny ondry.

⁹Izaho no vavahady; raha Izaho no idiran’ny olona dia hovonjena izy ka hiditra sy hivoaka sady hahazo hanina.

¹⁰Ny mpangalatra dia tsy avy raha tsy hangalatra sy hamono ary handringana; Izaho kosa avy mba hananany fiainana sady hananany be dia be.

¹¹Izaho no Mpiandry tsara; ny Mpiandry tsara dia manolotra ny ainy hamonjy ny ondry.

¹²Ary ny mpikarama, satria tsy mpiandry na tompon’ny ondry izy, koa raha mahita ny amboadia avy, dia mandao ny ondry ka mandositra, ary ny amboadia kosa dia misambotra ny ondry ka mampihahaka azy ireo;

¹³mandositra izy satria mpikarama ka tsy miraharaha ny ondry.

¹⁴Izaho no Mpiandry tsara; ary fantatro ny Ahy sady fantany Aho,

¹⁵dia tahaka ny ahafantaran’ny Ray Ahy sy ny ahafantarako ny Ray; ary Izaho manolotra ny aiko hamonjy ny ondry.

¹⁶Manana ondry hafa izay tsy amin’ity vala ity Aho; ireny koa dia tsy maintsy hoentiko ka hihaino ny feoko; ary ho tonga andiany iray izy rehetra sady iray ihany ny Mpiandry.

¹⁷Izany no itiavan’ny Raiko Ahy satria manolotra ny aiko Aho mba handraisako azy indray.

¹⁸Tsy misy manaisotra ny aiko Amiko, fa ny tenako ihany no manolotra azy. Manana fahefana hanolotra azy Aho ary manana fahefana haka azy indray. Izany didy izany dia azoko tamin’ny Raiko.

¹⁹Ary nisy fisarahana indray teo amin’ny Jiosy* noho izany teny izany.

²⁰Maro tamin’ireo no niteny hoe: Manana demonia* Izy ka efa very saina; nahoana no mihaino Azy ianareo?

²¹Hoy kosa anefa ny sasany: Tsy mba tenin’ny demoniaka izany; moa ny demonia va mahay mampahiratra ny mason’ny jamba?

²²Tonga ny andro firavoravoana tany Jerosalema, dia ilay atao hoe Fitokanana, ary efa ririnina ny andro.

²³Ary Jesosy nitsangantsangana tao amin’ny tempoly teo amin’ny fialofan’i Solomona.

²⁴Dia nitangoronan’ny Jiosy* Izy ka nanontaniany hoe: Ambara-pahoviana no hampisalasalanao anay? Raha Ianao no Kristy* dia lazao marimarina aminay.

²⁵Ary Jesosy namaly azy hoe: Efa nilaza taminareo ihany Aho nefa tsy mino ianareo; ny asa izay ataoko amin’ny anaran’ny Raiko no manambara Ahy.

²⁶Kanefa tsy mino ianareo satria tsy mba isan’ny ondriko.

²⁷Ny ondriko dia mihaino ny feoko, mahalala azy Aho, ary manaraka Ahy izy,

²⁸ary Izaho manome azy fiainana mandrakizay ka tsy ho very mandrakizay izy, ary tsy hisy handrombaka azy amin’ny tanako.

²⁹Ny Raiko izay nanome Ahy dia lehibe noho izy rehetra; ary tsy misy mahay mandrombaka amin’ny tanan’ny Ray.

³⁰Izaho sy ny Ray dia iray ihany.

³¹Dia naka vato indray ny Jiosy hitoraka Azy.

³²Fa hoy Jesosy hoe: Maro ny asa tsara nasehoko taminareo avy tamin’ny Ray; koa ny asa manao ahoana amin’ireny moa no itorahanareo vato Ahy?

³³Namaly Azy ny Jiosy hoe: Tsy asa tsara no itorahanay vato Anao, fa fitenenan-dratsy, satria olona ihany Ianao nefa manao ny tenanao ho Andriamanitra.

³⁴Dia hoy Jesosy hoe: Tsy voasoratra ao amin’ny lalànanareo va hoe: «Hoy aho: Ianareo andriamanitra» (Sal 82.6)?

³⁵Raha ireny izay nanaovana izany tenin’Andriamanitra izany no natao hoe andriamanitra, ary ny Soratra Masina dia tsy azo foanana,

³⁶moa izay nohasinin’ny Ray ka nirahiny ho amin’izao tontolo izao va no ataonareo hoe: Miteny ratsy ianao, satria hoy Aho: Zanak’Andriamanitra Aho?

³⁷Raha tsy manao ny asan’ny Raiko Aho dia aza mino Ahy.

³⁸Fa raha manao ny asany ihany kosa Aho, na tsy mino Ahy aza ianareo, dia minoa ny asa mba ho fantatrareo sy hekenareo fa ny Ray no ato Amiko, ary Izaho ao amin’ny Ray.

³⁹Dia nitady hisambotra Azy indray ny Jiosy; fa niala teo Izy ka tsy voatanany.

⁴⁰Dia lasa nankany andafin’i Jordana indray Jesosy, ho any amin’ilay toerana nanaovan’i Jaona batisa voalohany ka nitoetra tany Izy.

⁴¹Maro no nankeo Aminy ka nilaza hoe: Tsy mba nanao famantarana i Jaona, nefa izay rehetra nolazainy ny amin’ity lehilahy ity dia marina avokoa.

⁴²Ary maro no nino Azy teo.