Read La Bible en Malgache Jaona 11 Bible Online

Jaona 11 - La Bible en Malgache bible

Jaona 11

¹Nisy lehilahy iray narary, dia i Lazarosy avy any Betania, tanànan’i Maria sy i Marta rahavaviny.

²I Maria dia ilay nanosotra menaka manitra ny Tompo sy namaoka ny tongony tamin’ny volon-dohany, ary i Lazarosy anadahiny ity narary ity.

³Nandefa iraka tany amin’i Jesosy izy mirahavavy mba hilaza hoe: Tompoko, indro, marary ilay tianao.

⁴Ary rehefa ren’i Jesosy izany dia hoy Izy: Tsy ho fahafatesana no anton’izany aretina izany, fa ny hampisehoana ny voninahitr’Andriamanitra, mba hankalazana ny Zanak’Andriamanitra.

⁵Ary Jesosy tia an’i Marta sy ny rahavaviny ary i Lazarosy.

⁶Nony ren’i Jesosy fa narary i Lazarosy dia mbola nitoetra roa andro teo amin’izay nitoerany ihany Izy.

⁷Taorianan’izany, vao hoy Izy tamin’ny mpianatra: Andeha isika ho any Jodia* indray.

⁸Hoy ny mpianatra taminy: Raby ô, vao haingana teo no nitadiavan’ny Jiosy* hitora-bato Anao, koa hankany indray va Ianao?

⁹Dia hoy ny navalin’i Jesosy hoe: Tsy roa amby folo va ny ora amin’ny indray andro? Raha misy mandeha amin’ny antoandro dia tsy mba tafintohina izy, fa mahita ny fahazavan’izao tontolo izao.

¹⁰Fa raha misy kosa mandeha amin’ny alina dia ho tafintohina izy satria tsy misy mazava ao aminy.

¹¹Izay no nolazainy; ary taorianan’izany dia hoy Izy taminy: Matory i Lazarosy sakaizantsika; fa handeha hamoha azy Aho.

¹²Dia hoy ny mpianatra Taminy: Tompoko, raha matory izy dia azo vonjena ihany.

¹³Nefa Jesosy tamin’io dia nilaza ny fahafatesan’i Lazarosy; saingy nataon’izy ireo kosa fa ny fialan-tsasatra amin’ny torimaso no nolazainy.

¹⁴Tamin’izay Jesosy vao nilaza mazava taminy hoe: Maty i Lazarosy.

¹⁵Ary faly Aho noho ny aminareo satria tsy tany, mba hinoanareo; fa andeha isika hankany aminy.

¹⁶Dia hoy i Tomasy, izay atao hoe Kambana, tamin’ny mpianatra namany: Andeha koa isika mba hiara-maty aminy.

¹⁷Nony tonga Jesosy dia hitany fa efa nilevina hefarana izy.

¹⁸Ary Betania dia tao akaikin’i Jerosalema, tokony ho dimy amby folo stadio no elanelany.

¹⁹Ary maro tamin’ny Jiosy* no efa tonga teo amin’i Marta sy i Maria mba hitsapa alahelo azy noho ny amin’ny anadahiny.

²⁰Ary i Marta, raha nandre fa tamy Jesosy, dia nandeha nitsena Azy; fa i Maria kosa dia nitoetra tao an-trano.

²¹Ary hoy i Marta tamin’i Jesosy: Tompoko, raha teto Ianao dia tsy maty ny anadahiko.

²²Nefa fantatro fa na dia ankehitriny izao aza, na inona na inona no hangatahinao amin’Andriamanitra, dia homen’Andriamanitra Anao.

²³Hoy Jesosy taminy: Hitsangana ny anadahinao.

²⁴Fa hoy i Marta taminy: Fantatro ihany fa hitsangana izy amin’ny fitsanganan’ny maty amin’ny andro farany.

²⁵Hoy Jesosy taminy: Izaho no fananganana ny maty sy fiainana; izay mino Ahy, na dia maty aza, dia ho velona indray.

²⁶Ary izay rehetra velona ka mino Ahy dia tsy ho faty mandrakizay. Mino izany va ianao?

²⁷Hoy izy Taminy: Eny, Tompoko; mino aho fa Ianao no Kristy*, Zanak’Andriamanitra, ilay ho tonga amin’izao tontolo izao.

²⁸Rehefa nilaza izany izy dia nandeha niantso mangingina an’i Maria rahavaviny ka hoy izy hoe: Tonga ny Mpampianatra ka miantso anao.

²⁹Raha vao nandre izany i Maria dia nitsangana haingana ka nankeo Aminy.

³⁰Nefa tsy mbola tonga tao an-tanàna Jesosy, fa mbola teo amin’ilay toerana nitsenan’i Marta Azy ihany.

³¹Ary ny Jiosy izay tao amin’i Maria tao an-trano ka nitsapa alahelo azy, raha nahita azy nitsangana haingana ka nivoaka avy tao dia nanaraka azy satria nataony fa nankany amin’ny fasana hitomany any izy.

³²Ary i Maria, rehefa tonga teo amin’izay nisy an’i Jesosy ka nahita Azy, dia niankohoka teo amin’ny tongony ka niteny Taminy hoe: Tompoko, raha teto Ianao dia tsy maty ny anadahiko.

³³Ary Jesosy nony nahita azy nitomany sy ny Jiosy izay niaraka taminy nitomany koa dia vonto ny fanahiny ka nangorohoro ny tenany;

³⁴ary hoy Izy: Aiza moa no nandevenanareo azy? Dia hoy ireo Taminy: Tompoko, andeha hizaha.

³⁵Jesosy nitomany.

³⁶Dia hoy ny Jiosy: Akory ity haben’ny fitiavany azy!

³⁷Fa hoy ny sasany: Moa tsy hain’Ilehity izay nampahiratra ny mason’ilay jamba va, ny manao izay tsy ho nahafaty an-dRalehilahy ity?

³⁸Dia vonto indray ny fanahin’i Jesosy ka nankeo amin’ny fasana Izy, ary zohy izany sady nisy vato narindrina teo.

³⁹Hoy Jesosy: Esory ny vato. Hoy i Marta, anabavin’ny maty, Taminy: Tompoko, efa maimbo izy izao, fa efa hefarana izay.

⁴⁰Hoy Jesosy taminy: Tsy voalazako va fa raha hino ianao dia ho hitanao ny voninahitr’Andriamanitra?

⁴¹Dia nesoriny ny vato. Ary Jesosy dia nanandratra ny masony ka niteny hoe: Ray ô, misaotra Anao Aho, fa efa nihaino Ahy Ianao.

⁴²Raha Izaho dia fantatro fa mihaino Ahy mandrakariva Ianao; fa noho ny vahoaka mitsangana manodidina no nilazako izany mba hinoany fa Ianao no naniraka Ahy.

⁴³Rehefa nilaza izany teny izany Izy dia niantso tamin’ny feo mahery hoe: Ry Lazarosy, mivoaha!

⁴⁴Dia nivoaka tao ny maty, ny tanany sy ny tongony dia nisy fehim-paty sady voasarona lambam-paty koa ny tavany. Hoy Jesosy tamin’ny olona: Vahao izy ka avelao handeha.

⁴⁵Ary maro tamin’ny Jiosy*, izay nankeo amin’i Maria ka nahita ireo zavatra nataon’i Jesosy ireo, no nino Azy.

⁴⁶Fa ny sasany tamin’ireo kosa dia lasa nankany amin’ny Fariseo* ka nilaza taminy izay nataon’i Jesosy.

⁴⁷Ary ireo lehiben’ny mpisorona sy ny Fariseo* dia nanangona ny Sinedriona* ka niteny hoe: Ahoana no hataontsika? Fa iny lehilahy iny dia manao famantarana maro.

⁴⁸Raha avelantsika hanao toy izany ihany Izy dia hino Azy avokoa ny olona rehetra; ary ho avy ny Romana ka handrava ny fonenantsika sy ny firenentsika.

⁴⁹Ary ny iray taminy, dia i Kaiafa mpisoronabe, tamin’izany taona izany, dia niteny taminy hoe: Ianareo dia tsy mahalala na inona na inona,

⁵⁰na misaina akory fa tsara ho anareo, raha ny lehilahy iray no ho faty hamonjy ny firenena, mba tsy ho levona avokoa ity firenena ity.

⁵¹Ary tsy niteny izany tamin’ny hevitry ny tenany izy, fa satria Mpisoronabe tamin’izany taona izany izy, dia naminany fa Jesosy ho faty hamonjy ny firenena;

⁵²ary tsy hamonjy io firenena io ihany fa mba hanangona ny zanak’Andriamanitra izay efa niely mba ho tafangona ho iray.

⁵³Koa hatramin’izany andro izany dia nikendry hahafaty Azy ry zareo.

⁵⁴Ary Jesosy tsy nandeha niharihary teny amin’ny Jiosy intsony; fa niala teo Izy nankany amin’ny tany akaikin’ny tany efitra, ho any amin’ny tanàna atao hoe Efraima, ary nitoetra tany Izy mbamin’ny mpianatra.

⁵⁵Ary efa akaiky ny Paska* an’ny Jiosy; ary maro ny avy tany ambanivohitra no niakatra ho any Jerosalema nialoha ny Paska mba hanadio ny tenany.

⁵⁶Dia nitady an’i Jesosy ireo, raha nijanona tao amin’ny tempoly, ka niresaka hoe: Ahoana no hevitrareo? Tsy mba ho tonga amin’ny andro firavoravoana va Izy?

⁵⁷Ary ny lehiben’ny mpisorona sy ny Fariseo dia efa nandidy fa raha misy olona mahalala izay itoerany dia tsy maintsy milaza amin’izy ireo mba hisamborany Azy.