Read La Bible en Malgache Jaona 12 Bible Online

Jaona 12 - La Bible en Malgache bible

Jaona 12

¹Rehefa henemana no sisa tsy hahatongavan’ny Paska, Jesosy, dia tonga tao Betania izay nitoeran’i Lazarosy, ilay natsangany tamin’ny maty.

²Nanao fanasana ho an’i Jesosy tao izy ireo; i Marta no nanompo; fa i Lazarosy no iray tamin’izay niara-nipetraka nihinana taminy.

³Ary rehefa naka menaka manitra nisy narda sady tsara no sarobidy, lanjana iray livatra, i Maria, dia nanosotra ny tongotr’i Jesosy sy namaoka ny tongony tamin’ny volon-dohany; koa feno ny hanitry ny menaka ny trano.

⁴Ary hoy i Jodasy iskariota, iray tamin’ny mpianany, dia ilay efa hamadika Azy:

⁵Nahoana io menaka io no tsy namidy denaria* telonjato ka nomena ny mahantra?

⁶Ary izy no nilaza izany, tsy noho ny fiahiany ny mahantra, fa noho izy mpangalatra sady izy koa no mpitondra ny kitapom-bola ka naka izay tao anatiny.

⁷Dia hoy Jesosy: Avelao izy mba hotehiriziny ho amin’ny andro hanamboarany Ahy halevina.

⁸Fa ny mahantra dia etỳ aminareo mandrakariva; fa Izaho tsy mba ho etỳ aminareo mandrakariva.

⁹Betsaka tamin’ny vahoaka Jiosy* no nahafantatra fa teo Jesosy, ary tonga teo ireo, nefa tsy noho Jesosy ihany fa mba hahita an’i Lazarosy koa, ilay natsangany tamin’ny maty.

¹⁰Fa nikendry hahafaty an’i Lazarosy koa ireo lehiben’ny mpisorona

¹¹satria noho ny aminy no nialan’ny maro tamin’ny Jiosy ka ninoany an’i Jesosy.

¹²Ny ampitson’iny ny vahoaka betsaka, izay tonga ho amin’ny andro firavoravoana, rehefa nahare fa hankany Jerosalema Jesosy,

¹³dia naka sampan-drofia ka nivoaka hitsena Azy sady niantso hoe: Hosana*! Isaorana anie ny Mpanjakan’ny Israely, Ilay avy amin’ny anaran’NY TOMPO (Sal 118.26).

¹⁴Ary Jesosy nahita zana-boriky iray, dia nitaingina azy, araka ny voasoratra hoe:

¹⁵«Aza matahotra, ry Ziona* zanakavavy; indro, avy ny Mpanjakanao mitaingina zana-boriky» (Zak 9.9).

¹⁶Izany zavatra izany dia tsy fantatry ny mpianany tamin’ny voalohany; fa rehefa niditra tamin’ny voninahiny Jesosy, izay vao nahatsiaro izy ireo fa voasoratra hilaza Azy io zavatra io, sady efa nataony taminy izany.

¹⁷Ary nanambara Azy ny vahoaka izay teo Aminy, fony Izy niantso an’i Lazarosy hivoaka avy tao amin’ny fasana ka nanangana azy tamin’ny maty.

¹⁸Izany koa no nitsenan’ny vahoaka Azy satria efa reny fa nanao ilay famantarana iny Izy.

¹⁹Ary tamin’izany ny Fariseo* dia nifampilaza hoe: Hitanareo fa tsy mahefa na inona na inona akory ianareo; indro, lasa manaraka Azy avokoa izao tontolo izao.

²⁰Nisy Grika ny sasany tamin’ireo niakatra hivavaka tamin’ny andro firavoravoana,

²¹ary izy ireo dia nankany amin’i Filipo avy any Betsaida any Galilia, dia nangataka taminy hoe: Tompoko, mba ta hahita an’i Jesosy izahay.

²²Dia lasa nilaza tamin’i Andrea i Filipo; avy eo kosa dia lasa nilaza tamin’i Jesosy i Andrea sy i Filipo.

²³Ary hoy Jesosy: Tonga ny fotoanandro hankalazana ny Zanak’Olona*.

²⁴Lazaiko aminareo marina dia marina tokoa: Raha tsy latsaka ao amin’ny tany ny voam-bary ka maty dia mitoetra foana izy; fa raha maty kosa izy dia hahavokatra be.

²⁵Izay tia ny ainy no mahavery izany; fa izay mankahala ny ainy amin’izao fiainana izao no hitahiry izany ho amin’ny fiainana mandrakizay.

²⁶Raha misy olona manompo Ahy dia aoka izy hanaraka Ahy, ary izay itoerako dia ao koa no hitoeran’ny mpanompoko; raha misy olona manompo Ahy dia hankalaza azy ny Ray.

²⁷Ankehitriny, mangorohoro ny fanahiko; ary inona no holazaiko: Ray ô, vonjeo Aho ho afaka amin’ity ora ity? Nefa izao no niaviako ho amin’ity ora ity;

²⁸Ray ô, mankalazà ny anaranao. Dia nisy feo avy tany an-danitra hoe: Efa nankalaza Azy Aho ary mbola hankalaza Azy indray.

²⁹Ary ny vahoaka izay nijoro teo ka nahare dia niteny hoe: Kotrokorana izany. Hoy ny sasany: Anjely no niteny Taminy.

³⁰Fa hoy Jesosy hoe: Tsy noho ny Amiko no nahatongavan’izany feo izany fa noho ny aminareo.

³¹Tonga ankehitriny ny fitsarana izao tontolo izao; ankehitriny ny andrianan’izao tontolo izao dia horoahina any ivelany.

³²Ary Izaho rehefa hasandratra hiala amin’ny tany dia hitaona ny olona rehetra hanatona Ahy.

³³Izany no nolazainy mba hanambarana ny fomban’ny fahafatesana izay efa hiaretany.

³⁴Dia hoy ny vahoaka Taminy hoe: Efa renay tamin’ny lalàna fa Kristy* dia haharitra mandrakizay; koa ahoana no ilazanao hoe: Tsy maintsy hasandratra ny Zanak’Olona*? Iza moa izany Zanak’Olona izany?

³⁵Dia hoy Jesosy taminy: Mbola kely ihany no itoeran’ny mazava aminareo. Mandehana, raha mbola manana ny mazava ianareo, mba tsy hahatratra anareo ny maizina; fa izay mandeha amin’ny maizina dia tsy mahalala izay alehany.

³⁶Raha mbola manana ny mazava ianareo dia minoa ny mazava mba ho tonga zanaky ny mazava. Rehefa avy nilaza izany Jesosy dia niala Izy ka niery azy ireo.

³⁷Na dia efa nanao ireo famantarana betsaka ireo teo anatrehany aza Izy dia tsy mba nino Azy izy ireo

³⁸mba hahatanteraka ny teny nataon’Isaia mpaminany[4] hoe: «Tompoko, iza no nino ny teny nampitondraina anay? Ary iza no nampisehoana ny sandrin’NY TOMPO?» (Isa 53.1)

³⁹Izany no tsy nahaizany nino, satria hoy koa Isaia:

⁴⁰«Efa nanajamba ny masony sy nanamafy ny fony Izy mba tsy hahita ny masony na hahalala ny fony, dia tsy hibebaka izy ka tsy hahasitrana azy Aho» (Isa 6.10).

⁴¹Izany teny izany no nolazain’Isaia satria nahita ny voninahiny izy ka nilaza Azy.

⁴²Kanefa na dia maro aza ny mpitondra no nino Azy dia tsy nanaiky izy ireo noho ny Fariseo*, fandrao horoahina tsy ho isan’ny ao amin’ny sinagoga*.

⁴³Fa aleon’izy ireo voninahitra avy amin’ny olona toy izay ny voninahitra avy amin’Andriamanitra.

⁴⁴Ary Jesosy niantso hoe: Izay mino Ahy dia tsy Izaho no inoany fa izay naniraka Ahy.

⁴⁵Ary izay mahita Ahy dia mahita izay naniraka Ahy.

⁴⁶Izaho tonga amin’izao tontolo izao ho fahazavana mba tsy hitoetra ao amin’ny maizina izay rehetra mino Ahy.

⁴⁷Raha misy mandre ny teniko ka tsy mitandrina izany, Izaho tsy mitsara azy; fa tsy tonga hitsara izao tontolo izao Aho fa hamonjy izao tontolo izao.

⁴⁸Izay mandà Ahy ka tsy mandray ny teniko dia manana izay mitsara azy: Ny teny izay nolazaiko, izany ihany no hitsara azy amin’ny andro farany,

⁴⁹satria Izaho tsy niteny amin’ny fahefan’ny tenako, fa ny Ray izay naniraka Ahy, Izy no nandidy Ahy ny amin’izay holazaiko sy izay hambarako.

⁵⁰Ary fantatro fa fiainana mandrakizay ny didiny; koa izay lazaiko dia lazaiko araka izay nolazain’ny Ray Tamiko.