Read La Bible en Malgache Jaona 13 Bible Online

Jaona 13 - La Bible en Malgache bible

Jaona 13

¹Talohan’ny andro firavoravoana tamin’ny Paska*, satria fantatr’i Jesosy fa tonga ny fotoana hialany amin’izao tontolo izao ho any amin’ny Ray, ary tia ny Azy izay ao amin’izao tontolo izao Izy, dia tia azy hatramin’ny farany.

²Raha mbola teo amin’ny fisakafoanana hariva izy ireo, ary i Jodasy iskariota, zanak’i Simona, dia efa nomen’ny devoly* saina rahateo mba hamadika Azy,

³sady fantatr’i Jesosy koa fa ny Ray efa nanolotra ny zavatra rehetra ho eo an-tanany, ary Andriamanitra no niaviany, sady Andriamanitra koa no iverenany,

⁴dia nitsangana niala teo am-pisakafoanana Izy ka nametraka ny akanjony ivelany ary naka lamba famaohana ka nisikinany;

⁵avy eo dia nampidina rano tamin’ny koveta Izy ka nanomboka nanasa ny tongotry ny mpianatra sy namaoka azy tamin’ny lamba famaohana izay nisikinany.

⁶Dia nankeo amin’i Simona Petera Izy; fa hoy i Petera Taminy: Tompoko, Ianao va no hanasa ny tongotro?

⁷Dia hoy Jesosy: Izay ataoko dia tsy fantatrao ankehitriny fa ho fantatrao aorianan’izao.

⁸Fa hoy i Petera taminy: Sanatria raha hanasa ny tongotro Ianao. Dia hoy Jesosy hoe: Raha tsy hosasako ianao dia tsy manana anjara Amiko.

⁹Dia hoy i Simona Petera Taminy: Tompoko, tsy ny tongotro ihany ary fa ny tanako sy ny lohako koa.

¹⁰Fa hoy Jesosy taminy: Izay efa nandro dia tsy mila hosasana, afa-tsy ny tongotra ihany, fa efa madio avokoa; ary ianareo dia madio, nefa tsy ianareo rehetra.

¹¹Fa fantany ilay efa hamadika Azy; koa izany no nilazany hoe: Tsy madio avokoa ianareo rehetra.

¹²Rehefa voasasany ny tongony dia nandray ny akanjony ivelany Izy ka nipetraka indray sady niteny taminy hoe: Fantatrareo va izay nataoko taminareo?

¹³Ianareo dia miantso Ahy hoe Mpampianatra sy Tompo; ary marina ny filazanareo fa izany tokoa Aho.

¹⁴Koa raha Izaho, Tompo sy Mpampianatra aza, no nanasa ny tongotrareo, ianareo koa dia mba tokony hifanasa tongotra.

¹⁵Fianarana no nomeko anareo mba hanaovanareo araka izay nataoko taminareo.

¹⁶Lazaiko aminareo marina dia marina tokoa: Ny andevo dia tsy lehibe noho ny tompony, na ny iraka noho izay maniraka azy.

¹⁷Raha fantatrareo izany dia sambatra ianareo raha manao izany.

¹⁸Tsy milaza anareo rehetra Aho; fa fantatro izay nofidiko; fa mba hahatanteraka ny Soratra Masina hoe: «Izay homana ny mofoko no nanainga ny voditongony hamely Ahy» (Sal 41.9).

¹⁹Hatramin’izao dia milaza aminareo Aho, raha tsy mbola tonga izany mba hinoanareo rehefa tonga, fa Izaho no Izy.

²⁰Lazaiko aminareo marina dia marina tokoa: Izay mandray izay hirahiko dia mandray Ahy; ary izay mandray Ahy dia mandray izay naniraka Ahy.

²¹Rehefa nilaza izany Jesosy dia nangorohoro ny fanahiny ka nanambara Izy hoe: Lazaiko aminareo marina dia marina tokoa fa ny iray aminareo no hamadika Ahy.

²²Dia nifampijerijery ny mpianatra ka nieritreritra izay iray nolazainy.

²³Ary nisy mpianatra iray nipetraka nihinana teo anilan’i Jesosy, dia ilay tian’i Jesosy.

²⁴Niantso azy i Simona Petera ka nanontany azy hoe: Iza no lazainy amin’izany.

²⁵Raha mbola nipetraka tahaka izany izy dia niraika ho amin’ny tratran’i Jesosy ka niteny Taminy hoe: Tompoko, iza moa izany?

²⁶Dia namaly Jesosy hoe: Ilay homeko ny sombi-mofo izay hatsoboko no izy. Ary rehefa natsobony ny sombi-mofo dia noraisiny ka nomeny an’i Jodasy, zanak’i Simona iskariota.

²⁷Taorianan’izany no nidiran’i Satana tao aminy, koa hoy Jesosy taminy: Izay ataonao dia ataovy haingana.

²⁸Fa tsy nisy tamin’izay nipetraka nihinana no nahalala ny anton’ny nilazany izany taminy.

²⁹Fa nataon’ny sasany hoe satria i Jodasy no nitondra ny kitapo, no nilazan’i Jesosy taminy hoe: Vidio ny zavatra ilaintsika amin’ny andro firavoravoana na mandehana manome zavatra ho an’ny mahantra.

³⁰Ary rehefa nandray ny sombi-mofo izy dia niala teo niaraka tamin’izay. Ary efa alina ny andro tamin’izay.

³¹Nony efa tafavoaka izy dia hoy Jesosy: Ankehitriny dia efa ankalazaina ny Zanak’Olona; ary Andriamanitra no ankalazaina ao Aminy.

³²Ary Andriamanitra hankalaza Azy amin’ny tenany; eny, hankalaza Azy miaraka amin’izay Izy.

³³Anaka, vetivety foana no sisa hitoerako eto aminareo. Hitady Ahy ianareo, nefa araka ny voalazako tamin’ny Jiosy* hoe: Izay alehako dia tsy ho azonareo aleha, dia toy izany koa no lazaiko aminareo ankehitriny.

³⁴Didy vaovao no omeko anareo dia ny mba hifankatiavanareo; eny, aoka ho tahaka ny nitiavako anareo no mba hifankatiavanareo koa.

³⁵Izany no hahafantaran’ny olona rehetra fa mpianatro ianareo raha mifankatia.

³⁶Hoy i Simona Petera taminy: Tompoko, ho aiza moa Ianao? Dia novalìn’i Jesosy hoe: Izay alehako dia tsy azonao anarahana Ahy ankehitriny, fa hanaraka Ahy ihany ianao rahatrizay.

³⁷Hoy i Petera taminy: Tompoko, nahoana no tsy mahazo manaraka Anao aho ankehitriny? Na ny aiko aza anefa dia hafoiko noho ny Aminao.

³⁸Fa hoy Jesosy: Ny ainao va hafoinao noho ny Amiko? Lazaiko aminao marina dia marina tokoa: Tsy mbola hisy akoho haneno dia handa Ahy intelo ianao.