Read La Bible en Malgache Jaona 18 Bible Online

Jaona 18 - La Bible en Malgache bible

Jaona 18

¹Rehefa voalazan’i Jesosy izany teny izany dia nandeha Izy mbamin’ny mpianany ka nita ny lohasahan-driaka Kidrona; ary nisy saha teo, izay nidiran’Izy sy ny mpianany.

²Ary i Jodasy koa, ilay namadika Azy, dia nahafantatra izany toerana izany satria mpankao matetika Jesosy mbamin’ny mpianany.

³Ary rehefa nahazo miaramila iray toko sy mpiambina avy tamin’ireo lehiben’ny mpisorona sy ny Fariseo* i Jodasy dia nankao nitondra fanilo sy fanala ary fiadiana.

⁴Ary satria fantatr’i Jesosy izay rehetra hanjo Azy dia nanatona azy ireo Izy ka niteny tamin’ireo hoe: Iza moa no tadiavinareo?

⁵Ary novalin’ireo hoe: Jesosy avy any Nazareta. Hoy Jesosy taminy: Izaho no Izy. Ary teo koa i Jodasy, ilay namadika Azy.

⁶Raha vao nilaza taminy Jesosy hoe: Izaho no Izy, dia nihemotra ireo ka lavo tamin’ny tany.

⁷Ary nanontany azy indray Jesosy hoe: Iza moa no tadiavinareo? Dia hoy izy: Jesosy avy any Nazareta.

⁸Dia hoy Jesosy hoe: Efa nolazaiko taminareo fa Izaho no Izy; koa raha Izaho no tadiavinareo dia avelao handeha ireto;

⁹mba hahatanteraka ny teny izay nolazainy hoe: Tsy nasiako very izay nomenao Ahy.

¹⁰Ary nanana sabatra i Simona Petera dia nanatsoaka izany ka nikapa ny sofin’ny mpanompon’ny Mpisoronabe ary nahafaka ny sofiny havanana. Malko no anaran’ilay mpanompo.

¹¹Dia hoy Jesosy tamin’i Petera: Ampidiro amin’ny tranony ny sabatrao; tsy hosotroiko va ny kapoaka nomen’ny Raiko Ahy?

¹²Ary ny miaramila iray toko sy ny mpifehy arivo ary ny mpiambina tamin’ny Jiosy* dia nisambotra an’i Jesosy ka namatotra Azy,

¹³dia nitondra Azy tany amin’i Anasy aloha, fa izy no rafozan’i Kaiafa, Mpisoronabe* tamin’izany taona izany.

¹⁴I Kaiafa dia ilay nanome saina ny Jiosy hoe mahatsara raha maty ny olona iray hamonjena ny firenena.

¹⁵Ary i Simona Petera sy ny mpianatra iray koa dia nanaraka an’i Jesosy; ary fantatry ny Mpisoronabe io mpianatra io, dia niara-niditra tamin’i Jesosy ho ao an-kianjan’ny tranon’ny Mpisoronabe* izy.

¹⁶Fa i Petera dia nijanona teny ivelan’ny vavahady. Dia nivoaka avy tao ilay mpianatra iray izay fantatry ny Mpisoronabe ka niteny tamin’ny mpiandry vavahady, dia nitondra an’i Petera niditra.

¹⁷Ary hoy ny ankizivavy mpiandry vavahady tamin’i Petera: Moa ianao mba isan’ny mpianatr’io lehilahy io? Hoy izy: Tsy izy aho.

¹⁸Ary namelona afon’arina ny mpanompo sy ny mpiandry raharaha ka nijanona namindro teo, fa nangatsiaka ny andro; ary mba nijanona niara-namindro taminy koa i Petera.

¹⁹Ary nanadina an’i Jesosy ny amin’ny mpianany sy ny fampianarany ny Mpisoronabe*.

²⁰Fa Jesosy namaly azy hoe: Izaho niteny miharihary tamin’izao tontolo izao; Izaho nampianatra mandrakariva tao amin’ny sinagoga* sy tao amin’ny tempoly, izay iangonan’ny Jiosy* rehetra; ary tsy nisy nolazaiko tao amin’ny takona;

²¹koa nahoana no manontany Ahy ianao? Ireo izay nihaino no anontanio izay nolazaiko taminy; fa ireo no mahalala izay nolazaiko.

²²Rehefa nilaza izany teny izany Izy dia namely tehamaina an’i Jesosy ny mpiambina iray izay nitsangana teo sady niteny hoe: Izany va no famalinao ny Mpisoronabe?

²³Dia hoy Jesosy: Raha ratsy no nolazaiko, ambarao izay maha ratsy azy; fa raha tsara ihany kosa, nahoana no dia mamely Ahy ianao?

²⁴Ary nasain’i Anasy noentina am-patorana ho any amin’i Kaiafa izay Mpisoronabe Izy.

²⁵Ary nijanona namindro teo i Simona Petera. Dia nisy nilaza taminy hoe: Moa ianao koa mba isan’ny mpianany? Fa nandà izy hoe: Tsy izy aho.

²⁶Hoy ny iray tamin’ny mpanompon’ny Mpisoronabe*, havan’ilay nokapain’i Petera sofina: Tsy efa hitako niaraka Taminy tao anaty saha va ianao?

²⁷Dia nandà indray i Petera; ary niaraka tamin’izay dia nisy akoho naneno.

²⁸Ary noentiny niala tao amin’i Kaiafa ho ao anaty lapa Jesosy; vao maraina ny andro tamin’izay; nefa tsy niditra tao anaty lapa ireo, fandrao ho voaloto satria hihinana ny Paska* izy ireo.

²⁹Ary nivoaka ho eo aminy teo ivelany i Pilato ka niteny hoe: Inona moa no iampanganareo io lehilahy io?

³⁰Dia namaly ireo hoe: Raha tsy mpanao ratsy Izy, tsy mba natolotray anao.

³¹Ary hoy i Pilato taminy: Entonareo Izy ka tsarao araka ny lalànanareo. Hoy ny Jiosy* taminy: Izahay dia tsy manam-pahefana hahafaty olona;

³²izany dia mba hahatanteraka ny tenin’i Jesosy izay nolazainy ka nanambarany ny fomban’ny fahafatesana izay efa hiaretany.

³³Niditra tao anaty lapa indray i Pilato, dia niantso an’i Jesosy ka niteny Taminy hoe: Ianao va no Mpanjakan’ny Jiosy?

³⁴Dia novalin’i Jesosy hoe: Hevitrao ihany va no ilazanao izany sa nisy hafa nilaza Ahy taminao?

³⁵Namaly i Pilato hoe: Moa Jiosy va aho? Ny firenenao sy ireo lehiben’ny mpisorona no nanolotra Anao tamiko; inona moa no nataonao?

³⁶Hoy Jesosy hoe: Ny fanjakako dia tsy avy amin’izao tontolo izao; fa raha mba avy amin’izao tontolo izao ny fanjakako dia ho niady ny mpanompoko mba tsy ho voatolotra tamin’ny Jiosy Aho; nefa amin’izao fotoana izao tsy avy amin’izany ny fanjakako.

³⁷Ary hoy i Pilato taminy: Mpanjaka ary va Ianao? Dia namaly Jesosy hoe: Voalazanao fa mpanjaka Aho. Izao no nahaterahako, ary izao no niaviako amin’izao tontolo izao, dia ny hanambara ny marina. Izay rehetra avy amin’ny marina dia mihaino ny feoko.

³⁸Hoy Pilato taminy: Inona ny marina? Rehefa avy nanontany izany izy dia nivoaka nankeo amin’ny Jiosy* indray ka niteny taminy hoe: Tsy hitako izay helony na dia kely akory aza.

³⁹Fa misy fomba fanaonareo amin’ny Paska* dia ny hanafahako olona iray ho anareo; koa tianareo va raha hafahako ho anareo ny Mpanjakan’ny Jiosy*?

⁴⁰Nefa ireo niantso indray hoe: Tsy Ilehio, fa i Barabasy; kanefa i Barabasy dia jiolahy.