Read La Bible en Malgache Jaona 2 Bible Online

Jaona 2 - La Bible en Malgache bible

Jaona 2

¹Tamin’ny andro fahatelo dia nisy fampakaram-bady tao Kana any Galilia; ary tao ny renin’i Jesosy.

²Ary Jesosy sy ny mpianany koa dia nasaina ho ao amin’izany fampakaram-bady izany.

³Ary rehefa lany ny divay dia hoy ny renin’i Jesosy Taminy: Tsy manana divay izy.

⁴Hoy Jesosy taminy: Ravehivavy, moa mifaninona akory Izaho sy ianao? Tsy mbola tonga ny fotoanandroko.

⁵Fa hoy ny reniny tamin’ny mpanompo: Ataovy izay asainy ataonareo.

⁶Ary nisy siny vato enina mahalany rano indroa na intelon’ny famarana[3] avy, nipetraka teo ho fanadiovana, araka ny fanaon’ny Jiosy*.

⁷Dia hoy Jesosy taminy: Fenoy rano ny siny. Dia nofenoiny hatramin’ny molony.

⁸Ary hoy Jesosy taminy: Tovozy amin’izao ka ento ho eo amin’ny mpandahatra ny fanasana. Dia noentiny izany.

⁹Nony nanandrana ny rano tonga divay ny mpandahatra ny fanasana, nefa tsy nahalala izay niaviany, fa ny mpanompo izay nanovo ny rano ihany no nahalala izany, dia niantso ny mpampakatra izy

¹⁰ka niteny taminy hoe: Araka ny fanaon’ny olona dia ny divay tsara aloha no arosony; fa rehefa mitady ho mamo ny olona dia izay vao ny ratsiratsy kokoa; fa ianao kosa dia nitahiry ny divay tsara ambaraka ankehitriny.

¹¹Izany no nataon’i Jesosy tao Kana any Galilia ho voaloham-pamantarana. Nasehony ny voninahiny, ary nino Azy ny mpianany.

¹²Rehefa afaka izany dia nidina nankany Kapernaomy Jesosy sy ny reniny ary ny rahalahiny mbamin’ny mpianany; nefa tsy dia nitoetra ela tany izy ireo.

¹³Nony akaiky ny Paska an’ny Jiosy* dia niakatra tany Jerosalema Jesosy.

¹⁴Ary hitany nipetraka tao amin’ny tempoly ireo mpivarotra omby sy ondry ary voromailala, tao koa ireo mpanakalo vola;

¹⁵dia nanao kotopia kofehy Izy ka nandroaka azy rehetra hiala tao amin’ny tempoly, na ny ondry na ny omby, ary naparitany ny volan’ny mpanakalo vola sady nazerany ny latabatra;

¹⁶dia hoy Izy tamin’ny mpivarotra ny voromailala: Ento mivoaka any ireto zavatra ireto; aza ataonareo trano fivarotana ny tranon’ny Raiko.

¹⁷Ary tsaroan’ny mpianany fa voasoratra hoe: «Ny firehetako ny amin’ny tranonao no haharìtra aina ahy» (Sal 69.9).

¹⁸Fa hoy ny Jiosy Taminy: Inona no famantarana asehonao aminay no manao izao zavatra izao Ianao?

¹⁹Jesosy namaly azy ireo hoe: Ravao ity tempoly ity, fa ao anatin’ny hateloana dia hatsangako indray.

²⁰Nefa hoy ny Jiosy: Nandritra ny enina amby efapolo taona no efa nananganana ity tempoly ity, koa Ianao va hahatsangana azy amin’ny hateloana?

²¹Ny tenany anefa no tempoly nolazainy.

²²Koa rehefa nitsangana tamin’ny maty Izy dia tsaroan’ny mpianany fa efa nilaza izany Izy; ary nino ny Soratra Masina sy ny teny izay nolazain’i Jesosy izy ireo.

²³Nony tao Jerosalema Jesosy tamin’ny Paska, izany hoe tamin’ny andro firavoravoana, dia maro no nino ny anarany raha nahita ny famantarana izay nataony.

²⁴Nefa Jesosy tsy natoky azy satria fantany avokoa ny olona rehetra;

²⁵ary tsy nitady olona hanambara olona Izy; fa ny tenany no nahalala izay tao am-pon’ny olona.