Read La Bible en Malgache Jaona 20 Bible Online

Jaona 20 - La Bible en Malgache bible

Jaona 20

¹Tamin’ny andro voalohany amin’ny herinandro dia nandeha vao maraina mbola maizimaizina hankany amin’ny fasana i Maria Magdalena ka nahita ny vato voaisotra tamin’ny fasana.

²Dia nihazakazaka nankany amin’i Simona Petera sy ilay mpianatra tian’i Jesosy izy ka niteny tamin’ireo hoe: Nalain’olona tao am-pasana ny Tompo, koa tsy fantatray izay nametrahany Azy.

³Dia nandeha i Petera sy ilay mpianatra iray ka nankany amin’ny fasana.

⁴Ary niara-nihazakazaka izy roa lahy; ary ilay mpianatra iray dia nihazakazaka nihoatra an’i Petera ka tonga taloha tao amin’ny fasana.

⁵Nony niondrika nitsirika izy dia nahita ny lambam-paty nipetraka teo, nefa tsy niditra tao izy.

⁶Ary avy koa i Simona Petera nanaraka azy dia niditra tao am-pasana ka nijery ny lambam-paty nipetraka teo,

⁷ary tsy mba nipetraka teo amin’ny lambam-paty ny lamba izay nafehy ny lohany fa voavalona mitokana.

⁸Tamin’izay dia niditra koa ilay mpianatra iray izay tonga taloha teo amin’ny fasana ary nahita ka nino.

⁹Tsy mbola fantany ny Soratra Masina fa tsy maintsy hitsangana amin’ny maty Jesosy.

¹⁰Dia lasa indray ny mpianatra nody tany aminy.

¹¹Fa nijanona nitomany teo ivelan’ny fasana i Maria; ary raha mbola nitomany izy dia niondrika nitsirika ny tao am-pasana

¹²ka nahita anjely roa nitafy lamba fotsy nipetraka teo, ny iray dia teo an-doha tamin’ilay nandrian’ny fatin’i Jesosy ary ny iray dia teo an-tongotra.

¹³Ary hoy ireo taminy: Ravehivavy, nahoana ianao no mitomany? Dia hoy izy taminy: Satria nalain’olona ny Tompoko ka tsy fantatro izay nametrahany Azy.

¹⁴Rehefa nilaza izany izy dia nitodika ka nahita an’i Jesosy nitsangana teo, nefa tsy fantany ho Jesosy Izy.

¹⁵Hoy Jesosy taminy: Ravehivavy, nahoana ianao no mitomany? Iza no tadiavinao? Nataony fa mpiandry saha Izy ka hoy izy Taminy: Tompoko, raha Ianao no naka Azy teto, lazao amiko izay nametrahanao Azy, fa izaho no haka Azy any.

¹⁶Hoy Jesosy taminy: Ry Maria! Dia nitodika izy ka niteny Taminy tamin’ny teny hebreo hoe Rabonỳ! Izany hoe: Mpampianatra ô.

¹⁷Hoy Jesosy taminy: Aza manendry Ahy; fa tsy mbola niakatra tany amin’ny Ray Aho; fa mandehana mankany amin’ny rahalahiko ka lazao aminy hoe: Miakatra ho any amin’ny Raiko sy ny Rainareo Aho ary ho any amin’Andriamanitro sy Andriamanitrareo.

¹⁸Dia tonga i Maria Magdalena ka nilaza tamin’ny mpianatra hoe: Efa nahita ny Tompo aho sady izany teny izany no nolazainy tamiko.

¹⁹Nony harivan’ilay andro voalohany amin’ny herinandro, raha voarindrina ny varavaran’ny toerana izay niangonan’ny mpianatra, noho ny fahatahorany ny Jiosy*, dia tonga Jesosy ka nitsangana teo afovoany sady niteny taminy hoe: Fiadanana ho anareo!

²⁰Rehefa nilaza izany Izy dia nasehony azy ny tanany sy ny lanivoany. Dia faly ny mpianatra raha nahita ny Tompo.

²¹Ary hoy indray Jesosy taminy: Fiadanana ho anareo; tahaka ny nanirahan’ny Ray Ahy no anirahako anareo kosa.

²²Rehefa nilaza izany Izy dia nanisy fofonaina ka hoy Izy taminy: Raiso ny Fanahy Masina;

²³na helok’iza na helok’iza no avelanareo dia voavela izany; ary na an’iza na an’iza kosa no tsy avelanareo dia tsy voavela izany.

²⁴Fa i Tomasy, iray tamin’ny roa amby folo lahy, ilay antsoina hoe Kambana, dia tsy mba teo amin’izy ireo raha tonga Jesosy.

²⁵Dia hoy ny mpianatra sasany taminy: Efa nahita ny Tompo izahay. Fa hoy kosa izy: Raha tsy hitako eo amin’ny tanany ny holatra navelan’ny fantsika ka atehiko eo amin’ny holatra navelan’ny fantsika ny rantsan-tanako, ary ataoko eo amin’ny lanivoany koa ny tanako dia tsy mba hino aho.

²⁶Nony afaka havaloana dia tafangona teo indray ny mpianany ary teo koa i Tomasy. Dia tonga Jesosy, rehefa voarindrina ny varavarana, ka nitsangana teo afovoany sady niteny hoe: Fiadanana ho anareo!

²⁷Ary hoy Izy tamin’i Tomasy: Atehefo eto ny rantsantananao ka jereo ny tanako; ary atehefo eto koa ny tananao ka ataovy amin’ny lanivoako; ary aza ho isan’izay tsy mino fa minoa.

²⁸Dia namaly i Tomasy hoe: Tompoko sy Andriamanitro!

²⁹Hoy Jesosy taminy: Satria nahita Ahy ianao dia nino; sambatra kosa izay tsy nahita nefa mino.

³⁰Ary nisy famantarana maro hafa koa nataon’i Jesosy teo imason’ny mpianatra, izay tsy voasoratra amin’ity boky ity;

³¹fa voasoratra izao mba hinoanareo fa Jesosy no Kristy*, Zanak’Andriamanitra, ary mba hanananareo fiainana amin’ny anarany, raha mino ianareo.