Read La Bible en Malgache Jaona 3 Bible Online

Jaona 3 - La Bible en Malgache bible

Jaona 3

¹Nisy Fariseo* iray antsoina hoe Nikodemosy, mpanapaka teo amin’ny Jiosy*.

²Nankao amin’i Jesosy izy nony alina ka niteny Taminy hoe: Raby ô, fantatray fa mpampianatra avy amin’Andriamanitra Ianao; fa tsy misy olona mahay manao izao famantarana ataonao izao raha tsy Andriamanitra no momba azy.

³Hoy ny navalin’i Jesosy azy hoe: Lazaiko aminao marina dia marina tokoa: Raha tsy ateraka indray ny olona dia tsy mahazo mahita ny fanjakan’Andriamanitra.

⁴Hoy i Nikodemosy Taminy: Hataon’ny olona ahoana no hateraka rehefa lehibe? Moa mahazo miditra any an-kibon’ny reniny indray va izy ka hateraka?

⁵Hoy Jesosy hoe: Lazaiko aminao marina dia marina tokoa: Raha misy olona tsy ateraky ny rano sy ny Fanahy dia tsy mahazo miditra amin’ny fanjakan’Andriamanitra izy.

⁶Izay ateraky ny nofo dia nofo, ary izay ateraky ny Fanahy dia fanahy.

⁷Aza gaga noho ny nilazako taminao hoe: Tsy maintsy hateraka indray ianareo.

⁸Ny rivotra dia mitsoka any amin’izay tiany, ary renao ny feony, nefa tsy fantatrao izay iaviany na izay alehany, dia tahaka izany koa izay rehetra ateraky ny Fanahy.

⁹Ary hoy i Nikodemosy: Hatao ahoana no hahatanteraka izany zavatra izany?

¹⁰Hoy i Jesosy namaly azy: Ianao va no mpampianatra ny Israely ka tsy mahalala izany zavatra izany?

¹¹Lazaiko aminao marina dia marina tokoa: Izay fantatray no lazainay ary izay hitanay no ambaranay; nefa ny fanambarànay tsy raisinareo.

¹²Raha ny zavatra etỳ an-tany aza no nolazaiko taminareo ka tsy inoanareo, ahoana no hinoanareo, raha milaza aminareo ny zavatra any an-danitra Aho?

¹³Tsy nisy niakatra ho any an-danitra, afa-tsy ilay nidina avy tany an-danitra, dia ny Zanak’Olona* izay any an-danitra.

¹⁴Ary tahaka ny nanandratan’i Mosesy ny menarana tany an-tany efitra no tsy maintsy hanandratana ny Zanak’Olona

¹⁵mba hanana fiainana mandrakizay izay rehetra mino Azy.

¹⁶Fa toy izao no nitiavan’Andriamanitra izao tontolo izao: Nomeny ny Zanany Lahitokana mba tsy ho very izay rehetra mino Azy fa hanana fiainana mandrakizay.

¹⁷Fa tsy naniraka ny Zanaka ho amin’izao tontolo izao Andriamanitra mba hitsara izao tontolo izao fa mba hamonjy izao tontolo izao.

¹⁸Izay mino Azy dia tsy hotsaraina; fa izay tsy mino kosa dia efa voatsara rahateo satria tsy nino ny anaran’ny Zanakalahitokan’Andriamanitra izy.

¹⁹Ary izao no fitsarana: Tonga eto amin’izao tontolo izao ny mazava, nefa aleon’ny olona ny maizina toy izay ny mazava satria ratsy ny asany.

²⁰Fa izay rehetra manao ny ratsy dia mankahala ny mazava sady tsy manatona ny mazava, fandrao hita miharihary ny asany.

²¹Fa izay manao ny marina kosa dia manatona ny mazava, mba haseho ny asany, satria atao ao amin’Andriamanitra izany.

²²Taorianan’izany dia tonga tany amin’ny tany Jodia* Jesosy sy ny mpianany; ary niara-nitoetra taminy tao Izy sady nanao batisa.

²³Ary i Jaona koa dia nanao batisa tao Ainona, akaikin’i Saleima, satria be rano tao; dia nankany ny olona ka nataony batisa

²⁴satria tsy mbola natao tao an-tranomaizina i Jaona.

²⁵Ary nisy nifandiran’ny mpianatr’i Jaona tamin’ny Jiosy* iray ny amin’ny fanadiovana.

²⁶Ary tonga tany amin’i Jaona ny mpianany ka nilaza taminy hoe: Raby ô, ilay tany aminao, tany andafin’i Jordana, izay nambaranao, indro manao batisa Izy, ary ny olona rehetra dia manatona Azy.

²⁷Dia hoy i Jaona hoe: Tsy misy olona mahay mandray na inona na inona, raha tsy nomena azy avy any an-danitra izany.

²⁸Ianareo no vavolombeloko, fa hoy aho: Tsy izaho no Kristy*, fa nirahina hialoha Azy aho.

²⁹Izay manana ny ampakarina no mpampakatra; fa ny sakaizan’ny mpampakatra, izay mitsangana sy mihaino azy, dia mifaly indrindra noho ny feon’ny mpampakatra; ary efa tanteraka izany fifaliako izany.

³⁰Izy tsy maintsy mitombo fa izaho kosa dia tsy maintsy mihena.

³¹Izay avy any ambony dia ambonin’ny rehetra; ary izay avy amin’ny tany dia avy amin’ny tany, koa ny momba ny etỳ an-tany ihany no lazainy; izay avy any an-danitra dia ambonin’izy rehetra;

³²koa izay hitany sy reny no ambarany; ary tsy misy mandray ny fanambaràny.

³³Izay mandray ny fanambaràny dia manisy tombo-kase fa marina Andriamanitra.

³⁴Fa izay nirahin’Andriamanitra dia milaza ny teniny; satria tsy misy fetra ny fanomezan’Andriamanitra ny Fanahy.

³⁵Ny Ray tia ny Zanaka ka efa nanolotra ny zavatra rehetra ho eo an-tanany.

³⁶Izay mino ny Zanaka no manana fiainana mandrakizay; fa izay tsy mino ny Zanaka kosa dia tsy hahita fiainana, fa ny fahatezeran’Andriamanitra no mitoetra eo aminy.