Read La Bible en Malgache Jaona 4 Bible Online

Jaona 4 - La Bible en Malgache bible

Jaona 4

¹Tamin’izay, rehefa fantatr’i Jesosy fa ny Fariseo* efa nahare hoe: Jesosy mahazo mpianatra maro sy nanao batisa be noho i Jaona,

²kanefa tsy Jesosy tenany no nanao batisa fa ny mpianany,

³dia niala tany Jodia* Izy ka nankany Galilia indray.

⁴Ary tsy maintsy namakivaky an’i Samaria Izy.

⁵Tonga tao an-tanàna iray any Samaria, izay atao hoe Sikara, Jesosy; izy io dia akaikin’ny tany izay nomen’i Jakoba ho an’i Josefa zanany.

⁶Ary teo ilay fantsakan’i Jakoba. Koa satria sasatra tamin’ny nalehany Jesosy dia nipetraka teo am-pantsakana, rehefa tokony ho tamin’ny ora fahenina.

⁷Ary nisy vehivavy samaritana* iray avy hantsaka rano; dia hoy Jesosy taminy: Omeo Aho hosotroiko.

⁸Fa efa lasa nankany an-tanàna hividy hanina ny mpianany.

⁹Fa hoy Ravehivavy samaritana Taminy: Jiosy* Ianao ka nahoana no mangataka amiko rano hosotroina nefa aho vehivavy samaritana? Fa ny Jiosy dia tsy manan-draharaha amin’ny Samaritana.

¹⁰Ary hoy Jesosy: Raha fantatrao ny fanomezan’Andriamanitra sy izay miteny aminao hoe: Omeo Aho hosotroiko dia ianao no ho nangataka Taminy ka nomeny rano velona.

¹¹Hoy Ravehivavy taminy: Tompoko, tsy manana fanovozana Ianao, sady lalina ny fantsakana; koa avy aiza no hahazoanao izany rano velona izany?

¹²Ianao va lehibe noho i Jakoba razantsika izay nanome anay ity fantsakana ity, sady izy sy ny zanany mbamin’ny bibiny no nisotro teto?

¹³Fa Jesosy namaly azy hoe: Izay rehetra misotro ity rano ity dia mbola hangetaheta indray;

¹⁴fa na iza na iza no misotro ny rano izay homeko azy dia tsy hangetaheta mandrakizay; satria ny rano izay homeko azy dia ho loharano miboiboika ao aminy ho fiainana mandrakizay.

¹⁵Dia hoy Ravehivavy Taminy: Tompoko, omeo izany rano izany aho mba tsy hangetaheta na hanketo hantsaka intsony.

¹⁶Ary hoy Jesosy taminy: Andeha ary antsoy ny vadinao dia mankanesa atỳ.

¹⁷Namaly Azy Ravehivavy hoe: Tsy manambady aho. Hoy Jesosy taminy: Marina ihany izay nolazainao hoe: Tsy manambady aho;

¹⁸fa efa nanambady indimy ianao sady tsy vadinao ilay itoeranao ankehitriny; marina izany voalazanao izany.

¹⁹Hoy Ravehivavy taminy: Tompoko, hitako fa mpaminany ianao.

²⁰Ny razanay dia nivavaka teto amin’ity tendrombohitra ity; ianareo anefa dia milaza fa any Jerosalema ihany no tokony hivavahana.

²¹Hoy Jesosy taminy: Ravehivavy, minoa Ahy, fa avy ny andro ka tsy amin’ity tendrombohitra ity, na any Jerosalema aza, no hivavahanareo amin’ny Ray.

²²Ianareo dia mivavaka amin’izay tsy fantatrareo; izahay kosa dia mivavaka amin’izay fantatray satria avy amin’ny Jiosy ny famonjena.

²³Fa avy ny fotoana sady tonga ankehitriny, raha ny tena mpivavaka hivavaka amin’ny Ray amin’ny fanahy sy ny fahamarinana; satria ny Ray koa mitady ny mpivavaka Aminy ho tahaka izany.

²⁴Andriamanitra dia Fanahy; ary izay mivavaka Aminy dia tsy maintsy mivavaka amin’ny fanahy sy ny fahamarinana.

²⁵Dia hoy Ravehivavy taminy: Fantatro fa ho avy ny Mesia, ilay atao hoe Kristy*; koa rehefa tonga Izy dia hambarany amintsika ny zavatra rehetra.

²⁶Hoy Jesosy taminy: Izaho izay miresaka aminao no Izy.

²⁷Tamin’izay dia tonga ny mpianany ka gaga satria vehivavy no niresahany; nefa tsy nisy nahateny hoe: Inona no tadiavinao? Na hoe: Nahoana no miresaka aminy Ianao?

²⁸Dia nandao ny sininy Ravehivavy ka nankany an-tanàna ary nilaza tamin’ny olona hoe:

²⁹Andeha isika hizaha lehilahy iray, izay nilaza tamiko ny nataoko rehetra; izao angaha no Kristy!

³⁰Dia nivoaka avy tao an-tanàna ny olona ka nankeo amin’i Jesosy.

³¹Nandritra izany fotoana izany kosa dia niangavy Azy ny mpianany hoe: Hano, Raby ô.

³²Fa hoy Jesosy taminy: Izaho manan-kanina izay tsy fantatrareo.

³³Dia niresaka ny mpianatra hoe: Nisy olona nitondra zavatra hohaniny va re?

³⁴Hoy Jesosy taminy: Ny haniko dia ny manao ny sitrapon’izay naniraka Ahy sy ny mahavita ny asany.

³⁵Moa tsy ianareo va no milaza hoe: Efa-bolana no sisa dia ho tonga ny fararano? Indro, lazaiko aminareo: Atopazy ny masonareo ka jereo, fa efa masaka sahady ho amin’ny fijinjana ny eny an-tsaha.

³⁶Ary izay mijinja dia mandray karama ka mamory vokatra ho amin’ny fiainana mandrakizay mba hiara-mifaly ny mpamafy sy ny mpijinja.

³⁷Ary amin’izany dia marina ilay teny hoe: Mamafy ny iray, mijinja kosa ny iray.

³⁸Izaho naniraka anareo hijinja izay tsy nisasaranareo; olon-kafa no nisasatra, fa ianareo kosa no niditra teo amin’izay nisasarany.

³⁹Maro ny Samaritana avy tao amin’izany tanàna izany no nino an’i Jesosy noho ny filazan-dRavehivavy izay nanambara hoe: Nolazainy tamiko avokoa izay rehetra nataoko.

⁴⁰Rehefa nanatona Azy ny Samaritana dia nangataka Azy hitoetra tao aminy; koa nitoetra tao roa andro Izy.

⁴¹Ary maro koa no nino noho ny teniny

⁴²ka nilaza tamin-dRavehivavy hoe: Tsy noho ny filazanao ihany no inoanay, fa ny tenanay no mandre ka fantatray fa Izy tokoa no Mpamonjy izao tontolo izao.

⁴³Rehefa afaka ny roa andro dia niala tao Jesosy ka nankany Galilia.

⁴⁴Fa Jesosy tenany no nanambara fa tsy misy mpaminany omen-kaja ao amin’ny taniny.

⁴⁵Koa rehefa tonga tany Galilia Izy dia nandray Azy ny Galiliana satria efa hitany izay rehetra nataony tany Jerosalema tamin’ny andro firavoravoana; fa mba niakatra tamin’ny andro firavoravoana koa izy ireo.

⁴⁶Ary tonga tany Kana any Galilia indray Jesosy, dia tany amin’ilay nampodiany ny rano ho divay. Nisy tandapa iray tany Kapernaomy izay nanana zanakalahy narary.

⁴⁷Rehefa nahare izy fa Jesosy efa tonga tany Galilia avy tany Jodia* dia nankany Aminy izy ka nangataka Azy mba hidina any aminy sy hanasitrana ny zanany izay efa ho faty.

⁴⁸Dia hoy Jesosy taminy: Raha tsy mahita famantarana sy fahagagana ianareo dia tsy mba hety hino mihitsy.

⁴⁹Hoy ilay tandapa taminy: Tompoko, midìna re dieny tsy mbola maty ny zanako.

⁵⁰Hoy Jesosy taminy: Andeha mody; velona ny zanakao. Ary nino ny teny izay nolazain’i Jesosy taminy Ralehilahy ka lasa nody.

⁵¹Nony nidina izy dia nitsena azy ireo mpanompony ka nilaza fa velona ny zanany.

⁵²Ary nanontany azy ny ora izay nahasitranany izy. Dia hoy ireo taminy: Omaly tamin’ny ora fahafito no nialan’ny tazo taminy.

⁵³Koa fantatry ny rainy fa tamin’izay indrindra no ora nitenenan’i Jesosy taminy hoe: Velona ny zanakao. Dia nino izy mbamin’ny ankohonany rehetra.

⁵⁴Izany no famantarana faharoa nataon’i Jesosy, fony Izy tonga tany Galilia avy tany Jodia.