Read La Bible en Malgache Jaona 6 Bible Online

Jaona 6 - La Bible en Malgache bible

Jaona 6

¹Taorianan’izany dia lasa Jesosy nita ny ranomasin’i Galilia, dia ny ranomasin’i Tiberiasy izany.

²Ary nisy vahoaka betsaka nanaraka Azy noho ny nahitany ny famantarana izay efa nataony tamin’ny marary.

³Ary Jesosy niakatra tao an-tendrombohitra, dia nipetraka tao Izy mbamin’ny mpianany.

⁴Fa efa akaiky ny Paska*, ilay andro firavoravoan’ny Jiosy*.

⁵Ary Jesosy nanopy ny masony ka nahita fa nisy vahoaka betsaka nanatona Azy dia hoy Izy tamin’i Filipo: Aiza no hividianantsika mofo hohanin’ireo?

⁶Nataony izany mba hizahany toetra azy; fa Izy nahalala ihany izay efa hataony.

⁷Dia namaly Azy i Filipo hoe: Na dia mofo vidìna amin’ny denaria* roanjato aza tsy ho ampy azy rehetra hananany kely avy.

⁸Ny mpianany iray, i Andrea, rahalahin’i Simona Petera, dia nilaza taminy hoe:

⁹Misy zazalahy manana mofo varimbazaha dimy sy hazandrano madinika roa atỳ, fa ho ampy inona moa izany amin’izao olona betsaka izao?

¹⁰Fa hoy Jesosy: Asaivo mipetraka ny olona. Ary nisy ahitra be teo. Dia nipetraka ireo ka tokony ho dimy arivo ny isan’ny lehilahy.

¹¹Dia nandray ny mofo Jesosy; ary rehefa nisaotra Izy dia nizara izany tamin’izay nipetraka hihinana; ary ny hazandrano koa dia araka izay nilainy.

¹²Rehefa voky ny olona dia hoy Jesosy tamin’ny mpianany: Angony ny sisa tsy lany mba tsy hisy ho very.

¹³Dia nangoniny ka nahafeno harona roa amby folo ny sombintsombin’ny mofo varimbazaha dimy, izay ambiny tsy lanin’ny mpihinana.

¹⁴Ary hoy ireny olona ireny, rehefa nahita ny famantarana izay nataon’i Jesosy: Ity tokoa no ilay Mpaminany izay tonga eto amin’izao tontolo izao.

¹⁵Rehefa fantatr’i Jesosy fa efa ho avy ny olona haka Azy an-keriny hataony mpanjaka dia lasa niala indray Izy irery nankany an-tendrombohitra.

¹⁶Rehefa hariva ny andro dia nidina ho eny amin’ny ranomasina ny mpianany.

¹⁷Niondrana an-tsambokely izy ireo dia nita ny ranomasina nankany Kapernaomy. Efa maizina sahady ny andro tamin’izay nefa Jesosy tsy mbola tonga teny aminy.

¹⁸Ary nanonja be ny ranomasina, fa mafy ny fifofofofon’ny rivotra.

¹⁹Rehefa nivoy tokony ho dimy amby roapolo na telopolo stadio* izy ireo dia nahita an’i Jesosy nitsangantsangana teny ambonin’ny ranomasina ary nanakaiky ny sambokely; dia natahotra izy ireo.

²⁰Fa hoy Jesosy taminy: Izaho ihany ity; aza matahotra.

²¹Dia ta handray Azy ho eo an-tsambokely izy ireo; ary niaraka tamin’izay ny sambokely dia tonga tamin’ny tany izay nalehany.

²²Nony ampitson’iny, ny vahoaka izay nijanona teny ampitan’ny ranomasina dia nahita fa tsy nisy sambokely hafa teo afa-tsy iray ihany, ary Jesosy tsy mba niara-niondrana an-tsambokely tamin’ny mpianany, fa ny mpianany ihany no nandeha,

²³kanefa nisy sambokely hafa avy tany Tiberiasy tonga teo akaikin’ilay tany nihinanany ny mofo, rehefa nisaotra ny Tompo,

²⁴koa nony hitan’ny vahoaka fa tsy teo Jesosy, na ny mpianany, dia niondrana an-tsambokely izy ireo ka nankany Kapernaomy mba hitady an’i Jesosy.

²⁵Rehefa nahita Azy teny ampitan’ny ranomasina izy ireo dia niteny Taminy hoe: Raby ô, oviana no tonga teto Ianao?

²⁶Dia hoy Jesosy hoe: Lazaiko aminareo marina dia marina tokoa: Mitady Ahy ianareo, nefa tsy noho ny nahitanareo famantarana, fa noho ny nihinananareo ny mofo ka voky.

²⁷Aza miasa hahazo ny hanina mety ho levona, fa ny hanina izay maharitra ho fiainana mandrakizay, izay homen’ny Zanak’Olona* anareo; fa Izy no nasian’Andriamanitra Ray tombo-kase.

²⁸Dia hoy ireo taminy: Inona no hataonay mba hiasanay ny asan’Andriamanitra?

²⁹Dia novalin’i Jesosy hoe: Izao no asan’Andriamanitra, dia ny hinoanareo Izay nirahiny.

³⁰Dia hoy ireo taminy: Inona ary no famantarana ataonao mba ho hitanay ka hinoanay Anao? Inona moa no asa ataonao?

³¹Ny razantsika dia nihinana ny mana tany an-tany efitra, araka ny voasoratra hoe: «Mofo avy tany an-danitra no nomeny azy hohaniny» (Sal 78.24).

³²Dia hoy Jesosy taminy: Lazaiko aminareo marina dia marina tokoa: Tsy i Mosesy no nanome anareo ny mofo avy tany an-danitra fa ny Raiko no manome anareo ny tena mofo avy any an-danitra.

³³Fa ny mofon’Andriamanitra dia ilay midina avy any an-danitra ka manome fiainana ho an’izao tontolo izao.

³⁴Dia hoy ireo Taminy: Tompo ô, omeo anay mandrakariva izany mofo izany.

³⁵Hoy Jesosy taminy: Izaho no mofon’aina; izay manatona Ahy tsy mba ho noana ary izay mino Ahy dia tsy mba hangetaheta intsony.

³⁶Efa nolazaiko taminareo fa nahita Ahy ihany ianareo nefa tsy mino.

³⁷Izay rehetra omen’ny Raiko Ahy no hanatona Ahy; ary izay manatona Ahy dia tsy mba holaviko mihitsy.

³⁸Fa tsy nidina avy tany an-danitra Aho mba hanao ny sitrapoko fa ny sitrapon’izay naniraka Ahy.

³⁹Ary izao no sitrapon’izay naniraka Ahy dia ny tsy hamelako hisy very izay rehetra nomeny Ahy, fa hatsangako indray amin’ny andro farany izy ireny.

⁴⁰Fa izao no sitrapon’ny Raiko dia ny hahazoan’izay rehetra mijery ny Zanaka ka mino Azy fiainana mandrakizay; ary Izaho hanangana azy amin’ny andro farany.

⁴¹Dia nimonomonona tamin’i Jesosy ny Jiosy* satria Izy nilaza hoe: Izaho no mofo izay nidina avy tany an-danitra.

⁴²Dia hoy ireo: Tsy Ilehio va no Jesosy, zanak’i Josefa, izay fantatsika ny ray aman-dreniny? Koa ahoana indray no ilazany ankehitriny hoe: Izaho ilay nidina avy tany an-danitra?

⁴³Fa hoy Jesosy hoe: Aza mimonomonona ianareo.

⁴⁴Tsy misy olona mahay manatona Ahy, raha tsy taomin’ny Ray izay naniraka Ahy; ary Izaho hanangana azy amin’ny andro farany.

⁴⁵Voasoratra ao amin’ny mpaminany hoe: «Ary izy rehetra dia hampianarin’Andriamanitra» (Isa 54.13). Izay rehetra mandre ka mianatra amin’ny Ray no manatona Ahy.

⁴⁶Nefa tsy nisy nahita ny Ray, afa-tsy izay avy amin’Andriamanitra: Izy no nahita ny Ray.

⁴⁷Lazaiko aminareo marina dia marina tokoa, izay mino no manana fiainana mandrakizay.

⁴⁸Izaho no mofon’aina.

⁴⁹Ny razanareo dia nihinana ny mana tany an-tany efitra nefa maty ihany.

⁵⁰Inty kosa dia mofo midina avy any an-danitra mba tsy ho faty izay mihinana azy.

⁵¹Izaho no mofo velona izay nidina avy tany an-danitra; raha misy mihinana ity mofo ity dia ho velona mandrakizay izy; ary ny mofo izay homeko dia ny nofoko mba ho fiainan’izao tontolo izao.

⁵²Dia nifandìtra ny Jiosy ka niteny hoe: Hataon’Ilehio ahoana re no fanome ny nofony hohanintsika?

⁵³Fa hoy Jesosy taminy: Lazaiko aminareo marina dia marina tokoa: Raha tsy mihinana ny nofon’ny Zanak’Olona sy misotro ny rany ianareo dia tsy manana fiainana ao aminareo.

⁵⁴Izay mihinana ny nofoko sy misotro ny rako no manana fiainana mandrakizay; ary Izaho hanangana azy amin’ny andro farany.

⁵⁵Fa ny nofoko no tena fihinana ary ny rako no tena fisotro.

⁵⁶Izay mihinana ny nofoko sy misotro ny rako no mitoetra ao Amiko ary Izaho kosa ao aminy.

⁵⁷Tahaka ny nanirahan’ny Ray velona Ahy, ary Izaho koa velona amin’ny alalan’ny Ray, dia tahaka izany koa izay mihinana Ahy no ho velona amin’ny alalako.

⁵⁸Inty no mofo izay nidina avy tany an-danitra; tsy tahaka ny razana izay nihinana, nefa maty ihany; fa izay mihinana ity mofo ity dia ho velona mandrakizay.

⁵⁹Izany teny izany no nolazainy tao amin’ny sinagoga*, raha nampianatra tao Kapernaomy Izy.

⁶⁰Maro tamin’ny mpianany izay nandre Azy no niteny hoe: Sarotra izany teny izany, iza no afaka hihaino izany?

⁶¹Ary fantatr’i Jesosy tao am-pony fa nimonomonona ny amin’izany ny mpianany, koa hoy Izy tamin’izy ireo: Mahatafintohina anareo va izany?

⁶²Mainka raha mahita ny Zanak’Olona* miakatra ho any amin’izay nitoerany taloha ianareo.

⁶³Ny fanahy no mahavelona; ny nofo dia tsy mahasoa na inona na inona; ny teny izay nolazaiko taminareo dia fanahy sy fiainana.

⁶⁴Kanefa misy tsy mino ny sasany aminareo. Fantatr’i Jesosy hatramin’ny voalohany izay tsy nino sy izay hamadika Azy.

⁶⁵Ary hoy Izy: Izany no nilazako taminareo fa tsy misy olona mahay manatona Ahy, raha tsy nomen’ny Ray azy izany.

⁶⁶Hatramin’io dia maro tamin’ny mpianany no nihemotra ka tsy niara-nandeha Taminy intsony.

⁶⁷Dia hoy Jesosy tamin’ny roa amby folo lahy: Ianareo koa va mba te hiala?

⁶⁸Hoy i Simona Petera Taminy hoe: Tompo ô, hankany amin’iza moa izahay? Ianao no manana ny tenin’ny fiainana mandrakizay.

⁶⁹Ary mino izahay ka mahalala fa Ianao no Ilay Masin’Andriamanitra.

⁷⁰Jesosy namaly azy hoe: Tsy Izaho va no nifidy anareo roa amby folo lahy, nefa ny iray aminareo aza dia devoly*?

⁷¹Fa nilaza an’i Jodasy, zanak’i Simona iskariota, Izy tamin’io; izy io no ilay efa hamadika Azy, nefa isan’ny roa amby folo lahy.