Read La Bible en Malgache Jaona 7 Bible Online

Jaona 7 - La Bible en Malgache bible

Jaona 7

¹Taorianan’izay dia nitety tany Galilia Jesosy; fa tsy te hitety an’i Jodia* Izy satria nitady hahafaty Azy ny Jiosy*.

²Efa akaiky moa ny andro firavoravoan’ny Jiosy, dia ny fetin’ny Trano rantsan-kazo,

³koa hoy ny rahalahiny Taminy: Mialà eto Ianao ka mandehana ho any Jodia mba ho hitan’ny mpianatrao koa ny asa izay ataonao;

⁴fa tsy misy olona manao zavatra amin’ny takona, nefa ny tenany dia mitady ho hita miharihary; raha manao izao zavatra izao Ianao dia misehoa amin’izao tontolo izao.

⁵Fa na dia ny rahalahiny aza tsy nino Azy.

⁶Dia hoy Jesosy taminy: Tsy mbola tonga ny fotoanandroko; fa ny fotoananareo dia vonona lalandava.

⁷Tsy afaka mankahala anareo izao tontolo izao; fa Izaho no halany satria Izaho milaza fa ratsy ny asany.

⁸Miakara any amin’ny andro firavoravoana ianareo; fa Izaho tsy mbola hiakatra ho amin’ity andro firavoravoana ity satria tsy mbola tonga ny fotoanandroko.

⁹Rehefa avy nilaza ireo teny ireo taminy Izy dia mbola nitoetra tany Galilia ihany.

¹⁰Rehefa lasa niakatra ho amin’ny andro firavoravoana ny rahalahiny dia niakatra koa Izy, nefa tsy mba nisehoseho fa toa niafinafina.

¹¹Ary ny Jiosy* dia nitady Azy tamin’ny andro firavoravoana ka niteny hoe: Aiza Izy?

¹²Ary nitakoritsika Azy be ihany ny vahoaka. Hoy ny sasany: Tsara fanahy Izy; fa hoy kosa ny sasany: Tsia; fa mamitaka ny vahoaka Izy.

¹³Nefa tsy nisy sahy niresaka Azy miharihary noho ny fahatahorany ny Jiosy.

¹⁴Rehefa nisasaka ny andro firavoravoana dia niakatra tao amin’ny tempoly Jesosy ka nampianatra.

¹⁵Gaga ny Jiosy ka niteny hoe: Ahoana no nahaizan’Ilehity ny Soratra, nefa tsy mba nianatra Izy?

¹⁶Dia hoy ny navalin’i Jesosy azy hoe: Tsy Ahy ny fampianarako fa an’Izay naniraka Ahy.

¹⁷Raha misy olona ta hanao ny sitrapony dia hahalala ny amin’ny fampianarana izy, na avy amin’Andriamanitra izany na miteny amin’ny fahefan’ny tenako Aho.

¹⁸Izay miteny amin’ny fahefan’ny tenany dia mitady ny voninahitry ny tenany; fa izay mitady ny voninahitr’izay naniraka azy no marina, ary tsy misy tsy fahamarinana ao aminy.

¹⁹Tsy i Mosesy va no nanome anareo ny lalàna? Nefa tsy misy eo aminareo mankatò ny lalàna. Nahoana ianareo no mitady hamono Ahy?

²⁰Ary hoy ny vahoaka hoe: Manana demonia* Ianao; iza no mitady hamono Anao?

²¹Dia novalin’i Jesosy hoe: Asa iray loha ihany no nataoko, dia gaga avokoa ianareo rehetra.

²²Izao no nanomezan’i Mosesy anareo ny famorana: Tsy noho izy avy tamin’i Mosesy, fa noho izy avy tamin’ny razana, koa na amin’ny Sabata aza dia mamora olona ihany ianareo.

²³Raha amin’ny Sabata aza no amorana olona mba tsy hahafoana ny lalànan’i Mosesy dia ho tezitra Amiko va ianareo satria nisy olona iray nositraniko ny tenany manontolo tamin’ny Sabata.

²⁴Aza mitsara araka ny miseho fa mba mitsarà marina.

²⁵Ary ny mponina sasany tany Jerosalema dia niteny hoe: Tsy Ilehity va ilay tadiaviny hovonoina?

²⁶Ary indro Izy izao miteny miharihary, nefa tsy misy miteny Azy akory. Efa fantatry ny mpitondra tokoa va fa io no Kristy*?

²⁷Fantatsika izao anefa ny niavian’Ilehio, fa raha avy Kristy dia tsy misy mahalala izay hiaviany.

²⁸Raha nampianatra tao amin’ny tempoly Jesosy dia niantso hoe: Izaho dia fantatrareo, sady fantatrareo koa izay niaviako; ary tsy avy amin’ny fahefan’ny tenako Aho, fa marina ny naniraka Ahy, izay tsy fantatrareo.

²⁹Izaho mahalala Azy; fa Izy no niaviako, koa Izy no naniraka Ahy.

³⁰Dia nitady hisambotra Azy ny olona; kanefa tsy nisy nahakasi-tanana Azy, satria tsy mbola tonga ny fotoanandrony.

³¹Ary maro ny vahoaka no nino Azy ka niteny hoe: Raha tonga Kristy, moa hanao famantarana maro mihoatra noho ny nataon’ity Lehilahy ity va Izy?

³²Ary nandre ny vahoaka nitakoritsika izany zavatra izany ny Aminy ny Fariseo* ka naniraka mpiambina hisambotra Azy, ireo lehiben’ny mpisorona sy ny Fariseo.

³³Dia hoy Jesosy: Kely foana no mbola itoerako aminareo dia hankany amin’izay naniraka Ahy Aho.

³⁴Hitady Ahy ianareo fa tsy hahita; ary izay itoerako dia tsy azonareo aleha.

³⁵Dia nifampiresaka ny Jiosy* hoe: Aiza moa no halehan’Ilehity no tsy ho hitantsika? Hankany amin’izay miely any amin’ny Grika va Izy ka hampianatra ny Grika?

³⁶Ahoana moa izao teny nolazainy izao hoe: Hitady Ahy ianareo nefa tsy hahita; ary izay itoerako dia tsy ho azonareo aleha?

³⁷Tamin’ny andro farany, izay andro lehibe tamin’ny andro firavoravoana, dia nitsangana Jesosy ka niantso hoe: Raha misy olona mangetaheta, aoka izy hanatona Ahy ka hisotro.

³⁸Izay mino Ahy dia hisy onin’ny rano velona hiboiboika avy ao aminy, araka ny voalazan’ny Soratra Masina.

³⁹Ny Fanahy, izay efa horaisin’ny mino Azy, no nolazainy tamin’izany; fa ny Fanahy tsy mbola nomena satria Jesosy tsy mbola niditra tamin’ny voninahiny.

⁴⁰Ary ny sasany tamin’ny vahoaka, raha nandre izany teny izany, dia nilaza hoe: Ity tokoa no ilay Mpaminany.

⁴¹Hoy koa ny sasany: Ity no Kristy*. Ary hoy kosa ny sasany: Avy any Galilia va no iavian’i Kristy?

⁴²Tsy voalazan’ny Soratra Masina va fa Kristy dia avy amin’ny taranak’i Davida sady avy ao Betlehema, vohitra nonenan’i Davida (Mik 5.1)?

⁴³Dia nisara-tsaina ny amin’i Jesosy ny vahoaka.

⁴⁴Ary nitady hisambotra Azy ny sasany; kanefa tsy nisy nahakasi-tanana Azy.

⁴⁵Ary niverina nankeo amin’ireo lehiben’ny mpisorona sy ny Fariseo* ireo mpiambina ka nanontaniany hoe: Nahoana ianareo no tsy nitondra Azy?

⁴⁶Dia namaly ireo mpiambina hoe: Tsy mbola nisy olona niteny tahaka izany.

⁴⁷Ary hoy ny Fariseo tamin’izy ireo hoe: Voafitaka koa va ianareo?

⁴⁸Moa misy mpanapaka na Fariseo mba nino Azy?

⁴⁹Fa voaozona ireto vahoaka ireto, izay tsy mahalala ny lalàna.

⁵⁰Ary i Nikodemosy izay iray tamin’ireo mpanapaka, ilay efa niresaka tamin’i Jesosy teo aloha, dia niteny tamin’ireo hoe:

⁵¹Moa manameloka olona va ny lalànantsika, raha tsy mbola mihaino azy aloha ka mahafantatra izay nataony?

⁵²Fa hoy izy ireo taminy: Ianao koa angaha mba avy any Galilia? Diniho, dia ho hitanao fa tsy mba misy mpaminany avy any Galilia.

⁵³Dia samy lasa nody ho any an-tranony avy izy rehetra.