Read La Bible en Malgache Jaona 8 Bible Online

Jaona 8 - La Bible en Malgache bible

Jaona 8

¹Fa Jesosy kosa nankany amin’ny tendrombohitra Oliva.

²Raha vao maraina dia nankao amin’ny tempoly indray Jesosy, ary satria ny vahoaka rehetra nanatona Azy dia nipetraka Izy ka nampianatra azy.

³Ary nisy vehivavy iray, tratra nijangajanga, noentin’ny mpanoradalàna sy ny Fariseo*; ary rehefa avy napetrany teo afovoany izy

⁴dia hoy ireo Taminy: Mpampianatra ô, ity vehivavy ity dia tratra nijangajanga.

⁵Ary ao amin’ny lalàna, i Mosesy dia nandidy antsika fa hotoraham-bato izay vehivavy manao toy izany (Deo 22.22-24); fa ahoana kosa hoy Ianao?

⁶Izany no nolazainy hakany fanahy Azy mba hahazoany antony hiampangana Azy. Fa Jesosy niondrika ka nanoratra teo amin’ny tany tamin’ny rantsantanany.

⁷Ary raha nitohy nanontany Azy ry zareo dia nitraka Izy ka niteny taminy hoe: Izay tsy nanota aminareo no aoka hitora-bato azy voalohany.

⁸Dia niondrika indray Izy ka nanoratra teo amin’ny tany tamin’ny rantsantanany.

⁹Raha nandre izany izy ireo dia niala tsirairay, hatramin’ny zokinjokiny ka hatramin’ny zandrinjandriny; ary Jesosy sy ilay vehivavy, izay natao teo afovoany, irery no sisa teo.

¹⁰Rehefa nitraka Jesosy dia hoy Izy taminy; Ravehivavy, aiza ry zareo teo? Tsy nisy nanameloka anao va?

¹¹Ary hoy izy: Tsy misy, Tompoko. Dia hoy Jesosy: Izaho koa tsy manameloka anao; mandehana, ary amin’izao sisa izao dia aza manota intsony.

¹²Ary Jesosy niteny tamin’ny olona indray hoe: Izaho no fahazavan’izao tontolo izao; izay manaraka Ahy tsy mba handeha amin’ny maizina, fa hanana ny fahazavan’aina.

¹³Dia hoy ny Fariseo* Taminy: Ianao izao dia manambara ny tenanao, koa tsy marina ny fanambaranao.

¹⁴Hoy Jesosy hoe: Na dia manambara ny tenako aza Aho dia marina ny fanambaràko satria fantatro izay niaviako sy izay alehako; fa ianareo kosa dia tsy mahalala izay niaviako na izay alehako.

¹⁵Mitsara araka ny nofo ianareo; Izaho tsy mitsara olona na dia iray akory aza.

¹⁶Ary na dia mitsara aza Aho dia marina ny fitsarako satria tsy irery Aho, fa ao Izaho sy ny Ray izay naniraka Ahy.

¹⁷Fa voasoratra ao amin’ny lalànanareo fa marina ny teny ijoroan’ny olona roa vavolombelona (Deo 19.15).

¹⁸Izaho no manambara ny tenako, ary ny Ray izay naniraka Ahy dia manambara Ahy koa.

¹⁹Dia hoy ireo taminy: Aiza izay Rainao? Dia hoy Jesosy hoe: Samy tsy fantatrareo, na Izaho na ny Raiko; raha nahalala Ahy ianareo dia ho nahalala ny Raiko koa.

²⁰Teo akaikin’ny fandatsahan-drakitra izany teny izany no nolazain’i Jesosy, raha nampianatra tao amin’ny tempoly Izy; ary tsy nisy olona nisambotra Azy satria tsy mbola tonga ny fotoanandrony.

²¹Hoy indray Jesosy taminy: Handeha Aho ka hitady Ahy ianareo, ary ho faty amin’ny fahotanareo ianareo; izay halehako dia tsy ho azonareo aleha.

²²Dia hoy ny Jiosy*: Hamono tena va Izy no milaza hoe: Izay alehako dia tsy azonareo aleha?

²³Fa hoy Izy taminy: Ianareo dia avy atỳ ambany; Izaho avy any ambony; ianareo dia avy amin’izao tontolo izao; Izaho tsy mba avy amin’izao tontolo izao;

²⁴koa izany no nilazako taminareo fa ho faty amin’ny fahotanareo ianareo; satria raha tsy mino ianareo fa Izaho no Izy dia ho faty amin’ny fahotanareo ianareo.

²⁵Dia hoy ireo taminy: Iza moa Ianao? Hoy Jesosy tamin’izy ireo: Ilay nolazaiko taminareo hatramin’ny voalohany.

²⁶Manana zavatra maro hilazana sy hitsarana anareo Aho satria marina izay naniraka Ahy; ary izay zavatra reko Taminy no lazaiko amin’izao tontolo izao.

²⁷Tsy fantany fa ny Ray no nolazainy taminy,

²⁸koa hoy Jesosy: Rehefa asandratrareo ny Zanak’Olona* dia ho fantatrareo fa Izaho no Izy, ary tsy manao na inona na inona amin’ny fahefan’ny tenako Aho, fa araka ny nampianarin’ny Raiko Ahy no ilazako izany zavatra izany.

²⁹Ary izay naniraka Ahy dia eto Amiko; tsy nandao Ahy ho irery Izy satria Izaho manao izay sitrany mandrakariva.

³⁰Rehefa nilaza izany teny izany Jesosy dia maro no nino Azy.

³¹Dia hoy Jesosy tamin’ny Jiosy* izay nino Azy: Raha maharitra amin’ny teniko ianareo dia ho mpianatro tokoa;

³²koa ho fantatrareo ny marina ary ny marina no hanafaka anareo tsy ho andevo.

³³Ary ireo dia namaly Azy hoe: Taranak’i Abrahama izahay fa tsy mba andevon’olona hatrizay ela izay; koa nahoana no ataonao hoe: Ho afaka ianareo?

³⁴Hoy Jesosy hoe: Lazaiko aminareo marina dia marina tokoa fa izay rehetra manota dia andevon’ny ota.

³⁵Fa ny andevo dia tsy mitoetra ao an-trano mandrakariva; fa ny zanaka no mitoetra ao mandrakariva.

³⁶Koa raha ny Zanaka no hahafaka anareo dia ho afaka tokoa ianareo.

³⁷Fantatro ihany fa taranak’i Abrahama ianareo nefa mitady hamono Ahy satria tsy mitombo ao anatinareo ny teniko.

³⁸Izay efa hitako tamin’ny Ray no lazaiko, ary ianareo kosa dia manao izay renareo tamin’ny rainareo.

³⁹Dia hoy ireo hoe: I Abrahama no rainay. Hoy Jesosy taminy: Raha zanak’i Abrahama ianareo dia ny asan’i Abrahama no hataonareo.

⁴⁰Fa ankehitriny ianareo dia mitady hamono Ahy, izay lehilahy nilaza ny marina taminareo, dia izay efa reko tamin’Andriamanitra; tsy mba nanao izany i Abrahama.

⁴¹Ianareo dia manao ny asan’ny rainareo. Hoy ireo taminy: Tsy mba teraka avy tamin’ny fijangajangana izahay; iray ihany ny Rainay dia Andriamanitra.

⁴²Hoy Jesosy taminy: Raha Andriamanitra no Rainareo dia ho tia Ahy ianareo satria avy tamin’Andriamanitra no niaviako sy nankanesako atỳ; fa Izaho tsy tonga amin’ny fahefan’ny tenako fa Izy no naniraka Ahy.

⁴³Nahoana no tsy azonareo ny teniko? Satria tsy afaka mihaino ny teniko ianareo.

⁴⁴Ianareo avy tamin’ny devoly* rainareo, koa izay sitraky ny rainareo no tianareo hatao. Izy dia mpamono olona hatramin’ny taloha, ary tsy nitoetra tamin’ny marina satria tsy misy marina aminy. Raha mandainga izy dia ny azy no lazainy satria mpandainga izy sady rain’ny lainga.

⁴⁵Fa satria milaza ny marina Aho dia tsy inoanareo.

⁴⁶Iza aminareo moa no hampiseho Ahy ho nanota? Raha ny marina no lazaiko, nahoana ianareo no tsy mino Ahy?

⁴⁷Izay avy amin’Andriamanitra dia mihaino ny tenin’Andriamanitra; izany no tsy ihainoanareo satria tsy mba avy amin’Andriamanitra ianareo.

⁴⁸Dia namaly Azy ny Jiosy* hoe: Tsy marina va ny filazanay fa Samaritana* ianao sady manana demonia*?

⁴⁹Fa hoy Jesosy hoe: Tsy manana demonia Aho, fa mankalaza ny Raiko, nefa kosa ianareo dia manala baraka Ahy.

⁵⁰Fa Izaho tsy mitady ny voninahitro; misy iray mitady sy mitsara.

⁵¹Lazaiko aminareo marina dia marina tokoa: Raha misy olona mitandrina ny teniko dia tsy mba hahita fahafatesana mandrakizay.

⁵²Dia hoy ny Jiosy Taminy: Fantatray ankehitriny fa manana demonia Ianao. Efa maty i Abrahama sy ny mpaminany; nefa hoy Ianao: Raha misy olona mitandrina ny teniko dia tsy mba hanandrana fahafatesana mandrakizay izy.

⁵³Moa Ianao va lehibe noho i Abrahama rainay izay efa maty? Sady efa maty koa ny mpaminany; koa manao Anao ho iza moa Ianao?

⁵⁴Dia novalin’i Jesosy hoe: Raha mankalaza ny tenako Aho dia tsinontsinona ny voninahitro; ny Raiko, izay ataonareo fa Andriamanitrareo, Izy no mankalaza Ahy.

⁵⁵Tsy fantatrareo Izy fa Izaho no mahalala Azy; ary raha hoy Aho: Tsy fantatro Izy, dia mba mpandainga tahaka anareo koa Aho; nefa mahalala Azy Aho ka mitandrina ny teniny.

⁵⁶Miravoravo i Abrahama rainareo hahita ny androko; ary nahita izy ka faly.

⁵⁷Dia hoy ny Jiosy taminy: Tsy mbola dimampolo taona akory Ianao izao dia ho efa nahita an’i Abrahama va Ianao?

⁵⁸Hoy Jesosy taminy: Lazaiko aminareo marina tokoa: Fony tsy mbola ary i Abrahama dia efa Izy Aho.

⁵⁹Dia naka vato hitorahana Azy ny olona; fa Jesosy niery ka niala tao amin’ny tempoly.