Read La Bible en Malgache Jaona 9 Bible Online

Jaona 9 - La Bible en Malgache bible

Jaona 9

¹Raha nandalo toerana iray Jesosy dia nahita lehilahy jamba hatramin’ny nahaterahany.

²Ary nanontany Azy ny mpianany hoe: Raby ô, iza moa no nanota, io lehilahy io va sa ny ray aman-dreniny, no dia teraka jamba izy?

³Dia novalìn’i Jesosy hoe: Tsy io lehilahy io no nanota na ny ray aman-dreniny, fa ny hanehoana ny asan’Andriamanitra eo aminy no anton’izao.

⁴Isika tsy maintsy manao ny asan’izay naniraka Ahy, raha mbola antoandro; avy ny alina ka tsy mahazo miasa ny olona.

⁵Raha amin’izao tontolo izao Aho dia fahazavan’izao tontolo izao.

⁶Rehefa avy nilaza izany Izy dia nandrora tamin’ny tany ka nanao feta tamin’ny rora, dia nahosony ny mason’ilay jamba.

⁷Ary hoy Izy taminy: Andeha, sasao any amin’ny farihy Siloama, izay atao hoe Nirahina, ny masonao. Dia lasa ilay jamba nanasa ny masony, ary niverina nahiratra.

⁸Koa izay nifanolo-bodirindrina taminy sy izay nahita azy fa mpangataka izy taloha dia niteny hoe: Tsy ity va ilay nipetraka nangataka?

⁹Hoy ny sasany: Izy ity, fa hoy ny sasany: Tsia, fa tahaka azy ihany ity. Hoy kosa izy: Izaho no izy.

¹⁰Dia hoy ny olona taminy: Ahoana no nahiratan’ny masonao?

¹¹Ary hoy izy hoe: Ilay lehilahy atao hoe Jesosy no nanao feta, dia nanosotra ny masoko ka niteny tamiko hoe: Mankanesa any Siloama ka sasao ny masonao; dia nandeha aho ka nanasa azy ary nahiratra.

¹²Ary hoy ny olona taminy: Aiza moa izany lehilahy izany? Hoy Ralehilahy: Tsy fantatro.

¹³Dia noentiny tany amin’ny Fariseo* ilay jamba taloha.

¹⁴Ary tamin’ny andro Sabata no nanaovan’i Jesosy ny feta sy nampahiratany ny mason-dRalehilahy.

¹⁵Ary mbola nanontany azy ny amin’izay nahiratan’ny masony koa ny Fariseo. Dia hoy izy taminy: Nasiany feta ny masoko dia nosasako ka nahiratra aho.

¹⁶Ary hoy ny Fariseo sasany: Tsy avy amin’Andriamanitra izany lehilahy izany satria tsy mitandrina ny Sabata Izy. Hoy ny sasany: Hataon’ny lehilahy mpanota ahoana no fahay manao fahagagana toy izany? Dia nisara-tsaina izy ireo.

¹⁷Ary hoy indray izy tamin’ilay jamba: Inona no ilazanao ilay nampahiratra ny masonao? Dia hoy izy: Mpaminany Izy.

¹⁸Fa ny Jiosy* dia tsy nino azy ho jamba nahiratra, raha tsy niantso ny ray aman-drenin’ilay nahiratra

¹⁹ka nanontaniany hoe: Zanakareo moa ity, izay lazainareo hoe teraka jamba? Koa nanao ahoana ary no nahiratany izao indray?

²⁰Dia hoy ny navalin’ireto ray aman-dreniny hoe: Fantatray fa zanakay ity sady teraka jamba;

²¹fa tsy fantatray izay fomba nahiratany toy izao; ary tsy fantatray izay olona nampahiratra ny masony; izy ihany no anontanio; efa lehibe izy, aoka izy no hilaza ny amin’ny tenany.

²²Izany teny izany no nolazain’ny ray aman-dreniny satria natahotra ny Jiosy izy ireo; fa efa nifanaiky mantsy ny Jiosy fa raha misy manaiky Azy ho Kristy* dia horoahina tsy ho isan’ny amin’ny sinagoga*.

²³Izany no nilazan’ny ray aman-dreniny hoe: Efa lehibe izy, koa izy no anontanio.

²⁴Dia niantso ilay jamba teo aloha indray izy ireo ka niteny taminy hoe: Omeo voninahitra Andriamanitra; izahay dia mahalala fa mpanota izany lehilahy izany.

²⁵Fa hoy izy hoe: Tsy fantatro na mpanota Izy na tsia; zavatra iray loha ihany no fantatro: Jamba aho teo aloha fa mahiratra aho izao.

²⁶Dia hoy izy taminy: Inona no nataony taminao? Nanao ahoana hoe no nampahiratany ny masonao?

²⁷Dia hoy izy hoe: Efa voalazako taminareo ihany fa tsy nihaino ianareo; nahoana indray no te hihaino ianareo izao? Moa te ho mpianany koa va ianareo?

²⁸Dia nanevateva azy izy ireo hoe: Ialahy no mpianany; fa izahay dia mpianatr’i Mosesy.

²⁹Izahay dia mahalala fa i Mosesy no nitenenan’Andriamanitra; fa ny amin’izany lehilahy izany dia tsy fantatray izay niaviany.

³⁰Namaly azy Ralehilahy hoe: Mba mahagaga tokoa lahy izany! Fa tsy fantatrareo izay niaviany, nefa nampahiratra ny masoko Izy.

³¹Fantatsika fa Andriamanitra tsy mihaino ny mpanota; fa izay mivavaka aminy sy manao ny sitrapony no henoiny.

³²Hatrizay hatrizay dia tsy mbola re fa nisy nampahiratra ny mason’izay teraka jamba.

³³Raha tsy avy amin’Andriamanitra izany lehilahy izany dia tsy nahefa na inona na inona Izy.

³⁴Ary hoy ny navalin’izy ireo azy hoe: Tena teraka tamin’ny ota tokoa Ialahy, koa Ialahy indray va no hampianatra anay? Dia noroahiny ho any ivelany izy.

³⁵Ren’i Jesosy fa efa noroahiny ho any ivelany Ralehilahy; koa rehefa nahita azy Izy dia niteny hoe: Mino ny Zanak’Andriamanitra va ianao?

³⁶Namaly Ralehilahy hoe: Iza moa no Izy, Tompoko, mba hinoako Azy?

³⁷Hoy Jesosy taminy: Efa nahita Azy ianao sady izay miresaka aminao izao no Izy.

³⁸Dia hoy izy: Tompoko, mino aho. Sady niankohoka teo anatrehany izy.

³⁹Ary hoy Jesosy: Ho fitsarana no nahatongavako eto amin’izao tontolo izao, mba hahiratra ny tsy mahiratra ary mba ho tonga jamba kosa ny mahiratra.

⁴⁰Ary ny Fariseo* sasany izay teo Aminy, nony nandre izany, dia niteny taminy hoe: Izahay koa va mba jamba?

⁴¹Hoy Jesosy taminy: Raha jamba ianareo dia tsy ho nanan-keloka; fa noho ianareo ankehitriny miteny hoe: Mahiratra izahay dia tsy afaka ny helokareo.