Read La Bible en Malgache Asan’ny Apostoly 1 Bible Online

Asan’ny Apostoly 1 - La Bible en Malgache bible

Asan’ny Apostoly 1

¹Ry Teofilo, Ilay boky voalohany dia nosoratako momba izay natombok’i Jesosy natao sy nampianarina,

²hatramin’ny andro nampiakarana Azy, rehefa avy nodidiany tamin’ny alalan’ny Fanahy Masina ny Apostoly izay nofidiny.

³Niseho tamin’ireo tamin’ny famantarana maro koa Izy fa velona, taorianan’ny nijaliany; eny, niseho tamin’izy ireo nandritra ny efapolo andro Izy ary nilaza ny amin’ny fanjakan’Andriamanitra.

⁴Raha niara-nisakafo tamin’izy ireo Jesosy dia namepetra azy tsy hiala tao Jerosalema fa hiandry ny teny fikasan’ny Ray izay efa renareo tamiko, hoy Izy;

⁵fa i Jaona dia nanao batisa tamin’ny rano fa ianareo kosa dia hatao batisa amin’ny Fanahy Masina rehefa afaka andro vitsivitsy.

⁶Koa izay tafangona teo dia nanontany Azy hoe: Tompoko, amin’izao va no hampodianao ny fanjakana ho amin’ny Israely?

⁷Fa hoy kosa Izy taminy: Tsy anjaranareo ny hahafantatra ny andro na ny fotoana izay efa notendren’ny Ray amin’ny fahefany irery ihany.

⁸Fa hahazo hery ianareo amin’ny hahatongavan’ny Fanahy Masina aminareo ka ho vavolombeloko any Jerosalema sy manerana an’i Jodia* sy i Samaria ary hatrany amin’ny faran’ny tany.

⁹Rehefa nilaza izany Jesosy dia nakarina, raha mbola nijery izy ireo; nisy rahona nitondra Azy ka tsy hitan’ny masony intsony Izy.

¹⁰Ary raha mbola nandinika ny lanitra izy ireo tamin’ny nandehanan’i Jesosy dia indreo, nisy roa lahy tonga teo anilany, niakanjo fotsy,

¹¹ary niteny hoe: Ry lehilahy galiliana, nahoana no mijanona eto mijery ny lanitra ianareo? Iny Jesosy izay nampiakarina niala taminareo ho any an-danitra iny dia mbola ho avy indray tahaka ny nahitanareo Azy niakatra ho any an-danitra.

¹²Dia niverina nankany Jerosalema izy ireo rehefa avy teo amin’ny tendrombohitra atao hoe Oliva izay akaikin’i Jerosalema, halaviran-dalana azo aleha amin’ny Sabata*.

¹³Rehefa tafiditra ny tanàna izy ireo dia niakatra ho any amin’ny efitra ambony rihana izay nipetrahany; i Petera, i Jaona, i Jakoba, i Andrea, i Filipo, i Tomasy, i Bartolomeo, i Matio, i Jakoba zanak’i Alfeo, i Simona Zelota ary i Jodasy, zanak’i Jakoba no tao.

¹⁴Ireo rehetra ireo dia niray saina sady naharitra nivavaka niaraka tamin’ny vehivavy sy i Maria, renin’i Jesosy, ary ireo rahalahiny.

¹⁵Tamin’izany andro izany dia nitsangana teo afovoan’ireo rahalahy i Petera; tokony ho roapolo amby zato no isan’ny olona vory teo tamin’izay ka hoy izy:

¹⁶Ry rahalahy, tsy maintsy notanterahina ilay tenin’ny Soratra Masina izay nampilazain’ny Fanahy Masina mialoha an’i Davida, ny amin’i Jodasy izay tonga mpitarika ireo olona nisambotra an’i Jesosy;

¹⁷izy iny dia isantsika ihany ka nahazo anjara tamin’izao fanompoana izao koa.

¹⁸Ary izany lehilahy izany dia nahazo saha tamin’ny tambin’ny fahotany; ary potraka niankohoka izy, dia vaky ny kibony ka nipoaka sady nivaroraka avokoa ny tsinainy.

¹⁹Ary fantatr’izay rehetra monina eto Jerosalema izany, koa ny anaran’io saha io, amin’ny fitenin-dry zareo, dia atao hoe Akeldama, izany hoe Sahan-dra.

²⁰Fa voasoratra ao amin’ny bokin’ny Salamo hoe: «Aoka ho lao ny fonenany ary aoka tsy hisy olona honina ao.» (Sal 69.25) ary koa: «Aoka ho lasan’olon-kafa ny anjara raharahany.» (Sal 109.8)

²¹Koa amin’ireo lehilahy niaraka tamintsika mandrakariva ireo, raha nifanerasera tamintsika Jesosy Tompo, nanomboka tamin’ny batisan’i Jaona ka

²²hatramin’ny andro nampiakarana Azy niala tamintsika, dia tokony hisy iray ho namantsika mba ho vavolombelon’ny nitsanganany.

²³Ary nanokana roa lahy izy ireo, dia i Josefa, antsoina hoe Barsabasy, izay antsoina koa hoe Josto, sy i Matia.

²⁴Dia nivavaka izy hoe: Ianao, Tompo ô, izay mahalala ny fon’ny olona rehetra, asehoy izay nofidinao amin’izy roa lahy ireto,

²⁵mba hahazoany anjara amin’izao fanompoana sy ny maha apostoly izao, izay nialan’i Jodasy ho any amin’ny anjara toerany.

²⁶Dia nanao antsapaka ho azy izy ireo ka nianjera tamin’i Matia ny antsapaka; ary izy izany no lany ho naman’ny apostoly iraika amby folo lahy.