Read La Bible en Malgache Asan’ny Apostoly 10 Bible Online

Asan’ny Apostoly 10 - La Bible en Malgache bible

Asan’ny Apostoly 10

¹Nisy lehilahy iray tany Kaisaria, i Kornelio no anarany ary kapiteny tamin’ny antokon’ny miaramila antsoina hoe Italiana izy;

²mpivavaka tsara sady natahotra an’Andriamanitra izy sy ny ankohonany rehetra ka nanao fiantrana be tamin’ny olona sady nivavaka mandrakariva tamin’Andriamanitra.

³Ary nahita miharihary tamin’ny fahitana izy, rehefa tokony ho tamin’ny ora fahasivy antoandro, fa indro, nisy anjelin’Andriamanitra niditra tao an-tranony ka niteny taminy hoe: Ry Kornelio!

⁴Nony nibanjina azy izy dia raiki-tahotra ka niteny hoe: Ahoana, Tompoko? Dia niteny taminy indray ilay anjely hoe: Ny vavaka ataonao sy ny fiantranao dia efa tafakatra ho fampahatsiarovana eo anatrehan’Andriamanitra.

⁵Koa ankehitriny, maniraha olona hankany Jopa ka ampanalao ny lehilahy iray atao hoe Simona izay antsoina koa hoe Petera;

⁶mitoetra ao amin’i Simona mpandon-koditra izy ary eo amoron-dranomasina ny tranony.

⁷Rehefa lasa ilay anjely izay niteny tamin’i Kornelio dia niantso roa lahy tamin’ny mpanompony sy miaramila mpivavaka iray isan’izay nanaraka azy isanandro izy.

⁸Rehefa nambarany taminy izany rehetra izany dia naniraka azy ireo hankany Jopa izy.

⁹Nony ampitso, raha mbola nandeha teny an-dalana izy ireo ka efa teo akaiky ny tanàna, dia niakatra teo ambonin’ny tampon-trano* i Petera mba hivavaka, rehefa tokony ho tamin’ny ora fahenina.

¹⁰Noana izy ka te hisakafo; fa raha mbola nokarakaraina ny sakafo ho azy dia azon-tsindrimandry izy

¹¹ka nahita ny lanitra misokatra sady nisy zavatra midina toa lamba lehibe nampidinina tamin’ny zorony efatra ho amin’ny tany;

¹²tao anatin’izany dia nisy ny biby rehetra izay manan-tongotra efatra sy ny zava-mandady sy mikisaka etỳ an-tany ary ny voromanidina.

¹³Ary nisy feo niteny taminy hoe: Mitsangàna, ry Petera; vonoy, ka hano. Fa hoy i Petera: Sanatria, Tompoko!

¹⁴Tsy mbola nihinana zavatra fady na tsy madio aho.

¹⁵Fa hoy indray ilay feo taminy fanindroany: Izay efa nodiovin’Andriamanitra dia aza ataonao ho fady.

¹⁶Ary intelo no nitrangan’izany; dia nakarina nankany an-danitra ilay zavatra nony avy eo.

¹⁷Raha mbola nieritreritra tao am-pony ny amin’izay anton’ny fahitana efa hitany i Petera dia indreo ireo olona nirahin’i Kornelio nanontany ny tranon’i Simona ka nijanona teo am-bavahady,

¹⁸dia niantso izy ireo ary nanontany raha ao no mipetraka i Simona izay antsoina koa hoe Petera.

¹⁹Raha mbola nieritreritra ilay fahitana i Petera dia hoy ny Fanahy taminy: Indreo, misy telo lahy mitady anao;

²⁰koa mitsangàna ianao dia midìna ary mandehana miaraka aminy ka aza misalasala, fa Izaho no naniraka azy.

²¹Dia nidina tany amin’ireo olona ireo i Petera ka niteny hoe: Inty aho izay tadiavinareo; inona no anton’ny ahatongavanareo atỳ?

²²Dia hoy ireo: I Kornelio kapiteny, lehilahy marina sady matahotra an’Andriamanitra ka tsara laza amin’ny firenen’ny Jiosy* rehetra, dia efa notoroan’anjely masina hevitra hampaka anao ho any an-tranony sy hihaino teny avy aminao.

²³Ary i Petera dia nampiantrano azy ireo handry tao. Nony ampitso dia niainga i Petera ka nandeha niaraka tamin’izy ireo, ary niaraka taminy koa ny rahalahy sasany avy tany Jopa.

²⁴Dia tonga tany Kaisaria izy ny ampitson’iny. Efa niandry azy i Kornelio sady efa nampiantso ny havany sy ny namany akaiky.

²⁵Raha vao niditra i Petera dia nitsena azy i Kornelio ka niankohoka teo amin’ny tongony sady nitsaoka azy.

²⁶Nefa nampitsangana azy i Petera ka niteny hoe: Mitsangàna fa izaho dia olona ihany.

²⁷Nony niresaka taminy izy dia niditra tao an-trano ka nahita ny olona maro tafangona tao.

²⁸Dia hoy izy taminy: Ianareo dia mahalala fa fady amin’ny Jiosy ny hifandray na hiantrano amin’ny olona hafa firenena; nefa izaho dia efa nampahafantarin’Andriamanitra fa tsy misy olona azoko atao hoe fady na tsy madio.

²⁹Noho izany dia tsy nandà ny hankaty aho rehefa nampiantsoana; koa manontany aho: Inona moa no nampiantsoanareo ahy?

³⁰Hoy i Kornelio: Telo andro lasa izay, tamin’ny ora toy izao, raha nivavaka teto an-tranoko aho tamin’ny ora fahasivy, dia indro, nisy lehilahy niakanjo mamirapiratra nitsangana teto anatrehako

³¹ka niteny hoe: Ry Kornelio, efa re ny vavaka ataonao ary efa tsarovana eo anatrehan’Andriamanitra ny fiantranao.

³²Koa maniraha hankany Jopa ka ampanalao i Simona izay antsoina koa hoe Petera; miantrano ao an-tranon’i Simona mpandon-koditra eo amoron-dranomasina izy.

³³Niaraka tamin’izay dia nandefa olona tany aminao aho; ary tsara ny nahatongavanao. Koa ankehitriny, izahay rehetra dia efa eto anatrehan’Andriamanitra mba hihaino izay rehetra nampilazain’ny Tompo anao.

³⁴Dia niloa-bava i Petera ka niteny hoe: Hitako marina tokoa izao fa tsy mizaha tavan’olona Andriamanitra;

³⁵fa amin’ny firenena rehetra, izay olona matahotra Azy ka manao ny marina no ankasitrahany.

³⁶Ianareo mahalala ny teny izay nampitondrainy ho amin’ny Zanak’Israely, mitory teny soa milaza fiadanana amin’ny alalan’i Jesosy Kristy* izay Tompon’izao rehetra izao,

³⁷dia ilay teny natomboka hatrany Galilia ka notorina tany Jodia* rehetra taorianan’ny batisa izay notorin’i Jaona,

³⁸dia ny amin’i Jesosy avy any Nazareta izay nohosoran’Andriamanitra tamin’ny Fanahy Masina sy ny hery ary nandehandeha nanao soa sy nahasitrana izay rehetra azon’ny herin’ny devoly*, satria nomba Azy Andriamanitra.

³⁹Vavolombelon’ny zavatra rehetra izay nataony tany amin’ny tanin’ny Jiosy* sy tany Jerosalema izahay; Izy dia novonoiny rehefa nahantony teo amin’ny hazo;

⁴⁰nefa natsangan’Andriamanitra kosa tamin’ny andro fahatelo ka nasehony marina,

⁴¹tsy tamin’ny olona rehetra, fa tamin’ny vavolombelona izay efa notendren’Andriamanitra rahateo, dia taminay izay niara-nihinana sy nisotro taminy, rehefa nitsangana tamin’ny maty Izy.

⁴²Ary nandidy anay Izy hitory amin’ny olona ka hanambara fa Izy no voatendrin’Andriamanitra ho Mpitsara ny velona sy ny maty.

⁴³Izy no ambaran’ny mpaminany rehetra fa amin’ny anarany no hahazoan’izay rehetra mino Azy famelan-keloka.

⁴⁴Raha mbola nilaza izany teny izany i Petera dia nilatsaka tamin’izay rehetra nandre ny teny ny Fanahy Masina.

⁴⁵Talanjona ny mino isan’ny voafora izay niaraka tamin’i Petera, satria nirotsaka tamin’ny Jentilisa* koa ny fanomezana, dia ny Fanahy Masina.

⁴⁶Ary nandre azy niteny tamin’ny fiteny tsy fantatra sy nankalaza an’Andriamanitra izy ireo. Dia hoy i Petera:

⁴⁷Moa misy olona mahazo mandrara ny rano tsy hanaovana batisa azy ireto, izay efa nandray ny Fanahy Masina tahaka antsika koa va?

⁴⁸Dia nasainy natao batisa amin’ny anaran’i Jesosy Kristy* izy ireo. Ary nangatahin’ireo mba hijanona ao aminy andro vitsivitsy i Petera.