Read La Bible en Malgache Asan’ny Apostoly 11 Bible Online

Asan’ny Apostoly 11 - La Bible en Malgache bible

Asan’ny Apostoly 11

¹Ary ny Apostoly sy ny rahalahy izay tany Jodia* dia nahare fa ny Jentilisa* koa dia efa nandray ny tenin’Andriamanitra.

²Koa nony tafakatra tany Jerosalema i Petera dia nila ady taminy ny mino izay isan’ny voafora ka

³nilaza hoe: Efa niantrano tany amin’ny olona tsy voafora ianao sady niara-nisakafo taminy.

⁴Dia nanomboka nitantara tamin’izy ireo hatramin’ny fiandohany i Petera hoe:

⁵Nivavaka tany an-tanànan’i Jopa aho, ary azon-tsindrimandry, dia nahita fahitana, koa indro, nisy zavatra nidina avy tany an-danitra, toa lamba lehibe nampidinina tamin’ny zorony efatra nankeo amiko;

⁶ary raha nijery sy nandinika izany aho dia hitako ny biby etỳ an-tany izay manan-tongotra efatra sy ny bibidia sy ny zava-mandady sy mikisaka ary ny voromanidina koa.

⁷Nandre feo koa aho niteny tamiko hoe: Mitsangàna, ry Petera, vonoy ireo ka hano.

⁸Fa hoy aho: Sanatria, Tompoko! Tsy mbola niditra tamin’ny vavako izay zavatra fady na tsy madio.

⁹Ary nisy feo indray avy tany an-danitra nanao hoe: Izay efa nodiovin’Andriamanitra dia aza ataonao ho fady.

¹⁰Intelo no nisehoan’izany, dia nosarihana niakatra tany an-danitra indray ireo rehetra ireo.

¹¹Tamin’izay dia indreo, nisy telo lahy nijanona teo anoloan’ny trano nipetrahanay, iraka avy tany Kaisaria hankeo amiko.

¹²Nasain’ny Fanahy hiaraka tamin’ireo aho ka tsy hizaha tavan’olona na dia kely akory aza. Niaraka tamiko koa ireto rahalahy enina ireto ka niditra tao an-tranon-dRalehilahy izahay.

¹³Ary nambarany taminay ny nahitany ny anjely nitsangana tao an-tranony ka niteny hoe: Maniraha ho any Jopa ka ampanalao i Simona izay antsoina koa hoe Petera;

¹⁴izy no hilaza teny aminao, izay hamonjena anao sy ny ankohonanao rehetra.

¹⁵Raha vao niteny aho dia nilatsaka taminy ny Fanahy Masina tahaka ny tamintsika fahiny.

¹⁶Dia nahatsiaro ny tenin’ny Tompo izay nolazainy aho hoe: I Jaona dia nanao batisa tamin’ny rano, fa ianareo kosa dia hatao batisa amin’ny Fanahy Masina.

¹⁷Koa raha mba nomen’Andriamanitra azy ny fanomezana, tahaka antsika fony isika vao nino an’i Jesosy Kristy Tompo, dia iza moa aho no hahasakana an’Andriamanitra?

¹⁸Rehefa nandre izany ireo dia nitony sady nankalaza an’Andriamanitra hoe: Efa nomen’Andriamanitra ny Jentilisa koa ny fibebahana hahazoany fiainana.

¹⁹Ary izay niely noho ny fanenjehana an’i Stefana dia nandeha hatrany Foinika sy Sipra ary Antiokia, nefa tsy nitoriteny tamin’olona izy, afa-tsy tamin’ny Jiosy* ihany.

²⁰Ny sasany tamin’ireny dia lehilahy avy any Sipra sy Kirena izay tonga tany Antiokia, niresaka tamin’ny Grika koa ary nitory an’i Jesosy Tompo.

²¹Ary ny tanan’ny Tompo nomba azy ireo ka maro no isan’izay nino sy niverina ho amin’ny Tompo.

²²Rehefa tonga tany an-tsofin’ny fiangonana tany Jerosalema ny amin’ireo dia naniraka an’i Barnabasy izy handeha hatrany Antiokia.

²³Nony tonga tany izy dia nahita ny fahasoavan’Andriamanitra ka faly ary nananatra azy rehetra haharitra ao amin’ny Tompo amin’ny fo minia fatratra.

²⁴Lehilahy tsara fanahy sady feno ny Fanahy Masina sy finoana mantsy izy; ary marobe ny olona nanampy ho an’ny Tompo.

²⁵Dia lasa nankany Tarsosy i Barnabasy mba hitady an’i Saoly.

²⁶Rehefa nahita azy izy dia nitondra azy hankany Antiokia. Ary niara-niasa tao amin’ny fiangonana nandritra ny herintaona ngarangidina izy roa lahy ka nampianatra olona maro; ary tany Antiokia no voalohany niantsoana ny anaran’ny mpianatra hoe Kristiana.

²⁷Tamin’izany andro izany dia nisy mpaminany sasany avy tany Jerosalema nankany Antiokia.

²⁸Nitsangana ny iray tamin’ireny, izay antsoina hoe Agabo; voatsindrin’ny Fanahy izy ka nilaza fa hisy mosary be manerana ny tany rehetra. Tonga tokoa io tamin’ny andron’i Klaodio.

²⁹Ary ny mpianatra dia nanapa-kevitra hampitondra zavatra araka ny ananany avy hamonjena ny rahalahy izay nonina tany Jodia*.

³⁰Dia nataony izany, ary ny tanan’i Barnabasy sy i Saoly no nampitondrainy izany ho any amin’ny loholona[2].