Read La Bible en Malgache Asan’ny Apostoly 14 Bible Online

Asan’ny Apostoly 14 - La Bible en Malgache bible

Asan’ny Apostoly 14

¹Nony tany Ikonioma i Paoly sy i Barnabasy dia niara-niditra tao amin’ny sinagogan’ny Jiosy* izy ireo ka nitoriteny tao, ary olona betsaka no nino, na Jiosy na Grika.

²Fa ny Jiosy izay tsy nino dia nandrisika sy nanome sain-dratsy ny Jentilisa* hanohitra ny rahalahy.

³Nijanona naharitra tao anefa izy ireo ary nitory tamin’ny fahasahiana noho ny fahatokiany ny Tompo, izay nanome vavolombelona hanamarina ny tenin’ny fahasoavany ka nampanao famantarana sy fahagagana tamin’ny tanan’izy ireo.

⁴Dia nisara-tsaina ny vahoaka tao an-tanàna, ny sasany nomba ny Jiosy fa ny sasany kosa dia nomba ny Apostoly.

⁵Niray tetika ny Jentilisa sy ny Jiosy mbamin’ny loholony hampijaly sy hitora-bato azy ireo,

⁶koa rehefa fantatr’izy ireo izany dia nandositra nankany Listra sy Derbe, tanàna any Likaonia, sy tany amin’ny manodidina izy,

⁷ary tany no nitorian’izy ireo ny Filazantsara.

⁸Nisy lehilahy iray nipetraka tany Listra, nalemy tongotra hatrany an-kibon-dreniny ka tsy afaka namindra;

⁹nahare an’i Paoly nitoriteny izy; ary nony nibanjina azy mafy i Paoly ka nahita fa nanam-pinoana hositranina izy

¹⁰dia niteny tamin’ny feo mahery hoe: Mitsangàna ary mijoroa amin’ny tongotrao. Dia nitsambikina Ralehilahy ka nandehandeha.

¹¹Nony hitan’ny vahoaka izay zavatra nataon’i Paoly izay dia nanandratra ny feony izy ka niteny tamin’ny fitenin’ny Likaoniana hoe: Efa nidina nankaty amintsika ny andriamanitra maka ny endriky ny olona!

¹²Koa ny anaran’i Barnabasy dia nataony hoe Jopitera, ary i Paoly kosa dia Merkiora, satria izy no mpitondra teny.

¹³Niaraka tamin’ny vahoaka teo koa ilay mpisoron’i Jopitera teo anoloan’ny tanàna ka nitondra ombilahy voaravaka voninkazo ho eo am-bavahady izy ary nikasa hanao fanatitra.

¹⁴Fa nony nahare izany i Barnabasy sy i Paoly, apostoly, dia nandriatra ny fitafiany ka niantoraka nankeo afovoan’ny olona sady niantso hoe:

¹⁵Tompokolahy, ahoana no anaovanareo izao? Olona tahaka anareo ihany izahay ary mitory ny Filazantsara aminareo mba hialanareo amin’izao zava-poana izao ka hanatonanareo an’Andriamanitra velona izay nanao ny lanitra sy ny tany ary ny ranomasina mbamin’izay rehetra ao anatiny.

¹⁶Izy dia namela ny firenena rehetra nandeha tamin’ny lalana tiany naleha tamin’ny andro lasa.

¹⁷Nefa Izy tsy namela ny tenany tsy hanana vavolombelona tamin’ny fanaovany soa: Mampilatsaka ny ranonorana avy eny amin’ny lanitra ho anareo Izy sady manome taon-jina ka mahavoky anareo amin’ny hanina ary mahafeno fifaliana ny fonareo.

¹⁸Nefa na dia nilaza izany aza izy dia saika tsy nahasakana ny olona tsy hamono zavatra hatao fanatitra aminy.

¹⁹Nisy Jiosy* tonga avy tany Antiokia sy Ikonioma, izay nitaona ny vahoaka ka nitora-bato an’i Paoly, dia nitarika azy ho eny ivelan’ny tanàna satria noheveriny fa efa maty izy.

²⁰Nefa nony nanodidina azy ny mpianatra dia nitsangana izy ka nankao an-tanàna. Nony ampitso dia niala tao izy sy i Barnabasy ka nankany Derbe.

²¹Rehefa nitory ny Filazantsara tamin’izany tanàna izany izy ka nahazo mpianatra maro dia niverina nankany Listra sy Ikonioma ary Antiokia indray,

²²nampahery ny fanahin’ny mpianatra ka nananatra azy haharitra amin’ny finoana sady nilaza fa tsy maintsy ho amin’ny fahoriana be no hidirantsika ao amin’ny fanjakan’Andriamanitra.

²³Nanendry loholona[3] ho azy ireo teo amin’ny isam-piangonana izy, dia nivavaka sady nifady hanina ary nanolotra azy ho an’ny Tompo izay efa ninoany.

²⁴Rehefa nandeha namakivaky an’i Pisidia izy dia tonga tany Pamfilia.

²⁵Nony avy nitory ny teny tany Perga izy dia nidina nankany Atalia.

²⁶Avy eo izy dia niondrana an-tsambo hankany Antiokia, izay efa nanolorana azy ho amin’ny fahasoavan’Andriamanitra mba hanao ny asa izay efa novitainy.

²⁷Rehefa tonga tao izy ka namory ny fiangonana dia nilaza izay rehetra nataon’Andriamanitra tamin’ny niarahany taminy sy ny namohany ny varavaran’ny finoana ho an’ny Jentilisa*.

²⁸Dia nijanona elaela ihany teo amin’ireo mpianatra izy.