Read La Bible en Malgache Asan’ny Apostoly 15 Bible Online

Asan’ny Apostoly 15 - La Bible en Malgache bible

Asan’ny Apostoly 15

¹Nisy olona sasany izay nidina avy tany Jodia* nampianatra ny rahalahy hoe: Raha tsy foràna araka ny fanaon’i Mosesy ianareo dia tsy azo vonjena.

²Rehefa nifandìtra sy niady hevitra be ihany tamin’ireo i Paoly sy i Barnabasy dia nifanarahana ny hiakaran’izy roa lahy sy ny sasany koa hankany Jerosalema ho any amin’ny Apostoly sy ny loholona[4] mba hanadina ny amin’izany zavatra niadian-kevitra izany.

³Namatsy azy tamin’izay nilainy ny fiangonana, dia nandeha namakivaky an’i Foinika sy Samaria izy ka nitantara ny niovan’ny Jentilisa*; ary nahafaly ny rahalahy rehetra tokoa izany.

⁴Rehefa tonga tany Jerosalema izy ireo dia noraisin’ny fiangonana sy ny Apostoly ary ny loholona ka nilaza izay rehetra efa nataon’Andriamanitra tamin’ny niarahany taminy.

⁵Fa ny mino sasany izay isan’ny antokon’ny Fariseo* kosa dia nitsangana ka niteny hoe: Tsy maintsy foràna ireny ka asaina mitandrina ny lalànan’i Mosesy.

⁶Dia nivory ny Apostoly sy ny loholona mba handinika izany zavatra izany.

⁷Rehefa nafana ny adihevitra dia nitsangana i Petera ka niteny taminy hoe: Ry rahalahy, fantatrareo fa hatramin’ny ela Andriamanitra no nifidy teo aminareo fa avy amin’ny vavako no handrenesan’ny Jentilisa* ny tenin’ny Filazantsara ka hinoany.

⁸Koa Andriamanitra izay mahalala ny fo dia vavolombelony tamin’ny nanomezany azy ny Fanahy Masina tahaka antsika koa,

⁹satria tsy nataony misy hafa isika sy izy fa nodioviny tamin’ny finoana ny fony.

¹⁰Koa nahoana ianareo no maka fanahy an’Andriamanitra amin’ny fametrahanareo zioga amin’ny vozon’ny mpianatra, zioga izay tsy zakan’ny razantsika na isika hoentina?

¹¹Kanefa mino isika fa ny fahasoavan’i Jesosy Tompo no hamonjena antsika, dia tahaka izany ihany koa ny amin’izy ireo.

¹²Dia nangina ny olona rehetra ka nihaino an’i Barnabasy sy i Paoly izay nilaza ny famantarana sy ny fahagagana nampanaovin’Andriamanitra azy tany amin’ny Jentilisa.

¹³Rehefa nitsahatra tsy niteny izy roa lahy dia hoy i Jakoba: Ry rahalahy, mihainoa ahy!

¹⁴I Simeona dia efa nanambara izay nitsinjovan’Andriamanitra ny Jentilisa hatramin’ny voalohany mba handraisany firenena iray ho an’ny anarany.

¹⁵Mifanaraka amin’izany ny tenin’ny mpaminany, araka ny voasoratra hoe:

¹⁶«Rehefa afaka izany dia hiverina Aho ka hanangana indray ny tranolain’i Davida izay efa nianjera; ary hanangana indray izay efa rava ao Aho ka hanamboatra azy indray

¹⁷mba hitady ny Tompo ny olona sisa sy ny Jentilisa rehetra izay efa niantsoana ny anarako, hoy NY TOMPO izay manao izany zavatra izany,

¹⁸izay fantatra hatramin’ny voalohany indrindra» (Amo 9.11-12).

¹⁹Koa izao no hevitro: Tsy mety ny hanomezantsika fahasahiranana ireo avy amin’ny Jentilisa izay miverina ho amin’Andriamanitra;

²⁰fa aoka hanoratra epistily ho azy isika mba hifadiany ny hena fahavetavetana aterina amin’ny sampy sy ny fijangajangana ary ny biby nokendaina sy ny ra.

²¹Fa hatramin’ny razana fahiny dia manana izay mitory azy ao amin’ny isan-tanàna i Mosesy ary vakina ao amin’ny sinagoga* rehetra isan-tSabata ny teniny.

²²Ary sitraky ny Apostoly sy ny loholona[5] mbamin’ny fiangonana manontolo ny hifidy olona avy amin’izy ireo hirahina hiaraka amin’i Paoly sy i Barnabasy hankany Antiokia, koa i Joda izay antsoina hoe Barsabasy sy i Silasy, samy mpitarika teo amin’ny rahalahy, no voafidy;

²³dia nanoratra izao taratasy izao izy hoentin’ireo: Ny Apostoly sy ny rahalahy loholona dia miarahaba ny rahalahy avy amin’ny Jentilisa* any Antiokia sy Siria ary Kilikia.

²⁴Satria efa renay fa ny sasany izay avy tatỳ aminay dia tonga ka nitondra teny nampitabataba anareo ka nampikorontana ny sainareo, kanefa tsy nampanao izany izahay,

²⁵dia sitrakay, rehefa nifanara-kevitra izahay, ny hifidy olona hirahina hankaty aminareo hiaraka amin’i Barnabasy sy i Paoly malalanay,

²⁶lehilahy izay nanao ny ainy tsy ho zavatra ho voninahitry ny anaran’i Jesosy Kristy* Tompontsika.

²⁷Koa nirahinay i Joda sy i Silasy hilaza am-bava aminareo izao hafatra izao koa.

²⁸Fa sitraky ny Fanahy Masina sy izahay ny tsy hampitondra enta-mavesatra anareo afa-tsy izao zavatra tsy maintsy hotandremana izao ihany:

²⁹Ny hifadianareo ny hena aterina amin’ny sampy, ny ra, ny biby kendaina ary ny fijangajangana; hahasoa anareo raha mahatandrin-tena hifady izany ianareo. Veloma.

³⁰Rehefa nalefany izy ireo dia nidina nankany Antiokia; ary namory ny olona maro izy dia natolony ilay epistily.

³¹Novakina izany ary nifaly tamin’ny fananarana tao ny olona.

³²Koa satria mpaminany i Joda sy i Silasy, dia nananatra ny rahalahy tamin’ny teny maro izy sady nampahery azy.

³³Ary rehefa nijanona elaela teo izy ireo dia nampandehanin’ny rahalahy soa amantsara hiverina any amin’izay naniraka azy.

³⁴Nefa mbola satrin’i Silasy nijanona teo.

³⁵Fa i Paoly sy i Barnabasy kosa dia nipetraka tany Antiokia; dia nampianatra sy nitory ny tenin’ny Tompo niaraka tamin’ny maro hafa koa izy roa lahy.

³⁶Rehefa afaka andro vitsivitsy dia hoy i Paoly tamin’i Barnabasy: Andeha isika hiverina hamangy ny rahalahy any amin’ny tanàna rehetra izay efa nitoriantsika ny tenin’ny Tompo mba hahafantarantsika ny momba azy.

³⁷Te hitondra an’i Jaona izay antsoina hoe Marka, hiaraka aminy i Barnabasy;

³⁸nefa noheverin’i Paoly fa tsy tokony hoentiny miaraka aminy izy, satria nandao azy tany Pamfilia ka tsy niaraka taminy nanao ny raharaha.

³⁹Dia nifanditra mafy izy roa lahy ka nisaraka; ary nitondra an’i Marka i Barnabasy ary niondrana an-tsambo nankany Sipra.

⁴⁰Fa nifidy an’i Silasy kosa i Paoly, dia niainga rehefa natolotry ny rahalahy ho amin’ny fahasoavan’ny Tompo izy.

⁴¹Dia nandeha namakivaky an’i Siria sy Kilikia izy ka nampahery ny fiangonana tany.