Read La Bible en Malgache Asan’ny Apostoly 18 Bible Online

Asan’ny Apostoly 18 - La Bible en Malgache bible

Asan’ny Apostoly 18

¹Taorianan’izany dia niala tany Atena i Paoly ka nankany Korinto.

²Nahita Jiosy* iray antsoina hoe Akoila avy any Ponto, vao tonga avy tany Italia, niaraka tamin’i Prisila vadiny izy; i Klaodio mantsy dia efa nandidy ny Jiosy rehetra hiala tany Roma; dia nankao amin’izy mivady i Paoly.

³Koa satria nitovy raharaha taminy izy ireo, dia nipetraka tao aminy i Paoly ka niasa satria mpanao tranolay no raharahan’izy mivady.

⁴Niady hevitra isan-tSabata tao amin’ny sinagoga* i Paoly ka nandresy lahatra ny Jiosy sy ny Grika.

⁵Rehefa tafidina avy tany Makedonia i Silasy sy i Timoty dia nanokan-tena ho amin’ny teny i Paoly ka nanambara tamin’ny Jiosy fa Jesosy no Kristy*.

⁶Nony nanohitra sy niteny ratsy ireo dia nanopakopa-damba izy ka niteny taminy hoe: Aoka ho eo an-dohanareo ny ranareo; afaka aho; amin’izao sisa izao dia hankany amin’ny Jentilisa* aho.

⁷Rehefa niala teo izy dia niditra tao an-tranon’ny lehilahy antsoina hoe Titosy Josto izay nivavaka tamin’Andriamanitra; ary ny tranony dia teo akaikin’ny sinagoga.

⁸I Krispo, lehiben’ny sinagoga mbamin’ny ankohonany rehetra dia nino ny Tompo; maro koa ny Korintiana, raha nandre, no nino ka natao batisa.

⁹Ary niteny tamin’i Paoly tamin’ny fahitana ny Tompo nony alina hoe: Aza matahotra, fa mitenena ihany ka aza mangina;

¹⁰fa Izaho momba anao ary tsy hisy olona hihazona anao hanisy ratsy anao; fa manana olona maro amin’ity tanàna ity Aho.

¹¹Naharitra herintaona sy enim-bolana teo izy ary nampianatra ny tenin’Andriamanitra teo aminy.

¹²Fony i Galiona governora tany Akaia dia niray tetika hisambotra an’i Paoly ny Jiosy* ary nitondra azy nankeo amin’ny fitsarana

¹³ka nilaza hoe: Ilehio dia mampanaiky ny olona hivavaka amin’Andriamanitra nefa tsy araka ny lalàna.

¹⁴Ary raha iny handray fitenenana iny i Paoly dia hoy i Galiona tamin’ny Jiosy: Ry Jiosy, raha misy heloka na zavatra ratsy natao dia ho niaritra nihaino ny teninareo aho;

¹⁵fa raha adihevitra momba ny teny sy ny anaran’olona ary ny lalànanareo kosa dia ataovinareo ihany; fa izaho tsy te hitsara izany raharaha izany.

¹⁶Ary nandroaka azy hiala teo anoloan’ny fitsarana izy.

¹⁷Dia nisambotra an’i Sostena lehiben’ny sinagoga* izy rehetra ka nikapoka azy teo anoloan’ny fitsarana. Nefa tsy nahoan’i Galiona izany zavatra izany.

¹⁸Mbola nijanona teo andro maromaro ihany i Paoly, ary rehefa nanao veloma ny rahalahy izy dia niondrana an-tsambo nankany Siria; niaraka taminy koa i Prisila sy i Akoila; dia nohetezany tany Kenkrea ny volony satria efa nivoady izy.

¹⁹Rehefa tonga tany Efesosy izy ireo dia nandao azy teo i Paoly ka lasa niditra tao amin’ny sinagoga* ary niady hevitra tamin’ny Jiosy*.

²⁰Dia nangataka azy hijanona elaela kokoa ny olona nefa tsy nety izy,

²¹fa nanao veloma azy hoe: Mbola hiverina hankaty aminareo indray aho raha sitrapon’Andriamanitra. Dia niondrana an-tsambo niala tany Efesosy izy.

²²Rehefa tafatody tany Kaisaria izy dia niakatra ka niarahaba ny fiangonana vao nidina nankany Antiokia.

²³Rehefa elaela ihany no nijanonany tao dia lasa nandeha nitety ny tany Galatia sy Frigia izy ka nampahery ny mpianatra rehetra.

²⁴Tonga tany Efesosy ny Jiosy* iray antsoina hoe Apolosy izay avy any Aleksandria, lehilahy nahay nandaha-teny sady tena mahay Soratra Masina.

²⁵Izany lehilahy izany dia efa nampianarina ny lalan’ny Tompo; ary nafana fo ka niteny sy nampianatra marina ny amin’i Jesosy izy, saingy ny batisan’i Jaona ihany no fantany.

²⁶Nanomboka niteny tamin’ny fahasahiana teo amin’ny sinagoga* izy, koa rehefa nandre azy i Prisila sy i Akoila dia nandray azy hankao aminy ka nampianatra azy marimarina kokoa ny amin’ny lalànan’Andriamanitra.

²⁷Naniry handroso hankany Akaia izy ka nampirisika azy ny rahalahy sady nanoratra taratasy ho any amin’ny mpianatra mba handray azy tsara; ary rehefa tonga tany izy dia nanampy be dia be ireo izay efa nino noho ny fahasoavana,

²⁸fa izy dia nahery nandresy lahatra ny Jiosy teo imason’ny olona ka naneho marimarina tamin’ny alalan’ny Soratra Masina fa Jesosy no Kristy*.