Read La Bible en Malgache Asan’ny Apostoly 21 Bible Online

Asan’ny Apostoly 21 - La Bible en Malgache bible

Asan’ny Apostoly 21

¹Rehefa tafasaraka tamin’ireo izahay dia niondrana an-tsambo ka nizotra nankany Kosy; nony ampitso dia tonga tao Rodo, dia niala tao nankany Patara;

²rehefa nahita sambo nita ho any Foinika izahay dia nifindra sambo teo ka lasa nandeha.

³Nony nahatsinjo an’i Sipra izahay dia nandalo azy tamin’ny ankavia ka nankany Siria ary niantsona tao Tiro satria tao no nesorina ny entan’ny sambo.

⁴Nitady ny mpianatra izahay ka nahita azy, dia nijanona teo nandritra ny herinandro; ary izy ireo dia voatsindrin’ny Fanahy hilaza amin’i Paoly mba tsy hiakatra any Jerosalema.

⁵Rehefa tapitra ny fotoana nijanonana teo dia niainga izahay ka lasa nandeha ary naterin’izy rehetra mbamin’ny vady aman-janany hatrany ivelan’ny tanàna; ary nandohalika teo amoron-dranomasina izahay ka nivavaka;

⁶rehefa nifanao veloma izahay dia niondrana an-tsambo; fa izy ireo kosa dia niverina nody.

⁷Ny niafaran’ny dianay an-tsambo dia tany Ptolemaia rehefa avy tany Tiro; niarahaba ny rahalahy izahay ka nijanona indray andro teo aminy.

⁸Ny ampitso dia niala teo izahay ka tonga tany Kaisaria ary niditra tao an-tranon’i Filipo evanjelista izay iray tamin’izy fito lahy ary nipetraka tao aminy izahay.

⁹Izany lehilahy izany dia nanana zanakavavy virijiny efatra izay samy naminany.

¹⁰Rehefa nitoetra tao nandritra ny andro maromaro izahay dia nisy mpaminany iray antsoina hoe Agabo nidina avy tany Jodia*.

¹¹Nony tonga tao aminay izy dia noraisiny ny fehikibon’i Paoly ka namatorany ny tongotra aman-tanany sady hoy izy: Izao no lazain’ny Fanahy Masina: Toy izao no hamatoran’ny Jiosy* any Jerosalema ny lehilahy tompon’ity fehikibo ity sy hanolorany azy ho eo an-tanan’ny Jentilisa*.

¹²Raha vao renay izany dia nangataka tamin’i Paoly izahay mbamin’izay nonina teo mba tsy hiakatra any Jerosalema.

¹³Nefa hoy ny navalin’i Paoly: Nahoana ianareo no mitomany ka mampangorakoraka ny foko? Vonona aho, tsy ny hafatotra ihany, fa ny ho faty any Jerosalema koa aza mba ho voninahitry ny anaran’i Jesosy Tompo.

¹⁴Rehefa tsy nanaiky izy dia nionona izahay ka niteny hoe: Aoka ny sitrapon’ny Tompo no hatao.

¹⁵Taorianan’izany dia nifehy entana izahay ka niakatra nankany Jerosalema.

¹⁶Dia niaraka taminay koa ny mpianatra sasany avy tany Kaisaria, izay nitondra anay ho any amin’i Menasona avy any Sipra, mpianatra tranainy, izay nandray anay ho vahiny tao aminy.

¹⁷Rehefa tonga tany Jerosalema izahay dia nandray anay tamin’ny fifaliana ny rahalahy tany.

¹⁸Nony ampitso dia niaraka taminay nankao amin’i Jakoba i Paoly; vory teo koa ny loholona[11] rehetra.

¹⁹Dia niarahaba azy ireo i Paoly ary nilaza tamin’ny antsipiriany ny zavatra rehetra izay nataon’Andriamanitra azy tany amin’ny Jentilisa* tamin’ny alalan’ny fanompoany.

²⁰Rehefa nandre izany ireo dia nankalaza an’Andriamanitra. Ary hoy koa izy tamin’i Paoly: Hitanao, ry rahalahy, fa tsy omby alinalina ny Jiosy* izay efa mino; ary fatra-pitana ny lalàna izy rehetra;

²¹efa novokisan’olona ny momba anao anefa izy ireo, fa ianao, hono, dia mampianatra ny Jiosy rehetra izay any amin’ny Jentilisa hahafoy an’i Mosesy ka mandrara azy tsy hamora ny zanany na hanaraka ny fanaon-drazany.

²²Inona ary no izy? Tsy maintsy ho ren’izy ireo ny nahatongavanao.

²³Noho izany dia ataovy izao lazainay aminao izao: Misy efa-dahy izay nanao voady atỳ aminay,

²⁴koa raiso ireo ary manadiova ny tenanao miaraka aminy, dia aloavy ny vola ho lany mba hanaratany ny lohany; ho fantatry ny olona rehetra amin’izay fa tsinontsinona ny zavatra namokisana azy ny aminao, fa ianao koa aza dia mandeha manaraka ny lalàna.

²⁵Ny amin’ny Jentilisa izay efa mino kosa dia efa nampitondra epistily ho azy izahay ka nasainay nifady ny hena aterina amin’ny sampy, ny ra, ny biby kendaina ary ny fijangajangana izy ireo.

²⁶Dia noraisin’i Paoly ireo lehilahy ireo ary nony ampitso dia nanadio ny tenany niaraka taminy izy ka niditra teo amin’ny tempoly*, dia nambarany ny fotoana fahatanterahan’ny andro fidiovana mba hanoloran’ny isan-dahy ny fanatitra.

²⁷Rehefa ho tapitra ny herinandro dia nahita an’i Paoly teo amin’ny tempoly* ny Jiosy* avy tany Azia ka nampikotaba ny vahoaka rehetra sady nisambotra an’i Paoly,

²⁸no niantso hoe: Ry lehilahy Israelita, vonjeo! Io ilay lehilahy mampianatra ny olona rehetra hatraiza hatraiza hanohitra ny vahoaka sy ny lalàna ary ity toerana ity sady nampiditra Grika tao amin’ny tempoly ka nandoto ity fitoerana masina ity!

²⁹Nahita an’i Trofimo efesiana niaraka taminy tao an-tanàna mantsy izy ireo ka noheveriny fa nampidirin’i Paoly tao amin’ny tempoly izy.

³⁰Dia nifanaritaka be ihany ny tao an-tanàna rehetra, nihazakazaka ny olona ka tafavory; dia nosamboriny i Paoly ka nosarihiny niala teo amin’ny tempoly; ary niaraka tamin’izay dia narindrina ny vavahady.

³¹Raha nitady hamono azy ny olona dia nisy teny nakarina tany amin’ny mpifehy arivo tamin’ny antokon’ny miaramila nilaza fa mikotaba i Jerosalema manontolo;

³²niaraka tamin’izay ary dia naka miaramila sy kapiteny izy nihazakazaka nidina nankeo aminy; rehefa nahita ny mpifehy arivo sy ny miaramila ny olona dia nitsahatra tsy nikapoka an’i Paoly intsony.

³³Ary nanatona akaiky ny mpifehy arivo dia nisambotra azy ka nandidy hamatotra azy tamin’ny gadra roa sady nanontany hoe: Iza moa izy, ary inona no nataony?

³⁴Fa ny sasany tamin’ny vahoaka niantso mafy nilaza zavatra iray, ary ny sasany kosa zavatra hafa; koa rehefa tsy azony nofantarina izay marina noho ny tabataba dia nasainy noentina ho any anaty rova i Paoly.

³⁵Rehefa tonga teo amin’ny zanatohatra izy dia nobatain’ny miaramila noho ny fifanosehan’ny olona

³⁶satria maro ireo olona nanaraka ka niantsoantso hoe: Vonoy Ilehio!

³⁷Rehefa noentiny tany anaty rova i Paoly dia hoy izy tamin’ny mpifehy arivo: Mahazo miteny aminao va aho? Dia hoy izy: Mahay teny grika va ianao?

³⁸Moa tsy ianao va ilay Ejiptiana izay nampikomy ny olona vao haingana ka nitarika efatra arivo lahy mpitondra lefom-pohy nankany an-tany efitra?

³⁹Fa hoy i Paoly: Izaho dia Jiosy* avy any Tarsosy any Kilikia, tompon-tany amin’izay tanàna tsy kely laza; koa miangavy anao aho, avelao re aho mba hiteny amin’ny olona.

⁴⁰Rehefa navelany i Paoly dia nitsangana teo amin’ny zanatohatra ka nanofa tanana tamin’ny olona. Rehefa nangina tsara ny olona, dia niteny mafy tamin’ny teny hebreo izy hoe: