Read La Bible en Malgache Asan’ny Apostoly 22 Bible Online

Asan’ny Apostoly 22 - La Bible en Malgache bible

Asan’ny Apostoly 22

¹Ry rahalahy sy ianareo ray, henoy ny teny halahatro aminareo ankehitriny hanala tsiny ny tenako.

²Nony ren’ny olona fa teny hebreo no nitenenany taminy dia vao mainka nangina izy ireo ka hoy i Paoly:

³Lehilahy jiosy aho, teraka tany Tarsosy any Kilikia, nefa teto amin’ity tanàna ity no nahabe ahy teo anilan’ny tongotr’i Gamaliela ka nampianarina tsara ny lalàna avy tamin’ny razana aho ary saro-piaro tokoa tamin’Andriamanitra tahaka anareo rehetra ireo ankehitriny.

⁴Nanenjika izay nanaiky izany fampianarana izany aho na hahafaty azy aza izany, ary namatotra azy, na lahy na vavy ka nanolotra azy hatao an-tranomaizina;

⁵ny Mpisoronabe* sy ny loholona rehetra no vavolombeloko, sady izy no nandraisako taratasy ho any amin’ny rahalahy, dia nankany Damaskosy aho mba hoentiko mifatotra hankany Jerosalema koa ireo izay hita tany mba hofaizina.

⁶Ary raha nandeha aho ka efa nanakaiky an’i Damaskosy, tamin’ilay mitataovovonana iny, dia nisy mazava lehibe nanelatselatra tampoka avy tany an-danitra manodidina ahy

⁷ka lavo tamin’ny tany aho ary nandre feo niteny tamiko hoe: Saoly! Saoly! Nahoana no manenjika Ahy ianao?

⁸Dia hoy aho: Iza moa Ianao, Tompoko? Ary hoy Izy tamiko: Izaho no Jesosy avy any Nazareta, izay enjehinao.

⁹Ireo izay niaraka tamiko dia nahita ny mazava, fa tsy mba nahare ny feon’Ilay niteny tamiko.

¹⁰Hoy indray aho: Tompoko, inona no hataoko? Ary hoy ny Tompo tamiko: Mitsangàna ka mandehana ho any Damaskosy; fa any no holazaina aminao izay rehetra voatendry hataonao.

¹¹Raha tsy nahajery noho ny famirapiratan’ilay hazavana aho dia notantanan’ireo niaraka tamiko ary tonga tany Damaskosy.

¹²Ary ny lehilahy iray antsoina hoe Ananiasy, mpivavaka manaraka ny lalàna sady tsara laza teo amin’ny Jiosy* rehetra izay nonina teo,

¹³dia nanatona ahy ary nitsangana ka niteny tamiko hoe: Ry Saoly rahalahy, mahirata. Ary tamin’izany ora izany dia nahiratra aho ka nahita azy.

¹⁴Dia hoy izy: Andriamanitry ny razantsika efa nanendry anao hahafantatra ny sitrapony sy hahita Ilay Marina ary hihaino ny teny aloaky ny vavany;

¹⁵fa ho vavolombelony amin’ny olona rehetra ianao ny amin’izay efa hitanao sy renao.

¹⁶Ary ankehitriny, inona no andrasanao? Mitsangàna, aoka ianao hatao batisa ka hosasana ho afaka amin’ny fahotanao amin’ny fiantsoanao ny anarany.

¹⁷Ary rehefa tonga tany Jerosalema indray aho ka nivavaka teo amin’ny tempoly* dia azon-tsindrimandry

¹⁸ka nahita Azy nilaza tamiko hoe: Malakisa ianao, mialà haingana eto Jerosalema; fa tsy handray ny fanambarànao Ahy izy.

¹⁹Dia hoy aho: Tompoko, izy ireo dia mahalala fa ny mino Anao dia nataoko tao an-tranomaizina sady nokapohiko tao amin’ny sinagoga* rehetra;

²⁰ary raha nalatsaka ny ran’i Stefana maritioranao dia mba nitsangana teo koa aho ka nankasitraka sady niambina ny fitafian’ireo izay namono azy.

²¹Hoy Izy tamiko: Mandehana, fa Izaho haniraka anao handeha lavitra any amin’ny Jentilisa*.

²²Nihaino azy hatramin’izany teny izany ny olona dia nanandratra ny feony ka niteny hoe: Esory amin’ny tany Ilehio fa tsy tokony hovelomina!

²³Dia niantsoantso izy ireo sady nanala ny fitafiany ary nanipy vovoka ho amin’ny rivotra

²⁴ka nanome baiko ny mpifehy arivo mba hoentina any an-dapa i Paoly, ary mba hadinina amin’ny kapoka izy, hahafantarany izay fototry ny nanakoran’ny olona azy toy izany.

²⁵Raha namatotra azy tamin’ny kofehy hoditra izy dia hoy i Paoly tamin’ny kapiteny izay nitsangana teo: Azonareo atao va ny mikapoka lehilahy romana izay tsy mbola nohelohina?

²⁶Nony nahare izany ilay kapiteny dia lasa nilaza tamin’ny mpifehy arivo hoe: Inona izao no hataonao fa Romana io lehilahy io?

²⁷Dia nankeo aminy ny mpifehy arivo ka niteny taminy hoe: Lazao amiko: Romana va ianao? Dia hoy izy: Eny.

²⁸Hoy ilay mpifehy arivo: Vola be no nahazoako izany zo izany. Fa hoy i Paoly: Izaho kosa efa nanana izany hatry ny fony vao teraka.

²⁹Dia nandao azy haingana ireo olona efa handeha hanadina azy; natahotra koa ny mpifehy arivo, rehefa nahalala fa Romana izy, satria efa nampamatotra azy.

³⁰Nony ampitso, satria ta hahafantatra marina izay niampangan’ny Jiosy* azy ny mpifehy arivo, dia namaha azy, ary nasainy nivory ny lehiben’ny mpisorona sy ny Sinedriona* rehetra, dia noentiny nidina i Paoly ka napetrany teo anatrehany.