Read La Bible en Malgache Asan’ny Apostoly 24 Bible Online

Asan’ny Apostoly 24 - La Bible en Malgache bible

Asan’ny Apostoly 24

¹Nony afaka hadimiana dia nidina i Ananiasy mpisoronabe* mbamin’ny loholona sasany sy i Tertilo mpandaha-teny ary nanambara tamin’ny governora ny niampangany an’i Paoly.

²Rehefa nantsoina izy dia niampanga azy i Tertilo ka niteny hoe: Ianao no anananay fandriampahalemana lehibe ary ny fitondranao no nahatonga fanatsarana ity firenena ity;

³koa raisinay amin’ny fankasitrahana mandrakariva eny tontolo eny izany, ry Feliksa tsara indrindra ô.

⁴Mba tsy hitazonako anao ela loatra dia miangavy anao aho, mba henoy kely amin’ny faharetana izahay.

⁵Io lehilahy io mantsy dia hitanay fa tena ratsy fanahy sady mpampikomy ny Jiosy* rehetra maneran-tany; izy no mpitarika ilay antoko atao hoe Nazareana.

⁶Nitady handoto ny tempoly* koa izy io; koa izany no nisamboranay azy; tianay hotsaraina araka ny lalànanay izy.

⁷Nefa tonga i Lisia, mpifehy arivo, dia nanao an-keriny ka naka azy teo an-tananay. Ary nasainy nankaty aminao ny mpiampanga azy.

⁸Koa rehefa manadina azy ianao dia ho fantatrao marina izay rehetra iampanganay azy.

⁹Niara-nanaiky ny Jiosy sady nilaza fa izany tokoa no izy.

¹⁰Rehefa notondroin’ny governora hiteny i Paoly dia nilaza hoe: Fantatro fa mpitsara amin’ity firenena ity hatry ny ela ianao ka faly aho handaha-teny hanala tsiny ny tenako;

¹¹azonao fantarina fa mbola tsy mihoatra noho ny roa amby folo andro izay no niakarako hivavaka tany Jerosalema.

¹²Tsy nisy nahita ahy niady hevitra tamin’olona teo amin’ny tempoly*, na nampitabataba ny vahoaka tao amin’ny sinagoga*, na tao an-tanàna;

¹³ary tsy hain’ireo olona ireo hamarinina eto anatrehanao izay zavatra iampangany ahy ankehitriny.

¹⁴Izao kosa no ekeko eto anatrehanao, fa araka ilay fampianarana izay ataony hoe antoko no anompoako ny Andriamanitry ny razako, sady inoako izay rehetra voasoratra ao amin’ny Lalàna sy ny Mpaminany,

¹⁵ary manana fanantenana amin’Andriamanitra aho, izay antenain’izy ireo koa, dia ny hisian’ny fitsanganan’ny marina sy ny tsy marina.

¹⁶Amin’izany dia mikely aina koa aho mba hanana mandrakariva fieritreretana tsy manameloka ahy na amin’Andriamanitra na amin’olombelona.

¹⁷Nony afaka taona maro dia tonga aho hitondra fiantrana sy fanatitra ho an’ny fireneko.

¹⁸Koa tamin’izay no hitany voadio teo amin’ny tempoly aho, tsy niaraka tamin’olona maro anefa aho tamin’izany, na tamin’ny fitabatabana, fa Jiosy* sasany avy any Azia no teo;

¹⁹izy ireo no tokony hiseho eto anatrehanao mba hiampanga ahy, raha toa misy izay hiampangany ahy.

²⁰Na aoka ireto olona ireto ihany no hilaza izay ratsy hitany, raha nitsangana teo anatrehan’ny Sinedriona* aho,

²¹afa-tsy izao teny iray loha izao ihany angaha, dia ilay nolazaiko mafy raha nijoro teo afovoany aho hoe: Ny amin’ny fitsanganan’ny maty no itsarana ahy eto anatrehanareo anio.

²²Efa fantatr’i Feliksa tsara ihany ny amin’izany fampianarana izany, koa nasainy nandeha aloha izy rehetra ary hoy izy: Rehefa tafidina atỳ i Lisia, mpifehy arivo, dia hofotorako tsara ny raharahanareo.

²³Dia nandidy ny kapiteny izy mba hiambina an’i Paoly nefa hanome fahafahana azy ihany ka tsy handrara na iza na iza amin’ireo akaiky azy tsy hanompo azy.

²⁴Nony afaka andro vitsivitsy dia tonga i Feliksa niaraka tamin’i Drosila vadiny izay Jiosy*; nampaka an’i Paoly izy ka nihaino azy nitory ny finoana an’i Kristy* Jesosy.

²⁵Rehefa nitory ny amin’ny fahamarinana sy ny fifehezan-tena ary ny fitsarana ho avy izy dia raiki-tahotra i Feliksa ka niteny hoe: Mandehana aloha; fa raha misy fotoana malalaka dia hampaka anao indray aho.

²⁶Nanantena koa mantsy izy fa hanome vola azy i Paoly dia nampaka azy matetika izy ka niresaka taminy.

²⁷Rehefa afaka roa taona dia i Porsio Festosy no nandimby an’i Feliksa; ary ta hahazo sitraka tamin’ny Jiosy i Feliksa ka mbola notanany tao an-tranomaizina ihany i Paoly.