Read La Bible en Malgache Asan’ny Apostoly 3 Bible Online

Asan’ny Apostoly 3 - La Bible en Malgache bible

Asan’ny Apostoly 3

¹Niakatra ho eo amin’ny tempoly* i Petera sy i Jaona tamin’ny fotoam-pivavahana tamin’ny ora fahasivy.

²Dia nisy nitondra lehilahy nalemy tongotra hatrany an-kibon-dreniny, izay napetrany isanandro teo anoloan’ny vavahadin’ny tempoly, ilay antsoina hoe Itsaraendrika, mba hangataka fiantrana amin’izay niditra tao amin’ny tempoly;

³nony nahita an’i Petera sy i Jaona izay handeha hiditra ao amin’ny tempoly izy dia nangataka mba homena fiantrana.

⁴Nibanjina azy i Petera sy i Jaona ka niteny hoe: Mijere anay.

⁵Dia nijery tsara azy roa lahy izy satria nanantena hahazo zavatra taminy.

⁶Nefa hoy i Petera: Tsy manana volafotsy na volamena aho, fa izay ananako no omeko anao: Amin’ny anaran’i Jesosy Kristy* avy any Nazareta, mitsangàna ka mandehana.

⁷Dia noraisiny tamin’ny tanany havanana Ralehilahy ka natsangany; ary natanjaka niaraka tamin’izay ny tongony sy ny kitrokeliny.

⁸Ary niantsambotra izy ka nijoro dia nandeha ka niara-niditra taminy nankao amin’ny tempoly; sady nandehandeha nitsambikimbikina izy no nidera an’Andriamanitra.

⁹Nahita azy nandehandeha sy nidera an’Andriamanitra ny olona rehetra.

¹⁰Ary fantany tsara fa io no ilay nipetraka teo amin’ny vavahady Itsaraendrika, eo amin’ny tempoly, mba hiantrana; dia gaga sady talanjona izy ireo noho ity zava-nitranga tamin-dRalehilahy.

¹¹Raha mbola tsy niala teo amin’i Petera sy i Jaona izy dia niara-nirohotra ho eo amin’izy telo lahy teo amin’ny fialofana izay antsoina hoe Fialofan’i Solomona ny olona rehetra, sady talanjona.

¹²Rehefa nahita izany i Petera dia niteny tamin’ny vahoaka hoe: Ry lehilahy Israelita, nahoana ianareo no talanjona amin’izao zavatra izao? Ary nahoana ianareo no mandinika anay sahala amin’ny hoe herinay na fahamasinanay no nahatonga azy ho afa-mandeha?

¹³Andriamanitr’i Abrahama, Andriamanitr’Isaka ary Andriamanitr’i Jakoba, Andriamanitry ny razantsika, no nanome voninahitra an’i Jesosy Mpanompony, izay natolotrareo sy nolavinareo teo anatrehan’i Pilato, rehefa nokasainy halefa.

¹⁴Ianareo kosa dia nandà Ilay Masina sy Marina ka mpamono olona no nangatahinareo halefa ho anareo;

¹⁵fa ny Tompon’ny aina kosa novonoinareo; nefa Izy dia natsangan’Andriamanitra tamin’ny maty, ary vavolombelon’izany izahay.

¹⁶Ny finoana ny anarany no nampahatanjaka io lehilahy hitanareo sy fantatrareo io, noho ny anarany; eny, ny finoana izay azo amin’ny alalany no nahazoany izao fahasitranana feno izao teto imasonareo rehetra.

¹⁷Ankehitriny ary, ry rahalahy, fantatro fa tamin’ny tsy fahalalana no nanaovanareo izany, ary toy izany koa ny mpanapaka anareo.

¹⁸Nefa izany no nahatanterahan’Andriamanitra ny zavatra nampilazainy mialoha tamin’ny vavan’ny mpaminany rehetra, fa hiaritra fahoriana ny Kristiny.

¹⁹Koa mibebaha ianareo ary miverena mba hamafana ny fahotanareo

²⁰ka ho tonga ny fotoana famelombelomana anareo amin’ny fanatrehan’ny Tompo sy hanirahany ny Kristy* voatendry ho anareo, dia Jesosy,

²¹Ilay tsy maintsy noraisin’ny lanitra mandra-piavin’ny fotoana hamerenana ny zavatra rehetra, izay nampilazain’Andriamanitra ny mpaminaniny masina hatramin’ny taloha.

²²Fa hoy i Mosesy: «Mpaminany no hatsangan’NY TOMPO Andriamanitra ho anareo avy amin’ny rahalahinareo, tahaka ahy; izy no hohenoinareo amin’izay rehetra holazainy aminareo.

²³Fa izay rehetra tsy mihaino izany mpaminany izany dia haringana tsy ho eo amin’ny olona» (Deo 18.15, 19).

²⁴Ary ny mpaminany rehetra koa hatramin’i Samoela sy ireo taorianany, na iza na iza niteny, dia nanambara izao andro izao.

²⁵Ianareo no zanaky ny mpaminany sy ny fanekena nataon’Andriamanitra tamin’ny razanareo, raha hoy Izy tamin’i Abrahama hoe: «Amin’ny taranakao no hitahiana ny firenena rehetra ambonin’ny tany» (Gen 22.18).

²⁶Ho anareo aloha no nananganan’Andriamanitra ny Mpanompony ka nanirahany Azy mba hitahiana anareo amin’ny fialanareo tsirairay avy amin’ny faharatsianareo.