Read La Bible en Malgache Asan’ny Apostoly 4 Bible Online

Asan’ny Apostoly 4 - La Bible en Malgache bible

Asan’ny Apostoly 4

¹Raha mbola niteny tamin’ny vahoaka izy roa lahy dia indreo, tonga teo aminy ny mpisorona sy ny lehiben’ny mpiambina ny tempoly* ary ny Sadoseo*.

²Sosotra mantsy izy ireo noho ny nampianaran’ny Apostoly ny vahoaka sy ny nitoriany tamin’ny alalan’i Jesosy ny fitsanganana amin’ny maty.

³Dia nisambotra azy ireo izy ka nampiditra azy tao an-tranomaizina mandra-paharain’ny andro, satria efa hariva ny andro tamin’izay.

⁴Kanefa maro tamin’izay nandre ny teny no nino ka efa tokony ho dimy arivo ny isan’ny lehilahy.

⁵Nony ampitso dia niangona tany Jerosalema ny mpitondra sy ny loholona ary ny mpanoradalàna*

⁶mbamin’i Anasy mpisoronabe*, i Kaiafa, i Jaona, i Aleksandra ary izay rehetra mety ho havan’ny Mpisoronabe.

⁷Rehefa nataony teo ampovoany izy roa lahy dia nanontaniany hoe: Fahefana manao ahoana, na anarana manao ahoana, no nanaovanareo izao zavatra izao?

⁸Dia feno ny Fanahy Masina i Petera ka nilaza taminy hoe: Ry mpanapaka ny vahoaka sy loholona,

⁹raha nadinina izahay androany ny amin’ny asa tsara natao tamin’ny nahasitranana ilay lehilahy malemy,

¹⁰dia aoka ho fantatrareo rehetra sy ny vahoaka Israely rehetra fa ny anaran’i Jesosy Kristy* avy any Nazareta, izay nohomboinareo tamin’ny hazofijaliana, kanefa natsangan’Andriamanitra tamin’ny maty kosa, tamin’ny alalany no nitsanganan’io lehilahy sitrana io eto imasonareo.

¹¹«Ity no vato izay nolavinareo mpanao trano nefa tonga fehizoro» (Sal 118.22).

¹²Tsy misy famonjena avy amin’ny hafa na iza na iza; satria tsy misy anarana hafa ambanin’ny lanitra nomena ny olona izay hahazoantsika famonjena.

¹³Nony nahita ny fahasahian’i Petera sy i Jaona izy ireo sady nahalala fa tsy mba mpahay lalàna na nampianarina izy roa lahy, dia gaga; ary fantany tsara fa efa niaraka tamin’i Jesosy izy roa lahy.

¹⁴Rehefa nijery ilay lehilahy izay efa sitrana nitsangana niaraka taminy izy dia tsy hitany izay havaliny.

¹⁵Dia nasainy niala teo amin’ny Sinedriona* izy roa lahy, ary niara-nisaina ry zareo

¹⁶hoe: Hataontsika ahoana ireo lehilahy ireo? Fa efa nanao famantarana malaza tokoa izy ireo ary fantatry ny mponina rehetra eto Jerosalema izany ka tsy azontsika lavina.

¹⁷Kanefa mba tsy hielezan’izao amin’ny vahoaka intsony dia aoka horahonantsika izy ireo mba tsy hiteny amin’izany anarana izany intsony na amin’iza na amin’iza.

¹⁸Dia niantso azy ireo izy ka nandrara azy tsy hiteny na hampianatra amin’ny anaran’i Jesosy intsony.

¹⁹Fa i Petera sy i Jaona kosa dia namaly azy hoe: Tsaraonareo na marina eo imason’Andriamanitra na tsia, ny hanaiky anareo mihoatra noho Andriamanitra.

²⁰Fa izahay dia tsy maintsy milaza izay zavatra efa hitanay sy renay.

²¹Rehefa norahonany indray izy ireo dia nalefany satria tsy hitany izay hampijaliany azy noho ny tahony ny vahoaka; fa izy rehetra dia nankalaza an’Andriamanitra noho ny amin’ny zava-nitranga.

²²Efa mihoatra ny efapolo taona mantsy Ralehilahy izay nanaovana izany famantarana nanasitrana azy izany.

²³Rehefa nalefa izy roa lahy dia tonga teo amin’ny namany ka nanambara izay rehetra nolazain’ny lehiben’ny mpisorona sy ny loholona taminy.

²⁴Fa rehefa nandre izany izy ireo dia niara-nanandratra ny feony ho amin’Andriamanitra hoe: Tompo ô! Ianao no nanao ny lanitra sy ny tany ary ny ranomasina mbamin’izay rehetra ao anatiny,

²⁵ary ny Fanahy Masina no nampitenenanao an’i Davida razanay sady mpanomponao hoe: «Nahoana no mitabataba ny Jentilisa* ary misaina anoano foana ny firenena?

²⁶Ireo mpanjakan’ny tany dia nitsangana, ary ny mpitondra dia niangona hanohitra NY TOMPO sy ny Mesiany» (Sal 2.1-2).

²⁷Fa efa niangona marina tokoa teto amin’ity tanàna ity i Heroda sy i Pontio Pilato mbamin’ny Jentilisa sy ny firenena Israely mba hanohitra ny Mpanomponao Masina, dia Jesosy izay nohosoranao,

²⁸mba hanao izay notendren’ny tananao aman-tsainao mialoha hatao.

²⁹Koa ankehitriny, Tompo ô, jereo ny fandrahonany, ary omeo anay mpanomponao ny mba hitory ny teninao amin’ny fahasahiana rehetra,

³⁰miaraka amin’ny anatsoranao ny tananao hanasitrana sy ny hanaovana famantarana sy fahagagana amin’ny anaran’i Jesosy, Mpanomponao Masina.

³¹Rehefa nivavaka izy ireo dia nihovotrovotra ny trano izay niangonany; dia feno ny Fanahy Masina izy rehetra ary nitory ny tenin’Andriamanitra tamin’ny fahasahiana.

³²Niray fo sy fanahy ny olona rehetra izay nino ka tsy nisy na dia iray aza nanonona ny fananany ho azy manokana, fa niombonany avokoa ny zavatra rehetra nananany.

³³Tamin’ny hery be no nanambaràn’ny Apostoly ny nitsanganan’i Jesosy Tompo; ary fahasoavana be no tao amin’izy rehetra.

³⁴Fa tsy nisy olona nahantra teo aminy; ary izay nanana tany na trano, raha nivarotra izany dia nitondra ny vola vidin’ny zavatra lafo

³⁵ka nametraka izany teo anoloan’ny tongotry ny Apostoly dia nozaraina tamin’izy rehetra araka izay nilainy avy izany.

³⁶Ary i Josefa izay nantsoin’ny apostoly koa hoe Barnabasy, izany hoe, raha adika, Zanaky ny fananarana, levita* avy any Sipra no firazanany,

³⁷dia nivarotra ny sahany ka noentiny ny vola vidiny ary napetrany teo anoloan’ny tongotry ny Apostoly.