Read La Bible en Malgache Asan’ny Apostoly 7 Bible Online

Asan’ny Apostoly 7 - La Bible en Malgache bible

Asan’ny Apostoly 7

¹Hoy ny Mpisoronabe*: Moa izany tokoa va?

²Hoy i Stefana: Mihainoa, ry rahalahy sy ianareo ray: Andriamanitry ny voninahitra niseho tamin’i Abrahama razantsika raha tany Mezopotamia izy, fony tsy mbola nonina tany Harana,

³ka niteny taminy hoe: «Mialà amin’ny taninao sy ny havanao ka mandehana ho any amin’ny tany izay hasehoko anao» (Gen 12.1).

⁴Dia niala tamin’ny tanin’ny Kaldeana izy ka nonina tany Harana; ary rehefa maty ny rainy dia nafindran’Andriamanitra niala teo hankaty amin’ny tany izay onenanareo ankehitriny izy.

⁵Tsy nomeny lova teto izy na dia eram-paladia akory aza; kanefa nampanantenainy fa homeny azy sy ny taranaka mandimby azy ho lovany izany na dia tsy mbola nanan-janaka akory aza izy.

⁶Araka izany no nilazan’Andriamanitra fa «hivahiny any amin’ny tanin’ny firenena hafa ny taranany ary handevozin’ireo sy hampahoriny mandritra ny efajato taona.

⁷Nefa ny firenena izay hotompoiny dia hotsaraiko kosa, hoy Andriamanitra; ary rehefa afaka izany dia hivoaka avy ao izy ka hanompo Ahy eto amin’ity tany ity» (Gen 15.13-14).

⁸Nomen’Andriamanitra azy koa ny fanekena ny amin’ny famorana. Dia niteraka an’Isaka i Abrahama ka namora azy tamin’ny andro fahavalo; ary Isaka dia niteraka an’i Jakoba, i Jakoba dia niteraka ny patriarka* roa amby folo lahy.

⁹Ary ny patriarka dia nialona an’i Josefa ka nivarotra azy ho any Ejipta; nefa nomba azy Andriamanitra

¹⁰ka nahafaka azy tamin’ny fahoriany rehetra sady nanome azy fahasoavana sy fahendrena teo imason’i Farao, mpanjakan’i Ejipta; ary nanendry azy ho mpanapaka tany Ejipta sy tao an-dapany manontolo izy.

¹¹Dia nisy mosary manerana an’i Ejipta sy Kanana rehetra ka mafy ny fahoriana; ary tsy nahita hanina ny razantsika.

¹²Koa nony ren’i Jakoba fa nisy vary tany Ejipta dia naniraka ny razantsika izy tamin’ny voalohany.

¹³Tamin’ny fanindroany dia fantatr’izy mirahalahy avy i Josefa ary fantatr’i Farao koa ny havan’i Josefa.

¹⁴Ary naniraka nampiantso an’i Jakoba rainy mbamin’ny ankohonany rehetra i Josefa ka olona dimy amby fitopolo ry zareo.

¹⁵Ary nidina nankany Ejipta i Jakoba ary maty izy sy ny razantsika;

¹⁶ary noentina ho any Sekema ka nalevina tao amin’ny fasana izay novidin’i Abrahama vola tamin’ny zanak’i Hamora tany Sekema.

¹⁷Rehefa ho tonga ny fotoana hahatanterahan’ny teny fikasana izay nataon’Andriamanitra tamin’i Abrahama dia nitombo sy nihamaro ny olona tany Ejipta,

¹⁸mandra-pitsangan’ny mpanjaka hafa tany Ejipta, izay tsy nahalala an’i Josefa.

¹⁹Io mpanjaka io dia nanao hafetsena tamin’ny razantsika ka nampahory azy, dia samy nanary ny zanany vao teraka ireo mba tsy ho velona izy ireny.

²⁰Tamin’izany andro izany no nahaterahan’i Mosesy, ary tsara teo anatrehan’Andriamanitra izy ka notezaina telo volana tao an-tranon’ny rainy.

²¹Rehefa nariana izy dia nalain’ny zanakavavin’i Farao ka notezainy ho zanany.

²²Dia nampianarina ny fahendrena rehetra nananan’ny Ejiptiana i Mosesy ary nahery tamin’ny teniny sy ny asany izy.

²³Rehefa efapolo taona izy dia nitsiry tao am-pony ny fikasana hamangy ireo zanak’Israely rahalahiny.

²⁴Raha nahita ny iray nampijaliana izy dia niaro azy sy namaly ka namono ilay Ejiptiana.

²⁵Noheveriny fa ho fantatry ny rahalahiny fa ny tanany no hamonjen’Andriamanitra azy; kanjo tsy fantatr’izy ireo izany.

²⁶Nony ampitson’iny dia niseho tamin’olona izay niady i Mosesy ary nanao izay hampihavana azy ka niteny hoe: Mpirahalahy ianareo, koa nahoana no miady?

²⁷Fa ilay namely ny namany dia nanosika azy ka niteny hoe: Iza no nanendry an’Ialahy ho mpanapaka sy mpitsara anay?

²⁸Moa ta hamono ahy koa va Ialahy tahaka ny namonoan’Ialahy ilay Ejiptiana omaly?

²⁹Dia nandositra i Mosesy noho izany teny izany ka nivahiny tany amin’ny tany Midiana, izay niterahany zanaka roa lahy.

³⁰Nony afaka efapolo taona dia nisy anjely niseho taminy tany an-tany efitry ny tendrombohitra Sinay, tao anaty lelafo teo amin’ny roimemy.

³¹Nony nahita izany i Mosesy dia gaga noho ny fahitana; nefa nony nanatona handinika izy dia tonga ny feon’ny Tompo hoe:

³²«Izaho no Andriamanitry ny razanao, dia Andriamanitr’i Abrahama sy Isaka ary i Jakoba.» (Eks 3.6). Dia toran-kovitra i Mosesy ka tsy sahy nandinika.

³³Ary hoy NY TOMPO taminy: «Esory ny kapa amin’ny tongotrao; fa masina io tany ijanonanao io.

³⁴Hitako tokoa ny fahorian’ny oloko any Ejipta ary reko ny fitarainany, dia nidina hamonjy azy Aho. Koa avia ankehitriny fa hirahiko ho any Ejipta ianao» (Eks 3.5-10).

³⁵Izany Mosesy izany ilay nolaviny ka nataony hoe: Iza no nanendry an’Ialahy ho mpanapaka sy mpitsara? Izy ihany no nirahin’Andriamanitra ho mpanapaka sy mpanavotra nomban’ny tanan’ny anjely, ilay niseho taminy teo amin’ny roimemy.

³⁶Izy no nitondra ny olona nivoaka avy tany sady nanao fahagagana sy famantarana tany Ejipta, teo amin’ny Ranomasina Mena ary tany an-tany efitra nandritra ny efapolo taona.

³⁷Izany no Mosesy ilay nilaza tamin’ny Zanak’Israely hoe: «Mpaminany no hatsangan’Andriamanitra ho anareo avy amin’ny rahalahinareo, tahaka ahy» (Deo 18.15).

³⁸Izy ilay teo amin’ny fiangonana tany an-tany efitra niaraka tamin’ilay anjely izay niteny taminy sy tamin’ny razantsika tany an-tendrombohitra Sinay; nandray teny velona mba homena antsika izy.

³⁹Nefa ny razantsika dia tsy nety nanaiky azy fa nandà, ary manina an’i Ejipta ny fony

⁴⁰ka hoy izy tamin’i Arona: «Anaovy andriamanitra izahay hitarika antsika eo aloha; fa ilay Mosesy iny, izay nitondra antsika nivoaka avy tany amin’ny tany Ejipta dia tsy fantatray izay nanjo azy.» (Eks 32.1).

⁴¹Dia nanao ombilahy kely izy tamin’izany andro izany ary nanolotra fanatitra tamin’ny sampy ka niravoravo tamin’ny asan’ny tanany.

⁴²Fa Andriamanitra nihodina taminy dia namela azy hanompo ny kintan’ny lanitra, araka ny voasoratra ao amin’ny bokin’ny mpaminany hoe: «Moa nanolotra zavatra voavono sy fanatitra ho Ahy nandritra ny efapolo taona tany an-tany efitra va ianareo, ry taranak’Israely?

⁴³Tsia, fa nobatainareo ny tranolain’i Moloka sy ny kintan’i Refana andriamanitrareo, dia ny endri-javatra izay nataonareo mba hivavahana, koa hamindra anareo ho any ankoatra an’i Babilona Aho» (Amo 5.25-27).

⁴⁴Ny tranolain’ny Vavolombelona dia teo amin’ny razantsika tany an-tany efitra, tahaka ny voatendrin’Ilay niteny tamin’i Mosesy mba hanaovany azy araka ny endrika izay efa hitany.

⁴⁵Noraisin’ny razantsika izany ka noentiny niditra niaraka tamin’i Josoa tao amin’ny tanin’ny firenena izay noroahin’Andriamanitra hiala teo anoloan’ny razantsika hatramin’ny andron’i Davida;

⁴⁶nahita fitia teo anatrehan’Andriamanitra i Davida ka nangataka hahita toerana ho an’ny tranon’i Jakoba.

⁴⁷Fa i Solomona kosa no nanao trano ho Azy.

⁴⁸Ny Avo Indrindra anefa tsy mitoetra ao amin’izay nataon-tanan’olona; araka ny nolazain’ny mpaminany hoe:

⁴⁹«Ny lanitra no sezafiandrianako ary ny tany no fitoeran-tongotro; koa trano manao ahoana no hataonareo ho Ahy, hoy NY TOMPO? Ary manao ahoana ny ho toerana fitsaharako?

⁵⁰Tsy ny tanako va no nanao izao zavatra rehetra izao?» (Isa 66.1, 2)

⁵¹Ry olona mafy hatoka sady tsy voafora fo sy sofina, ianareo dia manohitra ny Fanahy Masina mandrakariva; tahaka ny nataon’ny razanareo ihany no ataonareo koa.

⁵²Iza tamin’ny mpaminany no tsy nenjehin’ny razanareo? Novonoiny aza ireo izay naminany ny fiavian’Ilay Marina, izay ianareo no tonga mpamadika sy mpamono Azy ankehitriny,

⁵³dia ianareo izay olona nahazo ny lalàna tamin’ny nanoloran’ny anjely azy nefa tsy nankatò izany.

⁵⁴Nony nandre izany izy ireo dia lotika ny fony ka nihidy vazana taminy izy.

⁵⁵Nefa feno ny Fanahy Masina i Stefana ka nony nibanjina ny lanitra dia nahita ny voninahitr’Andriamanitra sy Jesosy nitsangana teo ankavanan’Andriamanitra,

⁵⁶ka hoy izy: Indro, hitako ny lanitra misokatra ary ny Zanak’Olona* mitsangana eo ankavanan’Andriamanitra.

⁵⁷Ary niantsoantso mafy ny olona sady nanampin-tsofina no niara-nirohotra teo aminy,

⁵⁸dia nandroaka azy ho eny ivelan’ny tanàna ary nitora-bato azy. Nametraka ny fitafiany teo anilan’ny tongotry ny zatovo iray antsoina hoe Saoly ireo vavolombelona.

⁵⁹Ary ny olona dia nitora-bato an’i Stefana, izay niantso hoe: Ry Jesosy Tompo ô, raiso ny fanahiko.

⁶⁰Dia nandohalika izy ka niantso tamin’ny feo mahery hoe: Tompo ô, aza atao ho helony anie izao ota izao. Rehefa nilaza izany izy dia nodimandry.