Read La Bible en Malgache Asan’ny Apostoly 8 Bible Online

Asan’ny Apostoly 8 - La Bible en Malgache bible

Asan’ny Apostoly 8

¹Ary i Saoly dia nankasitraka ny namonoana an’i Stefana. Tamin’izany andro izany dia nisy fanenjehana mafy tamin’ny fiangonana tany Jerosalema ka niely teny amin’ny tany Jodia* sy Samaria izy rehetra, afa-tsy ny Apostoly ihany.

²Olona mpivavaka tsara no nandevina an’i Stefana sady nisaona azy fatratra.

³I Saoly kosa tamin’izany dia nampahory mafy ny fiangonana ka nidirany isan-trano sady nosarihany, na ny lehilahy na ny vehivavy, ka nataony tao an-tranomaizina.

⁴Ireo izay niely dia nandeha nitory ny teny dia ny Filazantsara.

⁵Nidina tany an-tanànan’i Samaria i Filipo ka nitory an’i Kristy* tamin’ny olona tao.

⁶Dia niray hevitra nihaino tsara izay nolazain’i Filipo ny vahoaka rehefa nandre azy sy nahita ny famantarana nataony.

⁷Fa maro tamin’ireo manana fanahy maloto no niantsoantso tamin’ny feo mahery rehefa niala izany; ary maro koa ny malemy sy ny mandringa no sitrana.

⁸Dia nisy fifaliana lehibe tao amin’izany tanàna izany.

⁹Nisy lehilahy iray antsoina hoe Simona izay efa tao an-tanàna, mpitahiry ody izy io ka nahatalanjona ny olona tany Samaria sady nilaza ny tenany ho lehibe.

¹⁰Ny olona rehetra, na ny kely na ny lehibe, dia nihaino azy ka niteny hoe: Ity lehilahy ity no herin’Andriamanitra izay antsoina hoe Hery lehibe.

¹¹Nihaino azy tsara izy ireo, satria efa ela no talanjona tamin’ny ataony.

¹²Nefa rehefa nino an’i Filipo izay nitory ny teny soa mahafaly ny amin’ny fanjakan’Andriamanitra sy ny anaran’i Jesosy Kristy ireo dia natao batisa avokoa na lahy na vavy.

¹³Mba nino koa i Simona ka rehefa natao batisa izy dia nanaraka an’i Filipo. Ary talanjona izy raha nahita ny famantarana sy ny asa lehibe izay natao.

¹⁴Nony ren’ny Apostoly tany Jerosalema fa efa nandray ny tenin’Andriamanitra i Samaria dia naniraka an’i Petera sy i Jaona izy ireo hankany aminy.

¹⁵Nony tafidina tany izy roa lahy dia nivavaka ho an’ny olona mba handraisany ny Fanahy Masina.

¹⁶Satria tsy mbola nisy nilatsahany izy ireo na dia iray akory aza, fa natao batisa tamin’ny anaran’i Jesosy Tompo ihany,

¹⁷dia nametra-tanana taminy izy roa lahy ary nandray ny Fanahy Masina ireo.

¹⁸Nony hitan’i Simona fa ny fametrahan’ny Apostoly tanana no nanomezana ny Fanahy Masina dia nitondra vola homena azy izy

¹⁹sady niteny hoe: Omeo izany fahefana izany koa aho, mba handray ny Fanahy Masina izay olona hametrahako tanana.

²⁰Fa hoy i Petera taminy: Aoka ho very miaraka amin’ny tenanao ny volanao, satria noheverinao fa azo vidim-bola ny fanomezan’Andriamanitra.

²¹Tsy manana anjara na raharaha amin’izany zavatra izany ianao satria tsy mahitsy fo eo anatrehan’Andriamanitra.

²²Koa mibebaha amin’izao haratsianao izao ka mangataha amin’ny Tompo, andrao mba havelany izay noheverin’ny fonao.

²³Fa hitako fa mbola mitoetra amin’ny fangidian’afero sy ny famatoran’ny heloka ihany ianao.

²⁴Dia hoy i Simona: Mangataha amin’ny Tompo ho ahy, mba tsy hisy ho tonga amiko izay nolazainareo.

²⁵Rehefa nanambara sy nitory ny tenin’ny Tompo i Petera sy i Jaona dia niverina nankany Jerosalema ka nitory ny Filazantsara teny amin’ny vohitra maro izay an’ny Samaritana*.

²⁶Ary nisy anjelin’ny Tompo nilaza tamin’i Filipo hoe: Mitsangàna ka mandehana mianatsimo ho any amin’ny lalana midina avy any Jerosalema mankany Gaza, any an-tany efitra.

²⁷Dia nitsangana izy ka lasa nandeha, ary indro, nisy lehilahy etiopiana, tandapan’i Kandasy, mpanjakavavin’ny Etiopiana, izay mpitahiry ny harenany rehetra, tonga tany Jerosalema mba hivavaka;

²⁸rehefa nody izy dia nipetraka tao anatin’ny kalesiny ary namaky teny tao amin’i Isaia mpaminany.

²⁹Hoy ny Fanahy tamin’i Filipo: Mandehana manatona io kalesy io.

³⁰Dia nihazakazaka nankeo aminy i Filipo ary nandre azy mamaky teny tao amin’ny mpaminany Isaia ka hoy izy taminy: Moa fantatrao va izay vakìnao?

³¹Hoy izy: Hataoko ahoana no fahay raha tsy misy mitari-dalana ahy? Dia nangataka an’i Filipo izy mba hiakatra sy hipetraka eo aminy.

³²Ary izao no tenin’ny Soratra Masina novakiny: «Noentina hovonoina tahaka ny ondry Izy ary tsy niloa-bava, tahaka ny zanak’ondry moana eo anoloan’ny mpanety azy;

³³noho ny fietreny dia nalaina Taminy ny zony; ary iza no hahalaza ny amin’ny fianakaviany? Fa ny ainy dia nesorina tamin’ny tany» (Isa 53.7-8).

³⁴Hoy ilay tandapa tamin’i Filipo: Miangavy anao aho, iza moa no lazain’ny mpaminany amin’izany? Ny tenany va sa olon-kafa?

³⁵Ary niloa-bava i Filipo ka nanomboka tamin’izany Soratra Masina izany dia nitory an’i Jesosy taminy.

³⁶Nony nandeha teny an-dalana izy ireo dia tonga teo amin’izay nisy rano ka hoy ilay tandapa: Indro misy rano, koa inona moa no misakana ahy tsy hatao batisa?

³⁷Hoy i Filipo: Raha mino amin’ny fonao manontolo ianao dia azo atao ihany. Ary namaly izy hoe: Mino aho fa Jesosy Kristy* no Zanak’Andriamanitra.

³⁸Dia nasainy najanona ny kalesy; ary nidina ho eo amin’ny rano izy roa lahy, izany hoe i Filipo sy ilay tandapa; dia nataony batisa izy.

³⁹Rehefa niakatra avy teo amin’ny rano izy roa lahy dia noentin’ny Fanahin’ny Tompo i Filipo ka tsy hitan’ilay tandapa intsony; dia nanohy ny diany izy sady faly.

⁴⁰Tany Azota kosa avy eo no nahitana an’i Filipo ary nitory ny Filazantsara tany amin’ny tanàna rehetra izay nalehany izy ambara-pahatongany tany Kaisaria.