Read La Bible en Malgache Romana 10 Bible Online

Romana 10 - La Bible en Malgache bible

Romana 10

¹Ry rahalahy, ny fanirian’ny foko sy ny angatahiko amin’Andriamanitra ho azy ireny dia ny mba hahavoavonjy azy.

²Satria vavolombelon’ireny aho, fa manana hafanam-po ny amin’Andriamanitra izy saingy tsy araka ny fahalalana.

³Eny, tsy nahalala ny fahamarinana avy amin’Andriamanitra izy ka nitady hampiorina fahamarinana ho an’ny tenany, dia tsy nanaiky ny fahamarinana avy amin’Andriamanitra.

⁴Ny faran’ny lalàna anefa dia Kristy, ho fahamarinana ho an’izay rehetra mino.

⁵Fa i Mosesy dia nanoratra nilaza fa ny olona izay manao ny fahamarinana avy amin’ny lalàna no ho velona amin’izany (Lev 18.5).

⁶Ny fahamarinana izay avy amin’ny finoana kosa dia milaza hoe: Aza milaza ao am-ponao hoe: Iza no hiakatra any an-danitra? Izany hoe ny hampidina an’i Kristy* avy any izany,

⁷na: Iza no hidina any amin’ny lalina? Izany hoe ny hampiakatra an’i Kristy avy any amin’ny maty izany.

⁸Fa ahoana no lazainy? «Eo akaikinao ny teny, dia eo am-bavanao sy ao am-ponao» (Deo 30.12-14), dia ny teny ny amin’ny finoana, izay torinay izany.

⁹Satria raha manaiky an’i Jesosy ho Tompo amin’ny vavanao ianao ary mino amin’ny fonao fa Andriamanitra efa nanangana Azy tamin’ny maty, dia hovonjena ianao.

¹⁰Fa amin’ny fo no inoana hahazoana fahamarinana ary amin’ny vava no anekena hahazoana famonjena.

¹¹Fa hoy ny Soratra Masina: «Tsy hitsanga-menatra izay rehetra mino Azy» (Isa 28.16).

¹²Fa tsy misy hafa na Jiosy* na Jentilisa*, fa iray ihany ny Tompon’izy rehetra, sady manankarena homena izay rehetra miantso Azy Izy.

¹³Satria «Izay rehetra miantso ny anaran’ny Tompo no hovonjena» (Joe 3.5).

¹⁴Hataony ahoana moa no fiantso izay tsy ninoany? Hataony ahoana no fino izay Olona tsy reny? Hataony ahoana no fandre raha tsy misy mpitory?

¹⁵Ary hataony ahoana no fitory raha tsy nirahina? Araka ny voasoratra hoe: «Akory ny hatsaran’ny tongotr’iry mitondra teny soa mahafaly!» (Isa 52.7).

¹⁶Nefa tsy izy rehetra no nanaiky ny Filazantsara. Fa hoy Isaia: «TOMPO ô, iza no nino izay henony taminay?» (Isa 53.1).

¹⁷Koa ny finoana dia avy amin’izay henoina, ary izay henoina kosa dia avy amin’ny tenin’i Kristy.

¹⁸Fa hoy aho: Sao tsy nahare izy? Tsia, «Efa nivoaka ho any amin’ny tany manontolo ny feony ary ny teniny dia hatramin’ny faran’izao rehetra izao» (Sal 19.4).

¹⁹Fa hoy aho: Sao tsy nahalala ary ny Israely? I Mosesy no voalohany niteny hoe: «Hampialona anareo an’izay tsy firenena Aho, amin’izay firenena adala no hampahasosorako anareo» (Deo 32.21).

²⁰Fa sahy mihitsy Isaia ka nilaza hoe: «Hitan’izay tsy nitady Ahy Aho ary niseho tamin’izay tsy nanontany Ahy.»

²¹Fa ny amin’ny Israely dia hoy izy: «Mandritra ny andro no efa nanatsorako ny tanako tamin’izay firenena sady tsy mankatò no mandà» (Isa 65.1-2).