Read La Bible en Malgache Romana 11 Bible Online

Romana 11 - La Bible en Malgache bible

Romana 11

¹Dia hoy aho: Sao dia narian’Andriamanitra ary ny olony? Sanatria izany! Satria izaho koa mba Israelita taranak’i Abrahama ihany, avy amin’ny fokon’i Benjamina.

²Tsy nanary ny olony izay efa fantany mialoha Andriamanitra; sa tsy fantatrareo izay lazain’ny Soratra Masina ao amin’ny tantaran’i Elia, dia ilay fitarainany tamin’Andriamanitra noentiny namely ny Israely hoe:

³«TOMPO ô, efa namono ny mpaminaninao sy nandrava ny alitaranao izy; ary izaho irery ihany no sisa ka mitady ny aiko koa izy» (1Mpa 19.14)?

⁴Nefa ahoana no navalin’Andriamanitra azy? «Izaho efa namela fito arivo lahy ho Ahy, dia izay tsy mba nandohalika tamin’ny Baala*» (1Mpa 19.18).

⁵Dia toy izany koa amin’izao andro ankehitriny izao, misy sisa tavela ihany araka ny fifidianana amin’ny fahasoavana.

⁶Ary raha avy amin’ny fahasoavana izany dia tsy mba avy amin’ny asa intsony; fa raha izay dia tsy fahasoavana intsony ny fahasoavana.

⁷Ahoana ary? Izay notadiavin’ny Israely dia tsy azony, fa ny voafidy ihany no nahazo izany ary ny sisa kosa dia tonga mafy fo;

⁸araka ny voasoratra hoe: «Andriamanitra efa nanome azy fanahy mahasondrian-tory sy maso tsy hahita ary sofina tsy hahare, mandraka androany» (Isa 29.10; Deo 29.3).

⁹Ary hoy Davida: «Aoka ny latabany ho fandrika sy ho harato, sady ho fahatafintohinana sy ho famaliana azy!

¹⁰Aoka ny masony ho maizina ka tsy hahita! Ary aoka ho vokoka mandrakariva ny lamosiny!» (Sal 69.22-23)

¹¹Dia hoy aho: Sao dia tafintohina ary ny Israely ka ho lavo? Sanatria izany! Fa ny fahatafintohinany no nahatonga famonjena ho an’ny Jentilisa* mba hampialona azy.

¹²Raha ny fahatafintohinany no tonga harenan’izao tontolo izao, ary ny fahareseny no tonga harenan’ny Jentilisa, tsy mainka va ny fahafenoany!

¹³Fa ianareo Jentilisa no itenenako. Koa satria apostolin’ny Jentilisa aho dia mankalaza ny fanompoako,

¹⁴mba hisy hahazoako hampialona ireo iray ra amiko, mba hamonjeko ny sasany aminy.

¹⁵Fa raha ny fampihatahana azy no fampihavanana izao tontolo izao, tsy ho fampodiana ny fiainana avy amin’ny fahafatesana va ny fandraisana azy?

¹⁶Ary koa, raha masina ny santatry ny mofo dia masina koa ny vongany manontolo; ary raha masina ny fotony dia masina koa ny sampany.

¹⁷Fa raha notapahina ny sampany sasany, ary ianao izay tahaka ny hazo oliva maniry ho azy kosa no natsofoka haniry teo aminy ka mba niombona tamin’ny fototra sy ny menaky ny hazo oliva,

¹⁸dia aza mirehareha amin’ny sampany; fa na dia mirehareha aza ianao, tsy ianao no mitondra ny fotony fa ny fotony no mitondra anao.

¹⁹Ary hiteny ianao hoe: Notapahina ny sampany sasany hanatsofohana ahy haniry.

²⁰Marina izany; ny tsy finoany no nanapahana azy fa ny finoanao kosa no itoeranao. Aza miavonavona fa matahora.

²¹Fa raha ny tena sampany aza tsy navelan’Andriamanitra dia tsy havelany koa ianao.

²²Koa hevero fa mora fanahy Andriamanitra nefa hentitra: Amin’izay lavo dia hentitra Izy; fa aminao kosa dia mora fanahy Andriamanitra, raha maharitra ao amin’ny fahamoram-panahiny ianao; fa raha tsy izany dia hotapahina koa ianao.

²³Nefa ireny kosa, raha tsy mifikitra amin’ny tsy finoana, dia hatsofoka haniry ihany, satria azon’Andriamanitra atsofoka indray izy.

²⁴Fa raha notapahina tamin’ny hazo oliva naniry ho azy ianao ka natsofoka haniry amin’ny hazo oliva tsara, nefa tsy tena sampany, manoatra noho izany no hanatsofohana indray izay tena sampany amin’ny hazo oliva nanapahana azy.

²⁵Fa tsy tiako tsy ho fantatrareo izao zavamiafina izao, ry rahalahy, fandrao mihevitra ny tenanareo ho hendry ianareo: Misy fahamafisam-po manjo ny Israely sasany mandra-pahatafiditry ny Jentilisa* rehetra.

²⁶Amin’izany dia hovonjena avokoa ny Israely rehetra, araka ny voasoratra hoe: «Hiainga avy any Ziona* ny Mpanafaka ary hampiala ny haratsiam-panahy amin’i Jakoba Izy;

²⁷izany no fanekeko aminy rehefa manaisotra ny fahotany Aho» (Isa 59.20-21; 27.9).

²⁸Araka ny Filazantsara dia fahavalo izy noho ny aminareo; fa araka ny fifidianana kosa dia malala izy noho ny amin’ny razana.

²⁹Satria ny fanomezana ny fahasoavana sy ny fiantsoan’Andriamanitra dia tsy azo ovana.

³⁰Fa tahaka anareo fahiny, izay tsy nankatò an’Andriamanitra, nefa ankehitriny dia ny tsy fanekeny no nahazoanareo famindrampo,

³¹dia toy izany koa ankehitriny, tsy nankatò ireny, mba hahazoany famindrampo ankehitriny noho ny famindrampo azonareo.

³²Fa nanidy azy rehetra tao amin’ny tsy fankatoavana Andriamanitra mba hamindrany fo amin’izy rehetra.

³³Endre ny halalin’ny harena sy ny fahendren’Andriamanitra ary ny fahalalany! Tsy hita lany ny fitsarany ary tsy azo fantarina ny lalany!

³⁴Fa «iza no nahalala ny sain’NY TOMPO? Iza no mpanolotsaina Azy?» (Isa 40.13)

³⁵Iza no nanome Azy aloha mba hamaliana azy indray?

³⁶Fa avy Aminy sy amin’ny alalany ary ho Azy ny zavatra rehetra. Izy anie no homem-boninahitra mandrakizay! Amena*!