Read La Bible en Malgache Romana 14 Bible Online

Romana 14 - La Bible en Malgache bible

Romana 14

¹Raiso ny malemy finoana, nefa tsy amin’ny fitsaranareo ny eritreriny.

²Ny iray dia mino fa mahazo mihinana ny zavatra rehetra izy; malemy finoana kosa ny iray ka tsy mihinana afa-tsy ny vokatry ny zavamaniry.

³Aoka ny mihinana tsy hanamavo ny tsy mihinana; aoka koa ny tsy mihinana tsy hitsara ny mihinana; fa Andriamanitra no efa nandray azy.

⁴Iza moa ianao izay mitsara ny mpanompon’ny hafa? Amin’ny tompony ihany no ijoroany na ahalavoany. Nefa hampijoroina ihany izy, satria mahay mampijoro azy ny Tompo.

⁵Ny iray dia manao ny andro iray ho mihoatra noho ny andro sasany ary ny iray kosa dia manao ny andro rehetra ho mitovy. Aoka samy ho resy lahatra ao an-tsainy avy izy.

⁶Ny mitandrina ny andro dia mitandrina izany ho an’ny Tompo. Ary ny mihinana dia mihinana ho an’ny Tompo, satria misaotra an’Andriamanitra izy; ny tsy mihinana kosa dia tsy mihinana ho an’ny Tompo ary misaotra an’Andriamanitra koa izy.

⁷Fa tsy misy velona ho an’ny tenany isika ary tsy misy maty ho an’ny tenany.

⁸Satria raha velona isika dia velona ho an’ny Tompo ary raha maty isika dia maty ho an’ny Tompo; koa amin’izany, na velona na maty isika dia an’ny Tompo ihany.

⁹Fa izany no nahafatesan’i Kristy* sy nahavelomany indray, mba ho Tompon’ny maty sy ny velona Izy.

¹⁰Ary nahoana ianao no mitsara ny rahalahinao? Ary nahoana koa ianao no manao tsinontsinona ny rahalahinao? Fa samy hiseho eo anoloan’ny fitsaran’Andriamanitra isika rehetra.

¹¹Satria voasoratra hoe: «Raha velona koa Aho, hoy NY TOMPO, ny lohalika rehetra dia handohalika eo anatrehako ary ny lela rehetra dia hidera an’Andriamanitra!» (Isa 45.23)

¹²Koa samy hampamoahin’Andriamanitra ny amin’ny tenany avy isika rehetra.

¹³Koa aza mifampitsara intsony isika fa aleo mihevitra izao: Ny tsy hanisy fandavoana na fanafintohinana eo anoloan’ny rahalahy.

¹⁴Mahafantatra sady resy lahatra ao amin’i Jesosy Tompo aho fa tsy misy zavatra maloto ho azy; satria raha misy manao zavatra iray ho maloto dia aminy ihany izany no maloto.

¹⁵Raha mampalahelo ny rahalahinao ny zavatra fihinanao dia tsy mba manaraka ny fitiavana intsony ianao. Aza ny zavatra haninao no animbanao azy, fa efa maty hamonjy azy Kristy*.

¹⁶Koa aza avela hotenenina ratsy izay zavatra tsara anananareo.

¹⁷Fa tsy amin’ny fihinanana sy ny fisotroana ny fanjakan’Andriamanitra, fa fahamarinana sy fiadanana ary fifaliana ao amin’ny Fanahy Masina.

¹⁸Koa izay manompo an’i Kristy amin’izany zavatra izany no sitrak’Andriamanitra sy eken’ny olona fa tsara.

¹⁹Koa aoka isika hitady ny momba ny fiadanana sy ny momba ny fifampandrosoana.

²⁰Aza izay hanina no andravanao ny asan’Andriamanitra. Madio avokoa ny zavatra rehetra, nefa ratsy ho an’ny olona izay mihinana ka mahatonga fahatafintohinana.

²¹Fa tsara ny tsy mihinana hena, ny tsy misotro divay, ny tsy manao izay hahatafintohina ny rahalahinao.

²²Ny finoana izay anananao dia hazòny ho anao eo anatrehan’Andriamanitra. Sambatra izay tsy manameloka ny tenany amin’izay zavatra ekeny!

²³Fa izay misalasala dia meloka raha homana, satria tsy avy amin’ny finoana izany; fa ota izay rehetra tsy avy amin’ny finoana.