Read La Bible en Malgache Romana 15 Bible Online

Romana 15 - La Bible en Malgache bible

Romana 15

¹Isika izay matanjaka dia tokony hitondra ny fahalemen’ny malemy ka tsy hitady izay hahafaly ny tenantsika ihany.

²Aoka isika rehetra samy hitady izay hahafaly ny namantsika amin’izay hahasoa sy hampandroso azy.

³Fa Kristy* aza tsy nitady izay hahafaly ny tenany, fa araka ny voasoratra hoe: «Ny latsa nataon’izay nandatsa Anao dia nihatra tamiko» (Sal 69.9).

⁴Izay rehetra voasoratra fahiny dia nosoratana ho fianarantsika mba hananantsika ny fanantenana noho ny faharetana sy ny fiononana avy amin’ny Soratra Masina.

⁵Fa Andriamanitry ny faharetana sy ny fiononana anie hampiray hevitra anareo araka an’i Kristy Jesosy,

⁶mba ho saina iray sy vava iray no hiarahanareo mankalaza an’Andriamanitra Rain’i Jesosy Kristy Tompontsika!

⁷Koa mifandraisa ianareo tahaka ny nandraisan’i Kristy* anareo koa ho voninahitr’Andriamanitra.

⁸Fa lazaiko fa tonga mpanompon’ny voafora Kristy noho ny fahamarinan’Andriamanitra, hahatò ny teny fikasana tamin’ny razana

⁹mba hankalazan’ny Jentilisa* an’Andriamanitra koa noho ny famindrampo, araka ny voasoratra hoe: «Izany no hiderako Anao any amin’ny Jentilisa sy hihirako ny anaranao» (Sal 18.49).

¹⁰Hoy koa Izy: «Miravoravoa, ry Jentilisa mbamin’ny olony!» (Deo 32.43)

¹¹Ary koa: «Miderà NY TOMPO, ry Jentilisa rehetra ary aoka hankalaza Azy ny firenena rehetra!» (Sal 117.1)

¹²Hoy koa Isaia: «Ho avy ny Solofon’i Jese, dia Ilay hitsangana hanapaka ny Jentilisa; Izy no hantenain’ny Jentilisa» (Isa 11.10).

¹³Ary Andriamanitry ny fanantenana anie hameno anareo amin’ny fifaliana sy ny fiadanana rehetra amin’ny finoanareo, mba hitomboanareo amin’ny fanantenana noho ny herin’ny Fanahy Masina!

¹⁴Koa ny aminareo, ry rahalahiko, dia matoky aho fa feno hatsaram-panahy ianareo, feno ny fahalalana rehetra sady mahay mifananatra koa.

¹⁵Kanefa amin’ny fahasahiana no anoratako ny teny sasany aminareo, toy ny mampahatsiaro anareo indray noho ny fahasoavana nomen’Andriamanitra ahy,

¹⁶mba ho mpanompon’i Kristy* Jesosy ho an’ny Jentilisa* aho ka manao fanompoam-pivavahana ho an’ny Filazantsaran’Andriamanitra, mba horaisina amin’ny fankasitrahana ny Jentilisa, ho fanatitra nohamasinin’ny Fanahy Masina.

¹⁷Koa manana izay reharehako ao amin’i Kristy Jesosy aho noho ny amin’Andriamanitra.

¹⁸Fa tsy sahiko lazaina izay zavatra tsy nataon’i Kristy tamin’ny alalako, na tamin’ny teny, na tamin’ny asa, mba hampanaiky ny Jentilisa,

¹⁹noho ny herin’ny famantarana sy ny fahagagana, ary tamin’ny herin’ny Fanahin’Andriamanitra. Noho izany dia hatrany Jerosalema ka manodidina hatrany Ilirikiona no nahatanterahako ny fitoriako ny Filazantsaran’i Kristy.

²⁰Koa nataoko ho voninahitro ny hitory ny Filazantsara, tsy eo amin’izay efa niantsoana an’i Kristy anefa, fandrao hanovona eo ambonin’izay efa naorin’ny sasany aho,

²¹fa araka ny voasoratra hoe: «Izay tsy nilazana Azy no hahita, ary izay tsy nandre no hahafantatra» (Isa 52.15).

²²Izay no nanakana ahy matetika tsy hankany aminareo.

²³Ankehitriny kosa dia tsy misy antony hitoerako etỳ amin’ity faritra ity intsony, sady efa naniry hankany aminareo hatramin’ny taona maro aho

²⁴rehefa mankany Espaina; koa manantena hahita anareo aho amin’ny fandalovako ka ho vatsinareo ny diako mankany rehefa avy nifaly vetivety tamin’ny fiarahana taminareo.

²⁵Fa ankehitriny dia efa hiainga hankany Jerosalema aho mba hanompo ny olona masina.

²⁶Fa sitrapon’i Makedonia sy i Akaia ny hamory vola ho fifanohanana amin’ny mahantra amin’ny olona masina any Jerosalema.

²⁷Eny, sitrapony izany sady tokony hataony aminy, fa raha ny Jentilisa* no niombona ny zava-panahy taminy dia tokony hanompo azy kosa amin’ny zavatra momba ny nofo izy.

²⁸Rehefa vitako izay ka voatolotro azy soa amantsara izany vokatra izany dia ho any Espaina aho ka handalo any aminareo.

²⁹Ary fantatro fa raha mankany aminareo aho dia handeha amin’ny fahafenoan’ny fitahian’i Kristy.

³⁰Nefa mangataka aminareo aho, ry rahalahy, noho ny amin’i Jesosy Kristy Tompontsika sy ny fitiavana avy amin’ny Fanahy, mba hiarahanareo miezaka amiko amin’ny fivavahanareo amin’Andriamanitra ho ahy,

³¹mba ho voavonjy amin’ny tsy mino any Jodia* aho ary mba hankasitrahan’ny olona masina izay fanompoana hataoko any Jerosalema;

³²rehefa vita izany dia hankany aminareo amin’ny fifaliana aho, raha sitrapon’Andriamanitra ka hiala sasatra kely any aminareo.

³³Andriamanitry ny fiadanana anie ho aminareo rehetra! Amena*!