Read La Bible en Malgache Romana 16 Bible Online

Romana 16 - La Bible en Malgache bible

Romana 16

¹Iny i Foiby anabavintsika, diakonan’ny fiangonana[1] atỳ Kenkrea, lazaiko tsara aminareo,

²mba horaisinareo ao amin’ny Tompo izy, araka izay mendrika ny olona masina, ary mba hampianareo izy amin’izay raharaha ilàny anareo, fa izy dia mpiahy ny maro mbamin’ny tenako koa.

³Veloma amin’i Prisila sy i Akoila, mpiara-miasa amiko ao amin’i Kristy* Jesosy;

⁴izy ireo dia nanao vy very ny ainy hamonjy ny aiko; nefa tsy izaho ihany no misaotra azy fa ny fiangonana rehetra any amin’ny Jentilisa* koa.

⁵Veloma amin’ny fiangonana izay ao an-tranony. Veloma amin’i Epaineto malalako, izay voaloham-bokatr’i Azia ho an’i Kristy.

⁶Veloma amin’i Maria, izay nikely aina fatratra ho anareo.

⁷Veloma amin’i Androniko sy i Jonia havako sy namako niara-nifatotra tamiko, izay malaza eo amin’ny Apostoly sady tao amin’i Kristy talohako.

⁸Veloma amin’i Ampliato malalako ao amin’ny Tompo.

⁹Veloma amin’i Orbano mpiara-miasa aminay ao amin’i Kristy sy i Staky malalako.

¹⁰Veloma amin’i Apela, ilay efa voazaha toetra ao amin’i Kristy. Veloma amin’ny ankohonan’i Aristobolo.

¹¹Veloma amin’i Herodiona havako. Veloma amin’ny ankohonan’i Narsisy, izay ao amin’ny Tompo.

¹²Veloma amin’i Trifena sy i Trifosa, izay mikely aina ao amin’ny Tompo. Veloma amin’i Persy malala, izay nikely aina fatratra tao amin’ny Tompo.

¹³Veloma amin’i Rofosy ilay voafidy ao amin’ny Tompo, ary veloma amin’ny reniny sy reniko.

¹⁴Veloma amin’i Asinkrito, i Flegona, i Hermesy, i Patroba, i Hermasy, mbamin’ny rahalahy ao aminy.

¹⁵Veloma amin’i Filologo sy i Jolia, i Nerea sy ny anabaviny ary i Olimpa sy ny olona masina rehetra izay ao aminy.

¹⁶Mifanaova veloma amin’ny fanorohana masina. Ny fiangonana rehetra an’i Kristy manao veloma anareo.

¹⁷Fa mananatra anareo aho, ry rahalahy, mba hitandremanareo ny amin’izay mahatonga ny fisarahana sy ny fahatafintohinana, tsy araka ny fampianarana efa nianaranareo; mialà amin’ireny olona ireny.

¹⁸Fa izy ireny dia tsy mba manompo an’i Kristy* Tompontsika, fa ny kibony ihany; ary amin’ny teny malefaka sady tsara lahatra no amitahany ny fon’ny tsy ary saina.

¹⁹Fa efa niely any amin’ny olona rehetra ny lazan’ny fankatoavanareo. Ary faly aho noho ny aminareo satria tiako ho hendry amin’izay tsara ianareo ary tsy hiharo amin’izay ratsy.

²⁰Andriamanitry ny fiadanana hanorotoro haingana an’i Satana eo ambanin’ny tongotrareo. Ho aminareo anie ny fahasoavan’i Jesosy Kristy Tompontsika!

²¹Manao veloma anareo i Timoty, mpiara-miasa amiko sy i Losio ary i Jasona sy i Sosipatro havako.

²²Manao veloma anareo ao amin’ny Tompo izaho Tertio, izay manoratra ity epistily ity.

²³Manao veloma anareo i Gaio, ilay mpampiantrano ahy sy ny fiangonana[2] rehetra. Manao veloma anareo i Erasto mpitahiry ny volam-panjakana eto an-tanàna sy i Koarto rahalahy.

²⁴Ho aminareo rehetra anie ny fahasoavan’i Jesosy Kristy Tompontsika! Amena*!

²⁵Ary ho an’Izay mahay mampahery anareo araka ny Filazantsara toriko, dia ny fanambarana an’i Jesosy Kristy*, araka ny fampisehoana ny zavamiafina, izay voafina hatry ny fony fahagola,

²⁶fa efa aseho ankehitriny tamin’izay soratry ny mpaminany, araka ny didin’Andriamanitra mandrakizay ka nampahafantarina any amin’ny firenena rehetra hahatonga fanekena ny finoana,

²⁷ho an’Andriamanitra, Ilay hany hendry, anie ny voninahitra amin’ny alalan’i Jesosy Kristy mandrakizay mandrakizay! Amena*!