Read La Bible en Malgache Romana 3 Bible Online

Romana 3 - La Bible en Malgache bible

Romana 3

¹Koa inona ary no tombony ananan’ny Jiosy*, ary inona no soa avy amin’ny famorana?

²Maro ihany ireo amin’ny lafiny rehetra: Voalohany: Izy no notolorana ny tenin’Andriamanitra ho andraikiny.

³Fa ahoana ary? Raha tsy nahatoky ny sasany, moa ny tsy fahatokiany va hahafoana ny fahatokian’Andriamanitra?

⁴Sanatria izany! Aoka Andriamanitra no ekena ho marina fa ny olona rehetra kosa dia ho mpandainga, araka ny voasoratra hoe: «Mba ho hita ho marina amin’ny teninao Ianao ary hahery, raha tsaraina» (Sal 51.4).

⁵Fa raha ny tsy fahamarinantsika no mampiseho ny fahamarinan’Andriamanitra, inona ary no holazaintsika? Tsy marina va Andriamanitra raha mampihatra ny fahatezerany? Miteny araka ny fanaon’ny olona aho.

⁶Sanatria izany! Fa raha izany, hataon’Andriamanitra ahoana no fitsara izao tontolo izao?

⁷Raha nitombo noho ny laingako kosa ny fahamarinan’Andriamanitra mba ho voninahiny, nahoana aho no mbola tsaraina ho mpanota indray?

⁸Nahoana ary no tsy hanao ratsy isika mba hiavian’ny soa? Tahaka izany ny tenin’ny sasany izay manendrikendrika anay ho milaza izany. Mendrika ny fanamelohana azy ireny.

⁹Ahoana ary? Ambony noho ny hafa va isika? Tsy izany velively; satria efa voalazantsika rahateo fa mpanota avokoa na ny Jiosy na ny Jentilisa*

¹⁰araka ny voasoratra hoe: «Tsy misy marina na dia iray akory aza;

¹¹tsy misy izay mahafantatra, tsy misy izay mitady an’Andriamanitra.

¹²Samy nania avokoa izy rehetra, samy tsy mahasoa avokoa izy rehetra; tsy misy izay manao ny tsara na dia iray akory aza» (Sal 14.1-3).

¹³«Fasana misokatra ny tendany; ny lelany no anaovany fitaka» (Sal 5.9). «Ny poizin’ny menarana no ao ambanin’ny molony» (Sal 140.3);

¹⁴«Feno ozona sy teny mangidy ny vavany» (Sal 10.7);

¹⁵«Mailaka handatsa-dra ny tongony;

¹⁶fandravana sy fandringanana no eo amin’ny lalany

¹⁷ary tsy fantany ny lalan’ny fiadanana» (Isa 59.7-8).

¹⁸«Tsy misy fahatahorana an’Andriamanitra eo anoloan’ny masony» (Sal 36.1).

¹⁹Fantatsika koa fa izay zavatra lazain’ny lalàna dia lazainy amin’izay manana ny lalàna, mba ho voatampina avokoa ny vava rehetra ka hiharan’ny fitsaran’Andriamanitra izao tontolo izao,

²⁰satria tsy misy nofo hohamarinina eo anatrehany amin’ny asan’ny lalàna; fa ny fahalalana ny amin’ny ota ihany no azo avy amin’ny lalàna.

²¹Ankehitriny dia naharihary ny fahamarinana avy amin’Andriamanitra, tsy tamin’ny lalàna anefa izany, fa nambaran’ny lalàna sy ny mpaminany;

²²fahamarinana avy amin’Andriamanitra amin’ny finoana an’i Jesosy Kristy* ho an’izay rehetra mino, satria tsy misy fanavakavahana,

²³fa samy efa nanota izy rehetra ka tsy manana ny voninahitra avy amin’Andriamanitra;

²⁴nefa hamarinina maimaimpoana amin’ny fahasoavany izy noho ny fanavotana izay ao amin’i Kristy Jesosy.

²⁵Izy no natolotr’Andriamanitra ho fanatitra fampiononam-pahatezerana tamin’ny rany, amin’ny finoana, mba hanehoana ny fahamarinany amin’ny tsy namaliany ny fahotana lasa

²⁶tamin’ny nandeferany; mba hanehoan’Andriamanitra ny fahamarinany ankehitriny ka ho marina Izy sady hanamarina izay manana finoana an’i Jesosy.

²⁷Aiza ary ny fireharehana? Foana izany. Amin’ny lalàna manao ahoana? Amin’ny lalànan’ny asa va? Tsia, fa amin’ny lalànan’ny finoana.

²⁸Koa amin’izany dia heverintsika fa finoana no anamarinana ny olona fa tsy ny asan’ny lalàna.

²⁹Moa Andriamanitry ny Jiosy* ihany va Izy fa tsy an’ny Jentilisa* koa? Eny, an’ny Jentilisa koa Izy,

³⁰satria iray ihany Andriamanitra, izay hanamarina ny voafora noho ny finoana, ary ny tsy voafora amin’ny finoana.

³¹Koa mahafoana ny lalàna amin’ny finoana va isika? Sanatria izany! Fa mampiorina tsara ny lalàna isika.