Read La Bible en Malgache Romana 6 Bible Online

Romana 6 - La Bible en Malgache bible

Romana 6

¹Inona ary no holazaintsika? Mbola hitoetra amin’ny ota ihany va isika mba hitomboan’ny fahasoavana?

²Sanatria izany! Hataontsika izay efa maty ny amin’ny ota ahoana no mbola ho velona ao aminy ihany?

³Tsy fantatrareo va fa na iza na iza isika no efa natao batisa ho amin’i Kristy* Jesosy dia natao batisa ho amin’ny fahafatesany?

⁴Koa tamin’ny batisa dia niara-nalevina Taminy ho amin’ny fahafatesana isika, mba ho tahaka ny nananganana an’i Kristy tamin’ny maty tamin’ny voninahitry ny Ray no handehanantsika kosa amin’ny fiainam-baovao.

⁵Fa raha nampiraisina aina Taminy tamin’ny fahafatesana toy izany isika, dia ho tahaka izany koa amin’ny fitsanganany;

⁶fa fantatsika fa ny maha olona antsika taloha dia niaraka nohomboana Taminy mba tsy hampanan-kery ny tenan’ny ota, koa tsy ho andevozin’ny ota intsony isika.

⁷Fa izay efa maty dia nohamarinina ka afaka amin’ny ota.

⁸Koa raha miara-maty amin’i Kristy isika dia mino fa hiara-belona Aminy koa;

⁹fantatsika mantsy fa rehefa nitsangana tamin’ny maty Kristy dia tsy maty intsony Izy; tsy manan-kery Aminy intsony ny fahafatesana.

¹⁰Ny amin’ny nahafatesany dia maty indray mandeha ny amin’ny ota Izy; fa ny amin’ny ahavelomany kosa dia velona ho an’Andriamanitra Izy.

¹¹Ary aoka ho tahaka izany koa ianareo, ataovy ho efa maty ny amin’ny ota ny tenanareo fa velona ho an’Andriamanitra ao amin’i Kristy Jesosy kosa.

¹²Koa aza avela hanjaka amin’ny tenanareo mety maty ny ota ka hanarahanareo ny filany;

¹³ary aza manolotra izay momba ny tenanareo ho amin’ny ota ho fiadian’ny tsy fahamarinana, fa atolory ho an’Andriamanitra ny tenanareo, toy ny efa maty nefa velona, ary ny momba ny tenanareo ho fiadian’ny fahamarinana ho an’Andriamanitra.

¹⁴Fa tsy hanan-kery aminareo ny ota; satria tsy mba ambanin’ny lalàna ianareo fa ambanin’ny fahasoavana.

¹⁵Ahoana ary? Hanota va isika satria tsy ambanin’ny lalàna fa ambanin’ny fahasoavana? Sanatria izany!

¹⁶Tsy fantatrareo va fa raha manolo-tena ho andevo ianareo mba hanoa, na iza na iza, dia andevon’izay ankatoavinareo ianareo, na ny ota ho amin’ny fahafatesana, na ny fankatoavana ho amin’ny fahamarinana?

¹⁷Koa isaorana Andriamanitra, fa na dia efa andevon’ny ota aza ianareo, ny fonareo kosa dia efa nanaraka ny fomban’ny fampianarana izay nanolorana anareo;

¹⁸ary rehefa natao afaka tamin’ny ota ianareo dia tonga andevon’ny fahamarinana.

¹⁹Miteny araka ny fanaon’ny olona aho noho ny fahalemen’ny nofonareo; fa tahaka ny nanoloranareo ny momba ny tenanareo ho andevon’ny fahalotoana sy ny tsy fanarahan-dalàna ka nanatanteraka ny tsy fanarahan-dalàna, dia mba atolory toy izany koa ny momba ny tenanareo ankehitriny ho andevon’ny fahamarinana, mba hahatanteraka ny fahamasinana.

²⁰Fa fony mbola andevon’ny ota ianareo dia afaka tamin’ny fahamarinana.

²¹Inona ary no vokatra azonareo fahiny tamin’izay zavatra mahamenatra anareo ankehitriny? Fa fahafatesana no fiafaran’izany zavatra izany.

²²Ankehitriny kosa, rehefa natao afaka tamin’ny ota ianareo, dia tonga mpanompon’Andriamanitra ka manana ny vokatrareo ho amin’ny fahamasinana, ary ny farany dia fiainana mandrakizay.

²³Fa fahafatesana no tambin’ny ota, ary fiainana mandrakizay kosa no fanomezana maimaimpoana avy amin’Andriamanitra ao amin’i Kristy* Jesosy Tompontsika.