Read La Bible en Malgache Romana 9 Bible Online

Romana 9 - La Bible en Malgache bible

Romana 9

¹Milaza ny marina ao amin’i Kristy* aho fa tsy mandainga, sady vavolombelona miaraka amiko ao amin’ny Fanahy Masina koa ny fieritreretako:

²Mafy ny alaheloko ka tsy mety mitsahatra ny fahorian’ny foko.

³Fa efa saika niriko ho voaozona ho afaka amin’i Kristy aza ny tenako noho ny rahalahiko, havako araka ny nofo,

⁴izay Israelita sady manana ny fananganana anaka, ny voninahitra, ireo fanekena, ny fanomezana ny lalàna, ny fombam-pivavahana ary ireo teny fikasana;

⁵azy koa ny razana izay niavian’i Kristy araka ny nofo, Kristy izay ambonin’izy rehetra, Andriamanitra isaorana mandrakizay! Amena*!

⁶Kanefa tsy milaza aho fa foana ny tenin’Andriamanitra. Satria tsy izay rehetra avy amin’ny Israely no Israely.

⁷Tsy izay taranak’i Abrahama dia zanany avokoa fa «Avy amin’Isaka no hiantsoana ny taranaka ho anao» (Gen 21.12).

⁸Izany hoe: Tsy ny zanaky ny nofo no zanak’Andriamanitra, fa ny zanaky ny teny fikasana no isaina ho taranaka.

⁹Fa izao no voalazan’ny teny fikasana: «Raha mitsingerina ny fotoana toy izao dia ho avy Aho ary hanan-janakalahy i Saraha» (Gen 18.10).

¹⁰Ary tsy izany ihany fa i Rebeka koa dia nanana anaka tamin’ny lehilahy iray, dia tamin’Isaka razantsika;

¹¹fa fony tsy mbola teraka akory ireo zaza ireo, ary tsy mbola nanao tsara na ratsy, dia nolazaina tamin-dRavehivavy hoe: «Hanompo ny zandriny ny zokiny» (Gen 25.23),

¹²mba hitoeran’ny fikasan’Andriamanitra, araka ny fifidianany, tsy avy amin’ny asa, fa avy amin’Izay miantso,

¹³sy araka ny voasoratra hoe: «I Jakoba no tiako fa i Esao kosa dia halako» (Mal 1.2-3).

¹⁴Inona ary no holazaintsika? Misy tsy fahamarinana va ao amin’Andriamanitra? Sanatria izany!

¹⁵Fa hoy Izy tamin’i Mosesy: «Hiantra izay hiantrako Aho ary hamindra fo amin’izay hamindrako fo» (Eks 33.19).

¹⁶Koa tsy avy amin’izay maniry na avy amin’izay mihazakazaka izany, fa avy amin’Andriamanitra izay miantra.

¹⁷Fa hoy ny Soratra Masina ny amin’i Farao: «Izany no nanandratako anao mba hoentiko mampiseho ny heriko ary mba hanambarana ny anarako any amin’ny tany rehetra» (Eks 9.16).

¹⁸Koa izay tiany hamindrana fo no amindrany fo ary izay tiany hohamafisina fo no hamafisiny fo.

¹⁹Dia hilaza amiko ianao hoe: Koa nahoana ary Izy no manome tsiny ihany? Fa iza moa no afaka hanohitra ny sitrapony?

²⁰Ry olona! Fa iza moa ianao no mamaly an’Andriamanitra? Izay zavatra novolavolaina va hilaza amin’Izay namolavola azy hoe: Nahoana Ianao no nanao ahy toy izao?

²¹Moa ny mpanefy vilany va tsy manam-pahefana amin’ny tanimanga ka ny vongany iray ihany no anaovany zavatra samihafa, ny iray dia hohajaina, ary ny iray kosa dia hatao tsinontsinona?

²²Ary raha Andriamanitra izay ta haneho ny fahatezerany sy hampahafantatra ny heriny aza no be fahari-po ka nandefitra tamin’izay fanaky ny fahatezerana voavoatra hosimbana,

²³mba hampahafantarany koa ny harenan’ny voninahiny amin’ny fanaky ny famindrampo izay namboariny rahateo ho amin’ny voninahitra,

²⁴dia isika izay nantsoiny koa, tsy ny avy amin’ny Jiosy* ihany fa ny avy amin’ny Jentilisa* koa,

²⁵araka izay lazainy ao amin’i Hosea hoe: «Hiantso ny tsy oloko hoe oloko Aho; ary ilay tsy malala hoe malala» (Hos 2.25);

²⁶«Ary any amin’ny tany izay nilazana taminy hoe: Tsy oloko ianareo, any no hiantsoana azy hoe zanak’Andriamanitra velona» (Hos 2.1).

²⁷Ary miantso mafy Isaia ny amin’ny Israely hoe: «Na dia toy ny fasika any amin’ny ranomasina aza ny isan’ny Zanak’Israely dia izay sisa ihany no hovonjena;

²⁸fa hefain’NY TOMPO tanteraka sy haingana etỳ ambonin’ny tany ny teniny» (Isa 10.22-23);

²⁹ary araka izay nambaran’Isaia mialoha hoe: «Raha tsy Andriamanitra, Tompon’izao rehetra izao, no namela taranaka ho antsika, dia efa tonga tahaka an’i Sodoma sy tahaka an’i Gomora isika» (Isa 1.9).

³⁰Inona ary no holazaintsika? Ny Jentilisa* izay tsy nitady fahamarinana no nahazo fahamarinana, nefa fahamarinana izay avy amin’ny finoana,

³¹fa ny Israely izay nitady ny lalànan’ny fahamarinana kosa dia tsy nahatratra izany lalàna izany.

³²Nahoana ary? Satria tsy tamin’ny finoana no nitadiavany izany fahamarinana izany fa toy ny tamin’ny asa ka tafintohina tamin’ny vato mahatafintohina izy;

³³araka ny voasoratra hoe: «Indro Aho mametraka vato mahatafintohina sy vatolampy mahasolafaka ao Ziona*; izay mino Azy dia tsy hitsanga-menatra» (Isa 8.14; 28.16).