Read La Bible en Malgache 1Korintiana 1 Bible Online

1Korintiana 1 - La Bible en Malgache bible

1Korintiana 1

¹I Paoly, voaantso ho apostolin’i Jesosy Kristy* noho ny sitrapon’Andriamanitra, sy i Sostena rahalahy,

²no mamangy ny fiangonan’Andriamanitra any Korinto, dia izay nohamasinina ao amin’i Kristy Jesosy, olona voaantso sady masina, mbamin’izay rehetra miantso ny anaran’i Jesosy Kristy Tompontsika eny amin’ny tany rehetra, dia izay sady Tompon’ireny no Tompontsika koa:

³Ho aminareo anie ny fahasoavana sy ny fiadanana avy amin’Andriamanitra Raintsika sy Jesosy Kristy Tompo.

⁴Misaotra an’Andriamanitro mandrakariva ny aminareo aho noho ny fahasoavan’Andriamanitra izay nomena anareo ao amin’i Kristy* Jesosy,

⁵dia ny nampanankarena anareo ao Aminy amin’ny zavatra rehetra, na ny teny rehetra, na ny fahalalana rehetra,

⁶araka ny niorenan’ny filazana an’i Kristy teo aminareo,

⁷koa tsy misy tsy anananareo ny fanomezam-pahasoavana rehetra, eo am-piandrasana ny fisehoan’i Jesosy Kristy Tompontsika

⁸izay hampiorina anareo koa hatramin’ny farany ka tsy hanan-tsiny ianareo amin’ny andron’i Jesosy Kristy Tompontsika.

⁹Mahatoky Andriamanitra izay nahatonga anareo ho voaantso, hanananareo firaisana amin’ny Zanany, dia Jesosy Kristy Tompontsika.

¹⁰Mananatra anareo aho, ry rahalahy, amin’ny anaran’i Jesosy Kristy* Tompontsika, mba hiray teny ianareo rehetra ka tsy hisy fisarahana eo aminareo, fa mba ho tafakambana tsara ka hiray saina sy hevitra.

¹¹Efa nambaran’ny avy amin’ny ankohonan’i Kloa tamiko mantsy ny mombamomba anareo, ry rahalahiko, fa misy fifampiandaniana eo aminareo.

¹²Miteny izany aho satria misy aminareo milaza hoe: Izaho dia an’i Paoly, izaho dia an’i Apolosy, izaho dia an’i Kefasy, izaho dia an’i Kristy.

¹³Voazarazara va Kristy? I Paoly va no voahombo tamin’ny hazofijaliana hamonjy anareo, sa ho amin’ny anaran’i Paoly no nanaovana batisa anareo?

¹⁴Misaotra an’Andriamanitra aho fa tsy nisy nataoko batisa ianareo, afa-tsy i Krispo sy i Gaio,

¹⁵fandrao misy milaza fa efa natao batisa ho amin’ny anarako ianareo.

¹⁶Mba efa nanao batisa ny ankohonan’i Stefanasy koa anefa aho; ankoatra ireo dia tsy hitako izay nataoko batisa.

¹⁷Fa tsy naniraka ahy hanao batisa Kristy fa hitory ny Filazantsara, tsy tamin’ny teny fahendrena, fandrao ho foana ny hazofijalian’i Kristy.

¹⁸Fa ny teny ny amin’ny hazofijaliana dia fahadalana amin’izay ho very fa herin’Andriamanitra kosa amintsika izay hovonjena.

¹⁹Fa voasoratra hoe: «Horavako ny fahendren’ny hendry ary holaviko ny fahalalan’ny mahalala» (Isa 29.14).

²⁰Aiza ny hendry? Aiza ny mpanoradalàna*? Aiza ny mpiady hevitra avy amin’izao tontolo izao? Tsy nampodin’Andriamanitra ho fahadalana va ny fahendren’izao tontolo izao?

²¹Satria, na dia naseho aza ny fahendren’Andriamanitra, ny fahendrena dia tsy nahatonga izao tontolo izao hahalala an’Andriamanitra, koa ny fahadalan’ny fitorian-teny no sitrak’Andriamanitra hamonjeny izay mino.

²²Fa mila famantarana ny Jiosy*, ary mitady fahendrena ny Grika,

²³fa izahay kosa dia mitory an’i Kristy* voahombo tamin’ny hazofijaliana, dia fahatafintohinana amin’ny Jiosy ary fahadalana amin’ny Grika,

²⁴fa amin’izay voaantso kosa, na Jiosy na Grika, dia Kristy izay herin’Andriamanitra sy fahendren’Andriamanitra.

²⁵Fa ny fahadalan’Andriamanitra dia hendry noho ny olona, ary ny fahalemen’Andriamanitra dia mahery noho ny olona.

²⁶Mba hevero ny fiantsoana anareo, ry rahalahy, fa tsy firy ny olon-kendry araka ny nofo, tsy firy ny olona mahery, tsy firy ny avo razana;

²⁷fa ny adala amin’izao tontolo izao no nofidin’Andriamanitra hampahamenatra ny hendry; ary ny malemy amin’izao tontolo izao no nofidin’Andriamanitra hampahamenatra ny mahery;

²⁸ary ny iva razana amin’izao tontolo izao sy izay fanevateva no nofidin’Andriamanitra, dia ny atao ho tsy misy aza, mba hahafoana ny misy,

²⁹mba tsy hisy nofo hahazo hirehareha eo anatrehan’Andriamanitra.

³⁰Fa avy aminy no nahatonga anareo ho ao amin’i Kristy* Jesosy, izay natao fahendrena avy amin’Andriamanitra ho antsika, ary koa fahamarinana, fahamasinana ary fanavotana,

³¹mba ho araka ny voasoratra hoe: «Izay mirehareha, aoka NY TOMPO no ho reharehany» (Jer 9.23).