Read La Bible en Malgache 1Korintiana 10 Bible Online

1Korintiana 10 - La Bible en Malgache bible

1Korintiana 10

¹Fa tsy tiako tsy ho fantatrareo, ry rahalahy, fa tao ambanin’ny rahona ny razantsika rehetra, namakivaky ny ranomasina izy rehetra,

²natao batisa ho amin’i Mosesy tao amin’ny rahona sy ny ranomasina izy rehetra,

³nihinana ny sakafo ara-panahy iray ihany izy rehetra,

⁴nisotro ny fisotro ara-panahy iray ihany izy rehetra; fa nisotro tamin’ny vatolampy ara-panahy izay nanaraka azy izy rehetra, ary Kristy* izany vatolampy izany.

⁵Nefa ny ankabeazany dia tsy sitrak’Andriamanitra fa naringana tany an-tany efitra.

⁶Izany zavatra izany dia tonga anatra ho antsika mba tsy hitsiriritra zava-dratsy isika toy ny nitsiriritan’izy ireny.

⁷Aoka tsy ho mpanompo sampy ianareo, tahaka ny sasany tamin-dry zareo, araka ny voasoratra hoe: «Nipetraka hihinana sy hisotro ny olona dia nitsangana hilalao» (Eks 32.6).

⁸Aoka tsy hijangajanga isika tahaka ny sasany tamin-dry zareo ka telo arivo sy roa alina no ringana indray andro.

⁹Aoka tsy haka fanahy ny Tompo isika, tahaka ny nakan’ny sasany tamin-dry zareo fanahy Azy ka nahatonga azy ireny ho matin’ny menarana.

¹⁰Aoka tsy himonomonona ianareo tahaka ny sasany tamin-dry zareo, izay matin’ny mpandringana.

¹¹Ary izany dia nanjo azy ireny mba ho anatra sady voasoratra koa ho fananarana antsika izay iharan’izao andro farany izao.

¹²Koa izay milaza azy fa mijoro tsara dia aoka izy hitandrina fandrao ho lavo.

¹³Tsy misy fakam-panahy nahazo anareo afa-tsy izay zakan’ny olombelona; nefa mahatoky Andriamanitra ka tsy hamela anareo halaim-panahy mihoatra noho izay zakanareo; fa momba ny fakam-panahy dia hasiany lalana koa hahafahanareo mahazaka izany.

¹⁴Koa amin’izany, ry malala, dia mandosira ny fanompoan-tsampy.

¹⁵Milaza toy ny amin’ny olona manan-tsaina aho; hevero izay lazaiko aminareo.

¹⁶Ny kapoaky ny fisaorana izay isaorantsika, tsy fiombonana amin’ny ran’i Kristy* va izany? Ny mofo izay vakintsika, tsy fiombonana amin’ny tenan’i Kristy va izany?

¹⁷Satria iray ihany ny mofo dia tena iray ihany isika na dia maro aza; fa isika rehetra dia samy mandray amin’izany mofo iray izany avokoa.

¹⁸Indreo ny Israely araka ny nofo; moa tsy mpiombona amin’ny alitara va izay mihinana ny fanatitra?

¹⁹Inona ary no holazaiko? Mety ho zavatra misy heviny va ny hena aterina amin’ny sampy, ary mety ho zavatra tena izy va ny sampy?

²⁰Tsia, fa izay zavatra atolotry ny Jentilisa* ho fanatitra dia atolony ho an’ny demonia fa tsy ho an’Andriamanitra (Deo 32.17); koa tsy tiako ho mpiombona amin’ny demonia ianareo.

²¹Tsy afaka sady hisotro amin’ny kapoaky ny Tompo ianareo no hisotro amin’ny kapoaky ny demonia; tsy afaka sady hihinana amin’ny latabatry ny Tompo ianareo no sady hihinana amin’ny latabatry ny demonia.

²²Mampahasaro-piaro ny Tompo va isika? Mahery noho Izy va isika?

²³Azo atao ny zavatra rehetra, nefa tsy ny zavatra rehetra no mahasoa; azo atao ny zavatra rehetra, nefa tsy ny zavatra rehetra no mampandroso.

²⁴Aoka tsy hisy olona hitady ny hahasoa ny tenany fa ny hahasoa ny namany.

²⁵Izay hena rehetra amidy eny an-tsena dia hano fa aza manontany akory noho ny fieritreretana;

²⁶fa «an’NY TOMPO ny tany sy izay rehetra eo aminy» (Sal 24.1).

²⁷Ary raha misy amin’ny tsy mino manasa anareo ka ta handeha ianareo dia hano izay arosony eo anoloanareo fa aza manontany akory noho ny fieritreretana.

²⁸Fa raha misy milaza aminareo hoe: Hena naterina tamin’ny sampy io dia aza homana noho ny amin’ilay nilaza taminareo sy noho ny fieritreretana.

²⁹Fieritreretana, hoy aho, tsy ny an’ny tenanao fa ny an’ny olon-kafa; fa nahoana ny fahafahako no hotsarain’ny fieritreretan’ny olon-kafa?

³⁰Fa raha amin’ny fisaorana no ihinanako izany, nahoana aho no tenenina ratsy amin’izay anaovako fisaorana?

³¹Koa amin’izany, na mihinana na misotro ianareo, na inona na inona ataonareo, dia ataovy ho voninahitr’Andriamanitra izany rehetra izany.

³²Aza manao izay hahatafintohina ny Jiosy* na ny Jentilisa* na ny fiangonan’Andriamanitra,

³³dia tahaka ahy koa, manao izay hahafinaritra ny olona rehetra amin’ny zavatra rehetra ka tsy mitady ny mahasoa ahy ihany fa ny mahasoa ny maro mba hahatonga azy hovonjena.