Read La Bible en Malgache 1Korintiana 12 Bible Online

1Korintiana 12 - La Bible en Malgache bible

1Korintiana 12

¹Ny amin’ny zavatra ara-panahy, ry rahalahy, dia tsy tiako tsy ho fantatrareo izany.

²Fantatrareo fa fony Jentilisa* ianareo dia noentina tany amin’ny sampy moana, araka izay nitaomana anareo.

³Koa mampahafantatra anareo aho fa tsy misy olona ampitenenin’ny Fanahin’Andriamanitra ka miteny hoe: Voaozona Jesosy; ary tsy misy mahay manaiky hoe: Jesosy no Tompo, raha tsy amin’ny Fanahy Masina.

⁴Zarazaraina ho samihafa ny fanomezam-pahasoavana nefa ny Fanahy dia iray ihany.

⁵Zarazaraina ho samihafa ny fanompoana nefa ny Tompo dia iray ihany.

⁶Zarazaraina ho samihafa ny asa nefa iray ihany Andriamanitra izay miasa ny zavatra rehetra amin’ny olona rehetra.

⁷Ary ny tsirairay dia samy nomen’ny Fanahy hahay mampiseho amin’ny olona rehetra ny fanomezam-pahasoavana.

⁸Fa ny iray dia nomen’ny Fanahy teny fahendrena; ny iray dia teny fahalalana, araka izany Fanahy izany ihany;

⁹ny iray dia finoana, amin’izany Fanahy izany ihany; ny iray dia fanomezam-pahasoavana hoenti-manasitrana, amin’izany Fanahy iray izany ihany;

¹⁰ny iray dia ny manao fahagagana; ny iray dia ny maminany; ny iray dia ny mahafantatra fanahy samihafa; ny iray dia ny miteny amin’ny fiteny samihafa tsy fantatra; ary ny iray dia ny mandika fiteny tsy fantatra.

¹¹Ireo rehetra ireo dia asan’ny Fanahy iray ihany, zarazarainy ho azy rehetra avy araka ny sitrapony.

¹²Fa tahaka ny tena iray ihany kanefa maro ny momba azy, ary ireo rehetra momba ny tena ireo na dia maro aza dia tena iray ihany, dia tahaka izany koa Kristy*.

¹³Fa Fanahy iray ihany no nanaovana batisa antsika rehetra ho tena iray, na Jiosy*, na Grika, na andevo, na olona afaka; ary isika rehetra dia efa nampisotroina ny Fanahy iray.

¹⁴Nefa tsy iray ny momba ny tena fa maro.

¹⁵Raha hilaza ny tongotra hoe: Satria tsy tanana aho dia tsy mba momba ny tena, amin’izany va dia tsy momba ny tena izy?

¹⁶Raha hilaza ny sofina hoe: Satria tsy maso aho dia tsy mba momba ny tena, koa amin’izany va dia tsy momba ny tena izy?

¹⁷Raha maso avokoa ny tena rehetra, aiza izay fandrenesana? Raha fandrenesana avokoa, aiza izay fanamboloana?

¹⁸Fa Andriamanitra efa nametraka izay rehetra momba ny tena samy ho eo amin’ny tena, araka ny sitrapony.

¹⁹Ary raha izay rehetra momba ny tena no tonga iray monja, aiza intsony izay tena?

²⁰Fa maro ny momba ny tena nefa ny tena dia iray ihany.

²¹Ary tsy mahazo milaza amin’ny tanana ny maso hoe: Tsy mila anao aho; tsy mahazo milaza amin’ny tongotra ny loha hoe: Tsy mila anareo aho.

²²Fa vao mainka aza ilaintsika ny momba ny tena izay atao ho malemilemy kokoa noho ny sasany.

²³Ary ny momba ny tena izay ataontsika ho kely voninahitra kokoa dia tafiantsika voninahitra bebe kokoa; ary izay tsy misy haja amin’ny momba ny tenantsika no hajaintsika kokoa;

²⁴fa tsy mila izany ny efa misy haja rahateo amin’ny momba ny tenantsika. Fa tamin’ny nanamboaran’Andriamanitra ny tena dia izay kely voninahitra no nomeny voninahitra bebe kokoa,

²⁵mba tsy hisy fisarahana eo amin’ny tena, fa mba hifampiahy ny momba ny tena rehetra.

²⁶Ary raha mijaly ny iray amin’ny momba ny tena dia miara-mijaly avokoa izay rehetra momba ny tena; fa raha omem-boninahitra kosa ny iray amin’ny momba ny tena dia miara-mifaly avokoa izay rehetra momba ny tena.

²⁷Ary ianareo no tenan’i Kristy ka samy momba ny tenany avokoa, araka ny anjaranareo avy.

²⁸Ary teo amin’ny fiangonana[5] dia izao no nanendren’Andriamanitra azy: Voalohany apostoly, faharoa mpaminany, fahatelo mpampianatra, manaraka izany dia fahagagana, fanomezam-pahasoavana hoenti-manasitrana, asa fanampiana, fitondrana ary fiteny samihafa tsy fantatra.

²⁹Apostoly va izy rehetra? Mpaminany va izy rehetra? Mpampianatra va izy rehetra? Manao fahagagana va izy rehetra?

³⁰Manana fanomezam-pahasoavana hoenti-manasitrana va izy rehetra? Miteny amin’ny fiteny tsy fantatra va izy rehetra? Mandika teny va izy rehetra?

³¹Nefa maniria fatratra ny fanomezam-pahasoavana lehibe indrindra. Ary indro, izay lalana tsara indrindra no atoroko anareo: